WISATA ROHANI MAMRE RUNGGUN PKS KE SILALAHI

WISATA ROHANI MAMRE RUNGGUN PKS KE SILALAHI

                Schudue time/ Rangkaian acara

1.       Ibadah Kebaktian/PA

2.       Pembahasan P2P Mamre

3.       Relaks/ memanggang ikan

4.       Diskusi Program Mamre

5.       Rekreasi

Ibadah PA.

1.       Rende ( menyanyikan beberap lagu Pujian)

2.       Ertoto

3.       Ngoge bahan PA

4.       Nuriken penggejapen/ Diskusi

5.       Rende  ( Persembahen)

6.       Doa syafaat

7.       Rende

8.       Pertoton Tuhan.

Lagu Lagu Pujian  Wisata Rohani Mamre

1.       KEE No 86 :1,3

Tuhan Yesus Sipermakan, aku biri birina

Yesus si ndemi pusuhku ku ikutken Ia nge

Ku ikutken Ia nge, kuikutken Ia nge

Yesus si ndemi pusuhku kuikut ken Ia nge

Dage mari k,ita Krina, si ehaga Yesus e

Ia si permakan kita, lanai kita kelehen

Lanai kita kelehen, lanai kita kelehen

Keriahen lalap lit kin man singikut Ia nge

2.       Kumau cinta Yesus selamanya, ku mau cinta Yesus selamanya

Meskipun badai silih beranti, dalam hidupku, ku mau cinta Yesus selamanya

Ya Abba, Bapa, ini aku anakMu, layakkanlah seluruh hidupku

Ya Abba, Bapa, ini aku anakMu pakailah sesuai dengan rencanaMu.

3.       Sena ukurku jumpa ras Yesus, senang ukurku haleluya

Rasa lalap ateku ras Ia, senang rusur ras Yesus Tuhanku

Haleluya glory,haleluya glory, ersurak-surak puji Ia

Haleluya glory, haleluya glory, rasa lalap ras Yesus Tuhanku.

4.       Yesus kekasih jiwaku, sungguh ku percaya padaMu

Karena kasihMu padaku, kau tebus dosaku

Dari terbitnya matahari, dan sampai terbenamnya

Kuangkat lagu pujian, tinggikan namaMu

Reff. :    Dengan gendang kupuji, kupuji, dengan kecapi.o….o…

                Ku bernyanyi haleluya, Yesus kekasihku

5.       KEE No 151

Nusur min o Kesah Tuhan, bengket ku ukurku e, maka kata sinisuan turah, janah ‘rbuah pe

Kam ibas Dibata nari, pekena ukurku min. Pasu-pasu pendahin, maka aku genduari

Ndaram tuah sitetap, alu ate si telap.

Kam banana kegeluhen, Kam simahan ukur t’rang. Kam si jadi persuruhen, maka kerajan menang

Maka perpulungen kari, Tutus ngikut Yesus kap. Janah Ia peserap, ibas dosa doni nari

Jadi dungname bage, bagi Kam badia pe.

6.       SEE No 169:1,3

Sura-sura Yesus bangku ersinalsal tetap, nggeluh bujur ras mehuli, si ngena ateNa

Reff : Ersinalsal terang, em si ni suraken Yesus, Ersinalsal terang, ku tetap ersinalsal.

Kupindo Yesus nampati njaga pusuhku e, gelah ngasup ersinalsal, ngikutken Tuhan e

Reff:..

7.       KEE No 249. :1, 2

Ajar aku o Tuhanku, make kata ras pedahNdu, kue the payo ras sentudu Ku ikutken bas geluhku

Reff:  Singikut Pedah Dibata daten me kerembakenNa, Pedah kata tangkas krina, em jadi gelementa

Tatah aku genduari, arah dalin simehuli, lalap min Kam kutimai gelah aku iapuli… Reff..

8.       Kasih setiaMu yang kurasakan , lebih tinggi dari langit biru

KebaikanMu yang t,lah Kaunyatakan lebih dalam dari lautan

BerkatMu yangbtlah ku terima, sempat membuatku terpesona

Apa yang tak pernah kupikirkan, itu yang Kau sediakan bagiku

Siapakah aku ini Tuhan jadi biji mataMu, dengan apakah ku balas Tuhan

Selain puji dan sembah Kau.

Bahan PA  Wisata Rohani Mamre PKS di Silalahi

Ogen                : Kuan-Kuanen 23:12-16 ; Masmur 94:8-16          

Tema               : Tetaplah Erlajar

   Pendahulan

Doni enda terus berkembang seiring perkembangen zaman, emaka guna banci kita nipati perkembangan zaman enda la banci lang kita pe harus tetap erlajar gelah kita tetap megegeh dingen paguh  sebagai anak-anak Dibata si ermulia  ibas menghadapi perbeben-perbeben, entah pe persoalen-persoalen ibas geluhta . Perban arah erlajar maka semakin ertambahna pemeteh/pemahamen-pemahamen guna ndalani kegeluhen enda alupayo ras sentudu peraten Tuhan ibas menghadapi perbeben – perbeben nggeluh/ tantagen seiring ibas perkembangan  zaman si teridah arah perubahen tingkah laku/ sikap hidup ibas sope ia erlajar ibas ndalani kegeluhenna.

Isi

Salomo (penulis Kitab enda) seh genduari terkenal ia orang yang bijaksana, nulisken kitab Kuan-Kuanen enda, tujunna eme nampati kalak gelah pentar dingen ngaloken pengajaren si mehuli, janah ngantusi ranan si mbages ertina. Iajarkenna kalak maka nggeluh pentar, bujur, adil dingen benar. Kalak si langa erpengalamen gelah cerdik, kalak si nguda gelah pantas dingen pentar (lih. Kuan-Kuanen 1:2-4). Guna sie Salomo ngataken maka guna ndatken pemeteh, sipemenana si la banci la lit ibas kalak eme meha guamat dingen erkemalangen man Tuhan . Erkemalangen man Tuhan ituduhken alu ndalanken Undang-Undang Tuhan.   Kalak lenge la nggit mperdiateken kepentaren dingen la ia nggit erlajar (kuan-kuanen 1:7).  Enda ngataken maka adi la mperdiateken kepentaren dingen la nggit erlajar kita banci jadi kalak lenge. Emaka  Tuhan Dibata pe ngataken man bangsa Israel gelah tetap mperdiateken perentah-perentah (undang-undang ) Tuhan janah iajarkenka man anak-anak (generasi ku generasi) (lih. Ulangan 6:6-9) gelah mejuah-juah  ras jadi bangsa simbelin , janah ngiani tanah si mehumur e (Ul. 6:3-4).

Ibas Ogenta Masmur 94:8-16 , ibas “ayat 8” ikataken : O bangsaku, uga maka bage kal motundu ?..Ndigan denga kam erlajar pentar ?.. Enda ikataken man bana perbahan bangsa Israel ibas paksa sie la mperdiateken (erlajar) karna undang-undang/ Perentah Tuhan ibas ndalani kegeluhenna. Iandalkenna gegehna, iandalkenna pengertinna jine she maka ia ngenanami kiniseraan eme itindas bangsa sideban. Ibas paksa sibage nina “, labo kita idah Tuhan, labo kita iperdiateken Dibata nu Israel.” Emaka isingetken gelah kita mperdiateken ciptaan Dibata ibas kulanta (Mas. 94:9-11) eme, Dibata sijadiken cupingta guna erpemegi, tetu Dibata pe erpemegi, Dibata njadiken matantanta guna erpengidah, tentu Dibata pe erpengidah, Dibata singajari bangsa-bangsa, tentu Ia menilai apai si salah ras sila payo she maka Ia pe nehken penghukumen (pengajaren) man bangsa/kalak si la payo perbahanenna,  Dibata jadi guru man kalak kerina emaka ieteh Tuhan nge kerina perukuren manusia (la lit si terbuni I lebe-lebeNa). Adi sidat pengertin si enda janah nggit mperdiateken kuasa (Ciptaan) Tuhan Dibata ibas geluhta tentu kita pe semakin berhikmat (pentar) ibas ndalani kegeluhen enda. Sebab arah kita nggit mperdiateken (erlajar) kemuliaan/kuasa/Ciptaan Tuhan  Dibata ibas kegeluhenta bagepe lingkungen entah pe alam sekitarta je sidat pengertin/pemeteh karna uga muliana (Agungna) ras keleng ate  Tuhan Dibata e seh maka turah ketetapen ukur nggeluh ras Tuhan , mperdiateken undang-undang Tuhan, emaka sialoken me kesangapen, aminna pe lit kesusahen entah perbeben, tetap kita teneng ras paguh seh kesusahen e bene ibas kita nari. Tuhan nampati ras ngkapiti anak-anakna ngelawan si jahat/ilat (Mas. 94:12-16).  Arah turahna pengertin sibage emaka kerina perbeben entahpe persoalen hidup sihadapi sebage anak-anak Dibata ibas kegeluhenta banci sidalanken alu sentudu ras peraten Tuhan (Undang-Undang/hukum Tuhan) she maka sidat kemalemen ate. Ibas Matius 11:29  ikataken :”Tamakenlah pasangenKu ku kudukndu janah erlajarlah ibas Aku nari. Sebab Aku melias janah meteruk ukurKu; alu bage idatndu me kemalemen ate.” (pasangenKu = Undang-undang/Hukum/Ajaran Kristus). Ngataken mari sipakai ajaran Kristus ibas geluhta tentu menahang jadina kita ndalani kegeluhen e.

Caranta ibas erlajar kepeken la asal nggit saja (gelah enggo) tapi ibas erlajar arus dem alu ketutusen ras perhatianta pe tetap focus guna ndatken pemeteh (tidak sekedar tahu). Ibas Masmur 94:8 ikataken :” Perdiatekenlah ajar gurundu jenari erlajarlah pekeri gegeh”. Kata “perdiatekenlah” ibas bahasa Indonesia ikatakenna “Arahkenlah perhatianmu” berarti la kita erdua ukur entahpe monce-once ukurta, emaka, mata, hati, bagepe cupingta tetap siarahken guna ndatken pemeteh/ pengetahuan alu pekeri gegeh (penuh semangat). Ajar e si ndatken arah “guru” ibas bahasa Indonesia ikatakenna “didikan”. Berarti si mereken pendidiken / pemeteh/pengertin man banta. Pemeteh/pengertin/ ajar man banta e banci saja arah si ndahinna pengajar, orang tua bagepe arah kuasa/kemuliaan ciptaan Dibata si idah kita.

Adi siperdiateken janah sipergermetken maka keluarga (jabu) eme merupaken ingan erlajar si pertama ialoken sekalak anak.  Jabu e merupaken peroses pertumbuhen/ pengajaren sekalak anak ibas jabu arah nasehat, entah pe teladan (contoh) si mehuli ibas orang tua nari .Ibas Ulangen 6:6-9 je ipersingeti karna tanggung jawab orang tua guna ngajarken undang-undang Tuhan janah mpersingetisa ibas katawari paksa pe ras ijapa pe . Ibas mereken ajaren entah contoh man anak e pe selaku orang tua harus tegas guna membentuk kepribadian anak si tetap erkemalangen man Tuhan she maka ia pe ndatken keberhasilen ibas kegeluhenna. Ibas Kuan-kuanen 23:13-14 ikataken : “Ola kam biar-biaren didik anakndu, adi ipekpekndu ia labo ia mate, tapi selamat. Guna banci mereken didiken man anak i tengah jabu tentu selaku orang tua pe harus terus erlajar she maka ia pe ngasup mereken ajar ras contoh-contoh si mehuli man anak e. Melala genduari orang tua mengeluh alu ngataken maka “anak genduari e enggo beluhen asang orang tuana she maka ikatakenna orang tuana enggo kuno”. Tentu enda merupaken contoh si la mehuli. Terlebih ibas zaman sigenduari e terus berkembang emaka selaku orangtua pe terus erlajar gelah ngasup tetap mereken pengajaren si mehuli nandangi anak.

Ibas ketutusen ngajarken anak e tentu erbahan anak e jadi pentar, anak si pentar ipergermetkenna adi bapana mereken ajar, tapi kalak si meganjang ukur la nggit ngaku salah (kuan-Kuanen 13:1). Tentu e jadi keriahen man orang tua, perbahan teridah anak e pe banci berhasil ibas geluhna alu tetap encidahken  karyana dingen keberhasilenna  selaku ia jadi anak-anak Tuhan si teridah pe arah ia melasken ranan sidem pemeteh/ tetap berhikmat (Kuan-Kuanen 23:16).  Emaka ibas ketutus erlajar ras ngajarken anak e mereken keriahan labo hanya man si erlajar tapi pe man orang tua (keluarga) . Kuan-Kuanen 23:24 :” malem ate bapa adi anakna erkemalangen man Dibata; ersurak pusuhna adi pentar anakna.

Kesimpulen.

1.       Erlajar eme proses ibas kegeluhen si harus sidalani guna ndatken keberhasilen selaku anak-anak Dibata she maka ngasup kita menghadapi tantangen/ persoalen hidup seiring ras perkembangen zaman enda. Janah erlajar e harus tutus, focus guna ndatken pemeteh (kepentaren). Emaka la banci lang harus kita nggit mperdiateken ajar entah pe didiken arah si mereken didiken, guru, orang tua, bagepe nandangi kemuliaan/kuasa/ciptaan Dibata.

2.       Proses erlajar e ibenaken ibas keluarga nari, ija orang tua mereken didiken man anak bagi si ikataken Tuhan ibas Ulangen 6:6-9. Janah selaku anak pe harus mperdiateken didiken orangtuana  maka idatna pengertin-pengertin alu bage banci ia mereken keriahen man bapana. Teridah pe kepentarenna arah hikmat perkatanna. Emaka orang tua pe harus terus erlajar. Emaka marilah kita kerina tetap erlajar gelah ertambah-tambah pengertinnta ibas dalani geluh enda seiring ras perkembangan zaman ibas Tuhan, she maka kita tetap megegeh ras paguh ibas menghadapi perbeben/ persoalen-persoalen hidup, emaka kita beroleh keberhasilan selaku anak-anak Tuhan.

Hidup adalah belajar

Belajar bersyukur meski tak cukup…

Belajar ikhlas meski tak rela…

Belajar taat meski berat…..

Belajar memahami meski tak sehati….

Belajar bersabar meski terbebani…

Belajar setia meski tergoda…

Belajar dan terus belajar dengan keyakinan setegar karang…

Tapi sudah kodrat, hati seperti air laut bergelombang, pasang surut dan sering terbawa arus…

Maka dari itu, belajarlah untuk tetap berada di jalan yang benar meski banyak orang berbuat tak benar, Belajar untuk teguh disaat yang lain runtuh, belajar dan terus belajar di dalam Kasih Karunia Tuhan,..

Diskusi :

1.       Uga caranta erlajar sedekah enda, janah enggo nge kita pe tetap ngajari anakta ?..

2.       Ibas ingan ras paksa si uga kin  kita banci erlajar., ?

3.       Apakah kita terus erlajar seh genduari enda maka tetap kita banci mereken ajaren man anak-anakta , ,,? Turiken contohna…

4.       Mari sibelasken tekatta sekalak sekalak ibas erlajar .!