Kisah RUT Bahan Alkitab : RUT 1:1-22

Sermon bahan Khotbah KA/KR tanggal 13 Desember 2015

Thema  : Kisah RUT

Bahan Alkitab    :  RUT 1:1-22

                Cerita enda nuriken eme keluarga Elimelek sipindah lawes nadingken Betlehem propinsi Juda ku negeri Moab erkiteken ibas paksa e i taneh Israel jadi kelihen simesangat.  Elimelek ras ndeharana si Naomi bagepe anakna dua kalak eme Mahlon ras Kilyon pindah ku negeri Moab bagi kalak pertandang, atena gelah banci ndalani kegeluhen si lebih baik (perban i Betlehem sagana kena bencana  kelihen). Kenca mate Elimelek, tading Naomi ras anakna si dua ndai . Duana anakna enda erjabu buat beru Moab, eme Orpa ras Rut. Emaka mulai jenari Orpa ras Rut erlajar nandai Dibata bangsa Israel sebab bangsa Moab eme bangsa sinembah man berhala.

                Kenca kira-kira sepuluh tahun dekahna ia ringan i jah mate ka Mahlon bagepe Kilyon. Emaka Naoni nari tading sisada ras dua permainna eme Orpa ras Rut si enggo mbalu bagi ia. Bagem idalani Naomi kegeluhenna ras permainna duana i negeri Moab selaku pertandang. Piga-piga dekah kenca sie ibegi Naomi berita maka Tuhan enggo masu-masu bangsaNa alu peranin si mbuah, emaka ersikap-sikap Naomi ras  Permainna duana nadingken negeri Moab. Kenca bage berkat ia ras duana permainna ku Juda. Tapi itengah dalan  alu dem pengertian  Naomi man Permainna ngidah keberadaanna si enggo mbalu dingen metua janah mesera, maka iatawarkenna  gelah permainna e mulih ku jabu orangtuana, ngidah ngidah permainna e duana nguda denga janah lenga lit anakna, adi mulihken ia man orangtuana ras bangsana banci denga ia erjabu membentuk rumah tangga, janah isadari Naomi maka kadenape lanai lit, hartana bagepe adi seh kenca pe ia i Betlehem maka ia pe harus berjuang mulihi dari  nol perbahan rumah, tanah ras kebayaken si imiliki Naomi masa sie enggo lanai lit. Janahna pe Naomi peangkaken man permainna maka adi atena ikut ras ia maka ibas ia duana (permainna) ituntut pengorbanen. Ia duana harus siap labo saja erdalan ngikut salib Kristus, tapi pe harus siap memikul salibna ras menyangkal diri.

                Pertama Naomi ngataken man permainna duana gelah mulih ku bangsana ras orang tuana, duana permainna si Orpa ras Rut ngataken : “Lang, bibi ! ate kami ikut ras kam ndahi bangsandu.”, tapi kenca enggo iberitaken Naomi ka keberadaanna ras uga serana bagepe  suina adi ras ia, emaka permainna si Orpa ibuatna pilihen eme nadingken bibina janah mulih ia ku orangtuana ras bangsana, tapi Rut lang alu ngataken man binina : Ola suruhndu aku nadingken kam bibi ! raslah kita berkat. Kuja kam lawes, kuje aku, i ja kam ringan i je aku ringan. Bangsandu jadi bangsaku, janah Dibatandu jadi Dibatangku. I ja gia kam mate, I je pe aku mate, janah I je me aku ikuburken, Ersumpah aku maka Tuhan si ngukum aku alu kiniseraan si mberat adi kusirangken kam, pala kematen si nirangken kita duana.

                Adi sinen pengakuan Orpa ras Rut situhuna mulana ia duana ikut atena ras Naomi tapi ibas penjelasen/percakapen Naomi i tengah dalan man permainna duana, dungna maka Orpa muat keputusen ia mulih ku orangtuana ras bangsana, tapi Rut tetap setia ia man bibina. Orpa mulai memikirken masa depanna/karierna, ras membangun rumah tangga. Orpa memilih periorits ibas geluhna eme karna masa depanna terbayang ia karna kesusahen iba bibina, torah aru ate (kekawatiran) ibas geluhna emaka itadingkenna bibina, enda ilakukenna perbahan sijadi perioritas ibas ia eme karierna (membangun rumah tangga) labo ndahiken kerajaan Dibata ras kebenarenna jadi perioritas pertama, aminna pe sedekah ia ras keluarga bibina enggo nge ibegi-begina janah ipelajarina karna Dibata. Berbeda ras Rut, Rut la ia nggit nadingken bibina tapi tetap ngikutken ia, ituduhkenna kekelengen situhu-tuhu man bibina (la memikirken masa depan pribadina saja) , man Rut ngikut Tuhan eme hal si pertama ras utama, emaka hal-hal sideban. Enda idah arah jawabenna man Naomi :” ola suruhndu aku nadingken kam bibi……. Janah Dibatandu jadi Dibatangku….(ayat 16-17)”. Rut tetap ukur ngikutken bibina ku Betlehem aminna pe kiniseraan situriken bibina man Orpa bagepe Rut.  Alu jawaben Rut iteh Naomi maka Rut ngikut ia labo hanya pertimbangen emosional eme sekedar nemani Naomi ras pe sekedar taat ras sopan santun man orangtua. Penandai Rut man Dibata si idatna ibas jabu bibina labo penandai bage bage saja, tapi penandaina karna Dibata e mereken pengangkaan man bana ise Dibata e janah uga kuasa ras kemuliaanNa bagepe kekelengenNa, enda kerina enggo merobah pola pikir ras perbahanenna (bdk 1 Johanes 4:7-8). Eme sebabna turah kekelengen si mbages man Tuhan Dibata, janah kekelengenna e membias (memancar) ibas kekelengenna man simetuana (Naomi). Penandai Rut man Dibata ras kekelengenna man Dibata, mbabai ia guna ngkelengi, mengikut, ras pe siap melayani simetuana (Naomi). Bage pengakun Rut man Naomi :”…pala kematenkin si nirangken kita duana”  Rut 1:17).

                Kekelengen siicidahken Rut  banci sinen :

1.       “Aku la nadingken kam “.. (ola suruhndu aku nadingken kam). :  Enda nuduhken kekelengen e berarti enggeluh ras ia (tinggal bersama dia) labo hanya fisik tapi mental ras kinitekenna pe. Enda  maksudna kita banci mengerti kai siirasaken, ipikirkrn, ras siibiarken temanta. Radu ras ia ndarami dalan keluar ibas persoalan nggeluh . Rut engkelengi Naomi , eme sebabna la ia nggit nadingken simetuana si enggo metua, ija geluha simetuana pe tambah beratna.

2.       Raslah kita berkat, kuja kam lawes kuje aku ( ikut kujapa pe siikelengina e , Rut tetap ngikutken bibina Naomi aminna pe kiniseraan-kiniseraan ialamina ibas perdalanen bagepe pertama-tama she kenca ia i Betlehem).

3.       Ngelakoken kaipe simehuli guna kebahagiaan sinikelengina.  Enda ituduhken Rut alu erdahin ia ngemo-ngemo i juma kalak (mumahi ruhi gandum sitading ibahan kalak si rani). La ia mela erdahin mumahi ruhi gandum sitading ibahan kalak janah la itimaina ia isuruh simetuana ataupe itimaina simetuana muat nakan ia duana.

4.       Kekelengen e nggit mereken bimbingen ras pertolongen man si ikelengi (teman).  Ibas 1 Korinti 13:4 ikataken : Kalak si erkeleng ate, ia harus megenggeng, mehuli, la percian, la meganjang ukur, la sombong. Enda icidahken Rut man bibina  ija ipekena kenana bibina she maka ia erdahin ku juma kalak. Rut erdahin guna kebutuhen ia ras bibina tapi labo pernah ia sombong nandangi simetuana.

5.       Nghamati kalak si ikelengi (teman). Rut tetap encidahken kehamaten man simetuana aminna pe simetuana e enggo metua, janah lanai lit kinibawakenna si banci iharapken (Bdk Rut 1:11-13), tapi ia si erdahin ngemo ku juma kalak si rate mekuah janah labo ipandangina bibina ras ipindokenna ras erdahin tapi, ia erdahin janah ibegikenna kai si ikataken bibina Naomi.

6.       Nggit mbagiken keriahen (sukacita) man siikelengi (teman).  Enda icidahken Rut ija kenca ia mulih erdahin iberitkenna man Naomi simetuana keriahen sigejapkenna, iturikenna penemani Dibata sinuduhkenca erdahin i juma kalak si rate mekuah , janah jumpa ras sierdahin ije kerina bersahabat janah ia pe iundang man ras ia kerina. Janah Rut ncidahken kerina hasil dahinna man simetuana, labo lit siibunikenna (labo bagi Ananias ras Safira).  Janah kenca ia erjabu ras Boas pe labo itadingkenna bibina tapi tetap ia ras tading I rumahna.

Kesimpulen.

1.       Kesulitan timbul eme perbahan ibas perbahanen ras perukuren nadingken Tuhan Dibata. Ija teridah maka ibas paksa sie sanga pemerintahen hakim-hakim, bangsa Israel perbahanenna lanai memuliaken Tuhan emaka terjadi kelihen I negerina.

2.       Penandaita nandagi Tuhan Dibata alu payo dingen tutus nggit ngikutkenca merobah pola hidup ras pikirenta she maka tetap teridah enggeluh sikeleng-kelengen, sabab kekelengen erehna ibas Dibata nari, kalak si erkeleng ate, anak Dibata kap ia janah itandaina Dibata. (1 Joh 4:7)

3.       Tuhan Dibata banci makeken kalaksideban (bansa sideban) guna nehken kekelengen, contohna Rut eme bangsa Moab, ipakena guna encidahken kekelengen man Rut. ( emaka tetaplah sikeleng-kelengen man kerinana)

4.       Ketutusen man Dibata teridah arah hubungenta man temanta manusia.

5.       Ibas perdalanan geluhta melala cobaan ras tantangen bagepe bujuken si banci erbahan kita beralih nadingken Tuhan, emaka metenget kita gelag tetaplah Tuhan e jadi siutama ibas geluhta , la bagi si orpa itengah dalan arah pikirenna ras keberadaan geluh siituriken bibina Naomi, dungna itadingkenna bibina mulih ia ku orang tuana ras bangsana eme bangsa Moab

 Bahan Sermon KA/KR kebaktian tgl 25 Desember 2015

Bahan Alkitab    : Lukas 2:8-20.

Natal eme berita keriahen man kerina manusia. Wari ketubuhen Tuhan Yesus Kristus eme Juruslamat ku doni enda guna menyelamatken kerina manusia ibas kuasa dosa nari .Bagi enggo I nubuatken Nabi nabi. Ibas Yesaya 9:6 : “ Sekalak anak enggo tubuh man banta, anak Dilaki ibereken  banta, Ia me pagi jadi peminpinta. Ia igelari “Penampat simeganjangna”, “Dibata simada Kuasa”, “Bapa si Rasa Lalap”, “Raja Dame.”

Arah  ogenta Lukas 2:8-20 ituriken    peristiwa karna Ketubuhen Yesus e sebage peristiwa global, simelibatken kerina lapisan masyarakat si berdampak bagi seluruh doni. I samping tokoh tokoh dunia (Luk 2:1,2), rakyat biasa (Permakan), ras para Malaikat. Emaka Berita Keselamaten e , eme Ketubuhen Tuhan Yesus Kristus ku doni enda maba keriahen man kerina manusia.

1.       Ayat 8-9  : Berita karna ketubuhen Yesus e i peseh Malekat Tuhan man Permakan sangana ngiani asuh-asuhen i mbal-mbal. Berita e labo ipeseh man kalak si erpangkat entah pe si mehaga dingen bayak, tapi man permakan si ianggap rendah ibas tradisi kalak Jahudi ibas paksa sie.

Adi sibandingken ibas paksa genduari melala megahen iakap  berhubungen man kalak simehaga/ erpangkat asangken kalak sisederhana seh maka melala arah sikap hidup sibage kalak si mesera/susah, kurang nggejapken sikap solidaritas ibas kalak si iakapna mehaga. Adi bage si berkembang enda banci menimbulkan kesenjangan social (jurang pemisah) antara sesame manusia. Contohna umpamana “ megahen akap ngalo-ngalo kade kade si bayak asangken si mesera geluhna ibas lakon-lakon entah sidebanna.

2.       : Malekat Tuhan mereken ketetapen ukur man permakan i mbal – mbal alu ngataken : “Ola mbiar ... enda teridah maka ipetetap Malekat Tuhan ukur permakan si mbiar/sengget ibas kerehen malekat e man bana, janah ibereken berita si meriah si mereken keriahen si mbelin man kerina manusia. Tambah sie teridah ka enterem Malaikat Surga tedis ras Malaikat si ndai dingen rende muji Dibata: “Terpujilah Dibata i bas Surga si meganjangna, janah dame I doni man manusia si ngena ateNa. Tuhu tuhu berita e eme berita keriahen she maka tetap kel ukur permakan mis berkat guna ngenehen Yesus e.

Arah e siidah maka kita pe jadilah si mpetetap ukur kalak si mbiar/susah, she maka ia pe ndatken keriahen/kemalemen ate ibas perkuah ate Tuhan.

3.       Ayat 11-14 :  Yesus Tubuh i kuta Daud, ….ibaluti alu uis, medem ibas pelangkah ,  nuduhken maka tuhu tuhu sederhana kel ibas ketubuhen Yesus Kristus ku doni enda, padahal ia me " Anak Dibata” sidem alu kuasa dingen kemuliaan.  

Enda pe sada hal si patut silakoken ibas geluhta eme ndalani kegeluhen enda alu sederhana (merakyat/ ersolidaritas) labo encidahken kemewahen kemewahen si banci menimbulken kecemburuan social maka kita pe banci teraloken kerina kalak janah arah silit ibas kita e pe banci teridah kemuliaan Dibata, seh maka kita pe ngataken “terpujilah Tuhan ibas ingan simeganjangna”. 

4.       Ayat 15-20 .Sikap Permakan  ibas ngaloken berita e, mis ia berkat alu pedas-pedas seh maka idapetina  Maria ras  Jusuf  dingen idahna pe Yesus medem ibas pelangkah. Kenca bage iturikenna pe man kalak sideban, seh maka ibas perdalanenna mulih rende muji –muji Tuhan ia sebab enggo idahna payo bagi siikataken Malaikat Tuhan man bana. Enda

Emaka kita pe  ibas enggo sibegi kata Dibata she man banta mislah silakoken lanai tertaren-taren, emaka sidat me kemalemen ate , emaka kita pe ibas kita enggo enggejabken kemalemen ate siturikenka man kalak sideban gelah ia pe ngaloken kemalemen ate ka ibas Tuhan (solidaritas sesame manusia guna encidahken kemuliaan Tuhan).

I.           Penutup/ Aplikasi

Natal maba keriahen man kerina manusia, she maka kerina manusia si tek baNa ndatken keselamaten situhu-tuhu (Yoh 3:16). Emaka kita kerina si enggo ngaloken keriahen e, si cidahkenlah ibas geluhta man kalak sideban she maka jadi berita simehuli entah pe berita simeriah man bana. Ibas kita mbegi kata Dibata ula nari kita tertaren-taren guna ndalankenca tapi mislah sidalanken she maka sidat keriahen, bagi permakan ndai jumpa ia ras Maria , Jusuf bagepe bayi Yesus