LITURGI KEBAKTIN NATAL MAMRE TAHUN 2015

LITURGI KEBAKTIN NATAL MAMRE

TAHUN 2015

 

Thema          : ”Teklah Man Tuhan Dingen Lakokenlah Si Mehuli” (Masmur 37: 3a)

Sub Tema     :  Semangat natal 2015 mpeturah sikap nggeluh si mbaru si teridah ibas diri mamre si lanai ermorah ate nangdangi kinilabujuren, Judi, KKN ras ikut memperjuangken nilai-nilai keadilen, kiniteken subuk i tengah-tengah jabu, gereja bagepe masyarakat.

                     Persikapen

1.      Panitia nikapken si nagani lilin ras si maba doa syafaat, si muat persembahen. Bagepe nentuken petugas-petugas ope denga kebaktin.

2.      Kata pengalo-ngalo ibas Panitia Natal nari (kerina petugas kebaktin erbahan persikapen)

Rende: SEE 146 (iendeken 4 x)

Muliakenlah

Muliakenlah o tendingku, mulaiken Tuhan Dibata o tendingku

Muliakenlah, muliakenlah, muliaken TUhan o tendingku

3.      Barisan Prosesi memasuki ruangan kebaktin

4.      Rende KEE 115: 1-3 KERIAHEN SI MBELINNA                            (Perpulungen tedis)

1)   Keriahen si mbelinna, si kuberitaken e

      Enggo tubuh si permakan, eme Tuhan Yesus e

      Pujilah min Dibatanta, Ras dame-dame-dame man banta

      Dibatanta Si erkuah ate, man kita jelma.

2)   Ibas berngi enda terang, bintang si mehelhel e

      Trangna seh ku perukuren, si lanai erlayas pe

      Pujilah min Dibatanta, Ras dame-dame-dame man banta

      Dibatanta Si erkuah ate, man kita jelma.

3)   Tuhan Yesus persadanta, em isuruh Bapa e

      Sinasapken krina dosa, Ibas golgota kepe

      Pujilah min Dibatanta, Ras dame-dame-dame man banta

      Dibatanta Si erkuah ate, man kita jelma.

                      Kebaktin

1.      Votum      :  Kebaktin natal Mamre enda ibenaken ibas gelar Dibata Bapa, Si nepa langit ras doni, ibas gelar Yesus Kristus si enggo mpeteruk baNa jadi seri ras manusia, ras ibas gelar Kesah Si Badia si mpengasup kam tetap erkiniteken man baNa.

2.      Salam        :  Perkuah ate ras dame ibas Dibata Bapa ras ibas Tuhan Yesus Kristus nari, ras kerembaken Kesah Si Badia ras kam kerina gelah. Amin

Perp           : Amin ... amin .... amin.

3.      Introitus   :  Cigalah atendu man kejahaten, ngena atendu si benar, janah arus iperdiatekenndu gelah kebujuren menang i bas pengadilen. (Amos 5:15)

4.      Rende PEE 59: 1-3 I DONI ENDA MBUE KESUSAHEN

1)   I doni enda mbue kesusahen, bagepe lit ka nge perubaten

      Rehlah min kinirajanNdu

      I gereja si arus ersada, maka tangkas kegluhen si mbaru, rehlah min kinirajanNdu

      Rehlah min, rehlah min. Rehlah min kinirajanNdu

2)   Gelah talu gelap kemusilen, cidahkenlah terang keadilen

      Reh lah min kinirajanNdu

      Ibas lawit, i deleng, i juma. I dalan, i tiga, ras i kota

      Reh lah min kinirajanNdu

      Rehlah min, rehlah min. Rehlah min kinirajanNdu

3)   Bas pusuh kata ras perbahanen, kekelengen rasp e kebenaren

      Reh lah min kinirajanNdu

      Kam me kapen si Mada si nasa, Ibas Kristus bangsaNdu ersembah

      Reh lah min kinirajanNdu

      Rehlah min, rehlah min. Rehlah min kinirajanNdu

5.      Persembahen Pujin (Koor/VG)                                                             (Perp. Kundul)

6.      Kecibal Mamre Ibas Zaman Enda  (banci imodifikasi alu erbahan fragment)

Mamre I :

Kai ngenda ndia deba si man bahanen maka banci tole aku iergai. Ndehara nggo mbiar man bangku, anak-anak malang man bangku. Tapi uga kal maka kidaram denga kal pusuh e. Tempa-tempa la bias keleng ate ras kerina kehamaten si kualoken.Ku jah Ku je kudarami.  Latih seh latihna sebab kuakap nggeluh enda sada perlumbaan jadi nomor sada.

Mamre II :

La kuteh kai tujun nggeluh enda. Si lang-lang kuakap kata Dibata e. la masuk akalku. Kai ka kin banci iban gereja bangku, kai ka kin banci ulih ertoto ras berkat ku pjj. Kai kin banci perubahen adi rembak ras Dibata. Kerina kurembaki alu logikaku. Tapi adi jujur aku, logika mabai aku kote, la teneng, la dame. Pusuhku tetap kidaram.

Mamre III :

Keriahen sada bagin perayakenku, tempa-tempa mbue meriah maba kemalem bas pusuhku. Emaka la kuakap dalih dekahen gia aku i mburas kede kopi, ersatur, erjudi asangken i rumah, la kuakap salah buen waktuku ercakap kerna politik asangken ncakapken kiniulin jabuku.

7.      Persembahen Pujin

8.      Responsoria kerna Perayaken Mamre

L    :  Pirak banci idat ibas pertambangen, janah emas banci ibuat ibas ingan sepuhen. Besi ikali ibas taneh nari, tembaga ilebur ibas batu nari. Kerina si e kugelari kebayaken.

P    :  Tapi ketenengen dingen malem ate labo tertempahken arah kerina emas, permata bagepe barang-barang si erndilap.

L    :  Tapi ija dage banci ku dat kepentaren? Ija ingan erlajar gelah dat aku pengertin? Gelah kerina doni enda ngergai aku. Sebab ibabo kendit enda aku ngenca si mbisana.

P    :  Kepentaren lalit ijumpai ibas manusia, ergana tuhu-tuhu la ise pe metehsa. Kelbung ras lawit si mbages ngatakenca maka lalit kepentaren ibassa. Dalan ku kepentaren Dibata ngenca metehsa. itehNa ija ingan guna ndatkensa.

L    :  Latih encari, dingen melawen tunduh. Erlebuh tendiku ndarami erti kai kin si kudarami bas geluh enda. Sebab kerina nggo lit bas aku. Ndehara, anak-anak, kebayaken, gelar si mehaga. Tapi ntah uga maka lino kal geluhku.

P    :  Kenca kerina enggo kutimbang, enda me tampukna si ku dat. Ekemalangenlah man Dibata dingen patuh man peratenNa, sebab guna si e saja manusia i tepa.

9.      Rende : SEE 211: 1-3 KAM NEBUSI AKU TUHAN

1)   Kam nebusi aku Tuhan, Kam si mpeteneng tendiku

      Tendi si ndube tertaban, tegundu kuadepenNdu

      Malem kal ateku Bapa, ban keleng ateNdu

      Kupuji gelarNdu Bapa, mulia gelarNdu

      Tegundulah aku Tuhan ibas pusuhku Kam ringan

      petetapNdu aku Tuhan, lah dosa talu me kuban.

2)   Kam ngelemi aku Tuhan, Kam si mpepalem pusuhku

      Pusuh si megati nogan, mbaru perbahan kelengNdu

      Malem kal ateku Bapa, ban keleng ateNdu

      Kupuji gelarNdu Bapa, mulia gelarNdu

      Tegundulah aku Tuhan ibas pusuhku Kam ringan

      petetapNdu aku Tuhan, lah dosa talu me kuban.

3)   Kam ngaloken aku Tuhan, Kam si mpekena ukurku

      Ukur si nimbak Kam TUhan, alokenNdu ibas tanNdu

      Malem kal ateku Bapa, ban keleng ateNdu

      Kupuji gelarNdu Bapa, mulia gelarNdu

      Tegundulah aku Tuhan ibas pusuhku Kam ringan

      petetapNdu aku Tuhan, lah dosa talu me kuban.

10.  Persembahen Pujin Koor/VG

11.  Nagani lilin rende KEE 135: 1-3 BERNGI E NGGO KEPE (Perp. Tedis)

1)   Berngi e nggo kepe, Yesus reh ku doni e

      Nusurlah ngangkut dosanta mekin

      Jadilah musillah sangap pagin

      Asa si tek Tuhan e, asa si tek Tuhan e.

2)   Anak e bujur pe, si ngena me aku e

      KinulinNdu tadingken kam kap

      Bengket ku doni lah trang si gelap

      Aku daramenNdu e, Aku daramenNdu e

3)   Berngi e nggo kepe, Tuhan reh ku doni e

      Padan Dibata teridah tetap

      KinikelengenNa banta me kap

      Tuhan si puji gelah, Tuhan si puji gelah.

12.  Kotbah: Masmur 37: 1-9                                                                        (Perp. Kundul)

13.  Pengakun kiniteken                                                                                (Perp. Tedis)

14.  Persembahen Pujin Koor/VG                                                                (Perp. Kundul)

15.  Nehken persembahen pengataken buju (100% man pensiunen GBKP)

L    :  Kata Dibata si jadi palas man banta ibas nehken persembahen pengataken bujurtaibuat ibas 2 Korinti 8: 7, nina:  Kam sampur kap ibas kai pe

P    :  Ibas kiniteken, ibas pengerana, ibas pemeteh, ibas ketutusen, ibas kai-kai pe.

L    :  Bagepe ibas keleng atendu nangdangi kami.

P    :  Emaka sampur ka lah kam ibas dahin keleng ate enda.

Rende KEE 136: 1-3 KAM KRINA SI TEK

1)   Kam krina si tek, mari surak janah puji

      Pedas min kerina ku Betlehem

      Nehenlah anak tubuh man Tuahta

      Mari kita nembah, 3x

      Man Raja

2)   O Raja mulia, si njujurken krina

      La mela Kam tunduh ibasampun

      Kam me Dibata mula-mula nari

      Mari kita nembah, 3x

      Man Raja

3)   Kam krina malekat, pujilah man Tuhan

      Ersurak-ersurak man baNalah

      Puji Dibata i Surga i doni

      Mari kita nembah, 3x

      Man Raja

16.  Persembahen Pujian: Koor/VG

17.  Pertoton Syafaat

18.  Responsoria Tekad Natal                                                                       (Perp. Tedis)

L    :  Malem me ate kalak si la megiken pedah kalak jahat. Si la ermengga ate nangdangi si la bujur. Si ngayaki kiniseraan arah kebayaken ras kesenangen si lalit tinutuna.

P    :  Kebayakenku lit ibas penandaiku nangdangi Dibata.

L    : Malem me ate kalak si la erteman ras kalak megombang man Dibata. Si pangen erdiskusi sitahanen kerna politik ras kebijaken pemerintah, tapi labo ia nggit pekena-kena muat bagin ibas pekena-kena doni enda

P    :  Kepentarenku lit ibas beluhna aku ngukurken tanggung jawabku nangdangi ndeharangku, anak-anakku, gereja bagepe doni enda.

L    :  Ia desken batang kayu si turah i tepi lau anak, erbuah ibas paksana, dingen bulungna pe la melus. Sangap ia ibas kerina pendahinna.

P    :  Ermengkah ateku TUhan, erburak keriahen ibas pusuhku, ibas kerina undang-undangNdu si ngulihken aku ku bas kegeluhen. Kubaba pedahNdu jadi lilin si nerangi kerina perdalanku i doni enda.  Amin

19.  Rende: PEE 64: 1-3 KUIKUTKEN KAM O TUHAN

1)   Kuikutken Kam o Tuhan, Kam kap Si perkeleng e

      Sabab Kam si mere dalan, dalan terkelin kepe

      Ia kapen juru slamat, Ia kapen penampat.

      kataNa me kapen tambar, kuasaNa la ersibar.

2)   Tuhan kapen kuarapken, jadi Temanku nggeluh

      Tetap Ia penalemen, kinitekenku nteguh.

      Ia kapen juru slamat, Ia kapen penampat.

      kataNa me kapen tambar, kuasaNa la ersibar.

3)   Aku jadi si permenang, Yesus kap menangkenca

      Pusuhku dame ras senang, Tuhan ka psi mrekenca

      Ia kapen juru slamat, Ia kapen penampat.

      kataNa me kapen tambar, kuasaNa la ersibar.

20.  Pertoton Tuhan

21.  Pemasu-masun

L    :  Mulihlah alu dame, babalah terang natal enda, jenari sehkenlah berita e ku tampuk doni, janah alokenlah pasu-pasu idur Dibata nari:  Ipasu-pasu janah ikawali Dibata kam (kita) siang ayo Dibata ersinalsal i babondu, janah melias ateNa ngenehen kam, itatap Dibata ku kam janah malem atendu ibahanNa. Amin

P    :  Amin... amin... amin 

Varia Natal