LITURGI KEBAKTIN NATAL PJJ TAHUN 2015

LITURGI KEBAKTIN NATAL PJJ

TAHUN 2015

 

Thema         :  “Tetap Lit Ingan Man Yesus e Ibas Jabungku” (bnd. Lukas 2 : 1 - 7)

Sub Tema    :  Ketubuhen Tuhan Yesus mpeturah komitmen kinitken jabu guna nggeluh ibas kekelengen ras si ngena ate Tuhan itengah--tengah perpulungen ras masyarakat

                      Persiapan

1.      Rende : PEE No. 27 : 1, 2

Si endeken ‘nde’nden si meriah,

Man Tuhanta si ‘nggo tubuh bas pelangkah.

Sabab patut nge k’rina kita nembah

Ban babaNa terang ngaruh ras pe tuah.

Reff.  Dage mari kita kerina, ‘lah si puji gelar Dibata

Ula nai ukur erbera, Tuhan Yesus me kap Rajanta

Tuhan Yesus metunggung dat pujin

Perban Ia si ngajari kita kin

Kek’lengenNa la erkeri-kerin

Adi pakelah pedahNa seh pagin. Reff.

2.      Kata Penaruh Ku bas Kebaktin Natal

Mejuah-juah man banta kerina !

Selamat Natal.

Senina ras turang kekelengen Tuhan Yesus Kristus.

Meriah ukurta janah terpujilah Tuhan sebab erkiteken lias ateNa si mbelin man banta enggo sidalani kegeluhen jabu-jabu nta ibas erbage-bage keadaan. Bage pe enggo ka si dalani kegiaten-kegiaten ibas Perpulungen Jabu-jabu nta enda, ibas kiniersadan arih kerina ngawan ni perpulungen ras anak-anakta bage pe serayan Tuhan rikut pe ras Pengurus PJJ nta. Ngaku pe kita maka mbue denga nge kekurangen-kekurangenta ibas ndalanken tritugas gereja nta, eme ibas bagin Persadan, Kesaksin bage pe Pelayanen. Emaka, lako kita ngataken bujur man Tuhan ibas kerina keriahennta e, pulung kita arah kegiaten Natal ta maka ketubuhen Tuhan Jesus e tetap njemba kita lako mpehuli kerina perdalanen dahinta tahun 2016 si nandangi si aloken me. Mari ras kita ertoto maka dahinta enda erdalan alu mehuli seh ku kedungenna kari. Ertoto kita ….. 

3.      Rende : KEE No. 114 : 1 – 2                                                 - Perp. Tedis

Sendah jumpa kita wari raya e, peringeten tubuh Tuhan Yesus e

Nusur ndahi kita manusia e, keriahen kap e.

Ermulia me Tuhannta, e sipuji me gelarNa

Perdamen ib’re Dibata Tuhan Yesus kap e..........

Mari kita ku Kuta Belthem e,

Muji nembah man Tuhanta Yesus e,

E tinenges Tuhan si perkuah e, Dibata Bapa e.

Ermulia me Tuhannta, e sipuji me gelarNa

Perdamen ib’re Dibata Tuhan Yesus kap e..........

                      Kebaktin

1.        Votum : Kebaktin Natal Perpulungen Jabu-jabu nta enda ibenaken ibas gelar Dibata Bapa, si erkeleng ate man doni enda, ibas gelar AnakNa Yesus kristus, si mpeteruk baNa jadi seri ras manusia, ras ibas gelar Kesah si Badia, si mereken keriahen si tuhu-tuhu seh rasa lalap

2.        Salam    : Perkuah ate ras dame ibas Dibata Bapa, ras ibas Tuhan Yesus Kristus nari, ibas kerembaken Kesah si Badia ras kita (kam) kerina gelah. Gloria

Perp.      : Glooooooria Muliaken Tuhan, Glooooooria Muliaken Tuhan (KEE No. 193)

3.      Berita Kerna Sura-sura Dibata ras Perbahanen Dibata

Kata e enggo jadi manusia, janah IA ringan i tengah-tengahta. Enggo idah kami kemulianNa si mbelin, e me kemulian si ibereken Dibata man baNa erkiteken IA Anak Dibata si Tonggal. Anak e encidahken lias ate ras kai si benar kerna Bapa e. (Johanes 1:14)

4.      Rende : KEE. 115 : 1 – 3

Keriahen si Mbelinna, si kuberitaken e

Enggo tubuh si Permakan, eme Tuhan Yesus e

Pujilah min Dibata nta, ras dame dame dame man banta

Dibata nta si Perkuah ate, man kita jelma e.

Ibas berngi enda terang, bintang si mehel-mehel e

T’rangna seh ku perukuren, si lanai erlayas pe

Pujilah min Dibata nta, ras dame dame dame man banta

Dibata nta si Perkuah ate, man kita jelma e.

Tuhan Yesus persadanta, em isuruh Bapa e

Si nasapken k’rina dosa, ibas Golgota kepe

Pujilah min Dibata nta, ras dame dame dame man banta

Dibata nta si Perkuah ate, man kita jelma e.

5.      Perenungen kerna Berita Natal :     

Marilah si begiken perenungen kerna berita Natal eme ketubuhen Tuhan Yesus Kristus bagi si tersurat ibas Titus 2 : 11 – 14 alu responsoria :

Lit.        : Sabap enggo ipetangkas Dibata lias ateNa guna keselamaten kerina manusia.

Perp.     :  Rende KEE No. 138 : 1

Yesus Kam medem ibas nggala e,

Raja mulia si bujur e

Kam si mekuah so ek kalak e,

bengket pusuhku ringan ije

Bengket pusuhku ringan ije

Lit.        :  Lias ateNa e ngajari kita nadingken kegeluhen si la ngena Dibata ras sura-sura doni, gelah nggeluh kita ngkuasai dirinta, bujur dingen si sembah Dibata alu kegeluhenta i doni enda.

Perp.     : Rende KEE No. 18 : 2

Yesus inganNdu pelangkah kepe,

Raja Mulia si bujur e

Si ngena ate so tek aku pe,

bengket pusuhku ringan ije

Bengket pusuhku ringan ije

Lit.        : Genduari kita paksa nimai Wari kemalemen ate si iarapken kita e me kerehen sinalsal Dibatanta si Mbelin ras si Engkelini kita Jesus Kristus

Perp.     : Rende KEE No. 18 : 3

Yesus, Kam ringan i karang kepe,

Raja Mulia kupuji e

Kam si mekuah oh, nusur ka pe.

Bengket pusuhku, Kam lalap je

Bengket pusuhku, Kam lalap je..

Lit.        : Enggo iendeskenNa diriNa guna kita, lako nebusi kita i bas kerina si jahat nari, jenari ibahanNa kita jadi sikerajangenNa, jadi bangsa si bersih, si mesikel erbahan mehuli.

Kerina   :  Bujur Tuhan ibas kekelengenNdu nandangi kami kerina, Amin

6.      Puji-pujin Man Tuhan :

7.      Rende : PEE 29 : 1 – 3

E me kap wari si mbelin, i b’re Dibata banta kin

AnakNa reh ku doni e, si inget min kelengNa e

Tersinget kap enggo ndekah, Tuhannta nusur me gelah

Pertibi enda la bene, e tek me kita Ia pe

Pujin si reh ku doni e, ende-endenta baNa pe

Gelah me salih kita min, ‘nggo jadi anak Tuhan kin

8.      Padan Dibata Man Kalak Si ngaloken Yesus

Marilah sibegiken Padan Dibata man kalak si ngaloken Tuhan Yesus ibas geluna :

Liturgis             :  Nehen kuga kelengna ate Bapa man banta .....

Mamre              :  Bagem maka keleng ate kami man Moria ibas jabu kami

Moria                : Kami pe erkeleng ate man Mamre ibas jabu kami

Anak2               :  Bujur Tuhan, keleng ate Nande ras Bapa man kami mpegegehi kami ibas kerina sura-sura kami …

Liturgis             :  Bage belinna kekelengenNa man banta seh maka kita igelari anak-anak Dibata. Janah labo gelar saja, tapi tuhu-tuhu me kita anak Dibata.

Pengurus PJJ    :  Anak-anakNdu kap kami kerina Tuhan, anak-anakNdu ka nge si man layanen kami kerina ....

Mamre              : Bujur Tuhan, kekelengenNdu njemba kami lako tetap engkelengi Moria ibas jabu kami rikut pe ras anak-anak kami

Moria                : Bujur Tuhan, kekelengenNdu njemba kami lako tetap engkelengi Mamre ibas jabu kami rikut pe ras anak-anak kami

Anak2               : Bujur Tuhan, janah sikeleng-kelengen nge ate kami kerina selaku anak-anakNdu

Liturgis             : Enda me sebabna maka doni si jahat enda la nandai kita, sebab doni la nandai Dibata. O kam si Kukelengi, kita enda genduari anak-anak Dibata, tapi kuga kita pagi, lenga ipetangkas man banta.

Kerina               :  Tapi si eteh maka kenca pagi reh Kristus, bali me kita ras IA, sabab si idah me Ia bagi situhu-tuhuna, Amin

9.      Puji-pujin Man Tuhan :

10.  Rende : Nagani Lilin Natal

Lilin Natal melambangken kerna diri Tuhan Yesus sendiri sebagai Terang Ibas kegeluhennta. Tuhan Yesus reh guna nerangi kegeluhennta, perukurenta, perbahanennta si gelap e maka kerina banci ipelimbarui jadi mehuli. Alu nagani Lilin enda bage pe ibas kita kari ngendeken ende-endenta, jadi tekatta lako mere dirinta guna ipelimbarui Tuhan, janah kita pe tetap jadi imam ibas jabu si mabai terang guna kiniulin jabu-jabunta.

Si nagani lilin eme : Pengkhotbah, Panitia Natal, BP Runggun, Mewakili Serayan Tuhan, Mewakili Lansia, Mewakili Jabu La Kuh, BP Kategorial PJJ, Pengurus PJJ/Sektor/Terpuk.  

11.  Renungen Natal : Lukas 2 : 1 - 7

12.  Pengakun Kiniteken

13.  Puji-pujin Man Tuhan

14.  Persembahen Pengataken Bujur :

Genduari ibereken kesempaten man banta ersikap guna nehken persembahen pengataken bujurta si mehulina man Dibata erkiteken erbage-bage pemereNa si mehuli enggo seh ku bas jabu-jabu nta. Kerna pengataken bujur sibegiken Kata Dibata ibas Pustaka si Badia :

E maka bengket ia ku bas idahna Anak ndai ras Maria, nandeNa. Jenari erjimpuh ia nembah man Anak e. Ibuatna erta-erta si ibabana e, jenari ipersembahkenna man Anak si mbaru tubuh e. Erta-erta si ipersembahkenna e, e me: emas, kumenen ras mur (Matius 2 : 11)

Rende    : KEE no. 136 : 1 –

1.             Kam k’rina sitek, Mari surak janah puji

Pedas min kerina ku betlehem, Nehenlah Anak

Tubuh Man TuhanTa

                      Mari kita nembah, Mari kita Nembah,

                      Mari kita nembah man Raja

2.             O Raja Mulia, Si njujurken k’rina

                      La mela Kam rubuh ibas ampun

                      Kam me Dibata mula-mula nari

                      Mari kita nembah, mari kita nembah,

                      mari kita nembah man Raja

3.             Kam k’rina malekat, pujilah man Tuhan

Ersurak, ersurak man baNa lah

Puji Dibata i surga, i doni

Mari kita nembah, mari kita nembah,

mari kita nembah man Raja

 Doa Persembahen + Doa Syafaat : Topik Doa :

1)            Persembahen Natal 100% guna Dana Pensiunen GBKP

2)            Kerina Ngawan ni perpulungen ras serayan Tuhan

3)            Kerina Jabu La kuh ras Lansia

4)            Kerina anak-anak ta ibas PJJ

5)            Si turah ibas perpulungen

6)            Kerna PILKADA Serentak 2015

7)            Bangsa ras negaranta Indonesia

15.  Perpadanen ras Dibata

Liturgis   :    Senina-senina ras turang, enggo tangkas man banta kuga belinna lias ate Dibata man jabu-jabu nta. Adi bagenda kin kelengna ate Dibata man jabunta, kita rutang sikeleng-kelengen sapih-sapih kita.

Perp.       :    Rende KEE 172 : 4

Keleng ateNa nggo nusur, man banta kerina

Kusehken man baNa bujur, mbelin pemereNa

Bas berngi IA tubuh, gelap mesuni ka

Pusuhta kap daramenNa alokenlah IA

Liturgis   :    O senina-senina ras turang kerina. Enggo tangkas man jabu-jabunta kuga belinna lias ate Dibata man jabunta. Tuhu kin keleng atendu man Dibata?

Perp.       :    Rende KEE 172 : 4

Keleng ateNa nggo nusur, man banta kerina

Kusehken man baNa bujur, mbelin pemereNa

Bas berngi IA tubuh, gelap mesuni ka

Pusuhta kap daramenNa alokenlah IA

Liturgis   :    O kam si kukelengi, adi bagenda kin kelengna ate Dibata man jabunta, kita rutang sikeleng-kelengen sapih-sapih kita. 

Perp.       :    Rende KEE 172 : 4

Keleng ateNa nggo nusur, man banta kerina

Kusehken man baNa bujur, mbelin pemereNa

Bas berngi IA tubuh, gelap mesuni ka

Pusuhta kap daramenNa alokenlah IA

Liturgis   :    Kita engkelengi sabab leben IA ngkelengi. Adi lit kalak si ngatakenca maka keleng atena Dibata, tapi nembeh atena man seninana, kalak si bage perbual. Sabab kalak si la ngkelengi seninana siidahna, labo tuhu ia ngkelengi Dibata si la idahna. Enda me perentah si enggo sialoken ibas Kristus nari. Ise si ngkelengi Dibata, arus maka ikelengina pe seninana.

Perp.       :    Rende KEE 172 : 4

Keleng ateNa nggo nusur, man banta kerina

Kusehken man baNa bujur, mbelin pemereNa

Bas berngi IA tubuh, gelap mesuni ka

Pusuhta kap daramenNa alokenlah IA

Liturgis    :    Rikutken perenungen Natal PJJ nta tahun enda, marilah si belasken padanta man Tuhan Dibata maka ibas jabu nta e lit kap ingan nandangi keleng ate Tuhan e janah keleng ateNa e njemba kita lako tetap sikeleng-kelengen pe

Kerina      :    Endesken kami geluh kami ras jabu kami ku bas lias ras keleng ateNdu Tuhan maka kami ras seisi jabu kami ndatken keterkelinen ibas kam nari, Amin.

16.  Pertoton Tuhan (alu ngendeken PEE No. 40)

Bapa kami sini surga, g’larNdu pebadia min

Rehlah min KinirajanNdu, seh lah min bagi p’ratenNdu

I doni enda bagi ni Surga

B’reken kami nakan cukup, bas wari si sendah enda

AlemiNdu salah kami, bagi nialemi kami

Salah kalak si lit man kami

Ola min kami, ibaba Kam ku bas percuban.

Tapi olangi lah kami, idur si ilat nari

Kam kap si mada, Kinirajan bage pe kuasa

Ras kemulian si ndekah-ndekahna

Amin ....

17.  Pemasu-masun

Mulihlah alu dame ras mejuah-juah, bahanlah dame Natal ibas berngi enda mereken ketetapen ukur ibas kam kerina guna nggeluh ibas kekelengen janah alokenlan pasu-pasu ibas Dibata nari :

Liturgis    :    “Enggo isehken Dibata padanNa man bandu, maka malem atendu sabab enggo tangkas idahndu alu  matandu jine penampat reh na ibas Dibata nari, Amin.

Perp.        :    Amin..... Amin ... Amin

Cataten : Kundul ntah tedis iaturken sue ras ingan pulung

Varia Natal