LITURGI KEBAKTIN NATAL MORIA TAHUN 2015

LITURGI KEBAKTIN NATAL MORIA

TAHUN 2015

 

Thema          : “Dalanken Kebujuren, Dame ras Ketenengen Jadi Sikerajangenna”

                        (bnd. Lukas 2:14b)

Sub Tema     :  Natal mpersingeti kita kerna kecibal geluh paksa enda, alu bage rusaha ndalanken si mehuli guna kegeluhen doni tinepa Dibata.

                     Persikapen

1.      Rende PEE 101:1-2

1)   Pulung m’riah kal kami kerina Jumpa I bas rumah si Badia,

     Reh min Kam, o Bapa si Mulia, G’lah kerina Badia jadina

                 Reff :   Sal-sal i pusuh kami, Layasi ukur kami,

                             Pengarapen reh teguhna, Kiniteken reh paguh na

2)   Wari ras berngi nggo ibentasi Keleng ateNdu tetap nemani

            I bas mberat Kam lalap nampati I bas susah kam si ngelayasi  Refr:

2.      Penjelasen Kerna Kebaktin Natal ras Ngaturken siikut ibas barisen Prosesi bagepe sinagani lilin Natal

3.      Ertoto

4.      Kata Penaruh Kubas Kebaktin

      Senina ras turang ibas kekelengen Yesus Kristus, wari enda bengket me kita kubas Natal Moria ibas tahun enda. Siinget uga kekelengen Dibata si nggit reh ku doni enda mpeteruk baNa jadi seri ras doni enda. Janah mulahi kita ibas kuasa dosa nari si rusur mabai kita ndauh sirang ras sura-sura Dibata ras la ngasup erdame nandangi sekelewetta. Emaka radu ras kita nggejapken kekelengen Dibata e ku tengah-tengah geluhta ras jabunta gelah kita pe ipengasup guna nehken kekelengen Dibata e. Sipesikap dage pusuhta gelah bengket kita kubas kebaktin enda, sialo-alo kerehen Juruselamat e.

5.      Rende SEE 215:1-3 (Perp. Tedis; Barisen Prosesi Bengket kubas ingan Kebaktin)

      1)   M’riah ukurta ibas wari sendah enda ban enggo tubuh Yesus Raja si Mulia

            Jurus’lamatta si nebusi dosanta, si jadi dalan rembak ras Dibata

                 Refr:  Iyah dage O teman sisikapkenlah min

                           InganNa bas pusuhta, sembah Ia dage

                           Marilah sipuji Tuhan si tubuh e

      2)   Kek’lengen Tuhan enggo reh ku doni enda Lias ateNa ernanam ibas pusuhta

            Alu kerehen anakNa cidahkenNa Kristus Tuhanta si njayami g’luhta           Refr:...

      3)   Ola min aru ola gulut p’rukurenta adina enggo reh Ia ku doni enda

            Ia kap ndube jadi pematang g’luhta masap me k’rina  keg’luten ukurta  Refr:...

                         Kebaktin

1.      Votum   :  Kebaktian Natal Moria enda ibenaken ibas gelar Dibata Bapa sierkeleng ate man doni enda, ibas gelar AnakNa Yesus Kristus simpeteruk baNa jadi seri ras manusia ras ibas gelar Kesah si Badia si mereken keriahen si tuhu-tuhu seh rasa lalap.

2.      Salam     :  Perkuah ate ras dame si rehna idur Dibata Bapa, AnakNa Yesus Kristus ras kerembaken Kesah si Badia ras kam (kita) kerina gelah. Amin.

3.      Introitus   :  “Tapi bahanlah maka keadilen erburak-burak desken lau sumbul, dingen kebujuren desken lau belin si la pernah kerah” (Amos 5:24)

4.      Rende SEE 151:1-3

1. O Kam Dibatangku kudarami dingen tedeh ateku

     Mesikel aku nandangi Kam desken taneh tenggiring si kerah

                 Refr:    Kupuji Kam kupuji Kam bas kegeluhenku

                             Kam si mulahi aku bas k’rina kinis’ran

2.  O Kam Dibatangku pelepas kuidah Kam i rumahNdu

     Maka kuidah kemulianNdu, kupuji Kam ateku bas g’luhku Refr: ....

3.  Kidekah umurku, aku reh ngatakrn bujur man baNdu

     Nare tanku erlebuh baNdu, alu ende-enden si meriah Refr: ....

5.      Koor/VG

6.      Pengakun Iadepen Dibata

L          :  Ngena ate Tuhan kebujuren dingen keadilen, keleng ateNa rasa lalap ndemi doni enda.

P          :  O Tuhan mekatep kami kurang nggejapken keleng ateNdu dingen kami kurang ndalanken kebujuren ras keadilen nandangi sapih-sapih kami manusia. Tuhan alemilah kami.

L + P   :  Rende SEE 182:1

               Tuhan alemi aku alemi dosa ras kesalahenku

               Bereken bangku pusuh simbaru gelah metunggung iadepenndu

L          :  Keadilen dingen kebujuren kap palas Kinirajan Tuhan, keleng ate dingen kesetian teridah ibas kerina perbahanenNa.

P          :  O Tuhan, mekuah min ateNdu kempak aku, sasapkenlah dosangku erkiteken perkuah ateNdu. Peridi kal min aku maka masap kejahatenku, urasi min aku maka masap dosangku. Ibas kesalahen kap tubuhku ndube, ibas bertin nari pe nggo aku ikuasai dosa. Ukur sipinter ras kebujuren nge si ipindoNdu, dage demilah pusuhku alu kepentarenNdu.

L + P   :  Rende SEE 182:5

               Tuhan alemi aku bas kesalahen kap tubuhku ndube

               Sasap dosangku urasi aku gelah atan bas kinirajanNdu

L          :  Dibata enggo ncidahken kekelengenNa man banta alu nuruh AnakNa si Tonggal ku doni enda, gelah kita nggeluh arah Ia.

P          :  Ngaku kami kerna kelepaken kami. Sampati kami Tuhan gelah kami nggeluh alu bujur sue ras peratenNdu.

Rende : KEE 172:1,3

                     1) Bas paksa berngi melenget Betlehem tunduh kam

                          La kin idahndu reh terang isalsalina kam

                          Nggo seh kap kutengahndu penampat Dibata

                          Penebus dosa manusia, Alokenlah Ia

                     3) Dage rehlah min O Tuhan, Aloken aku min

                          Dosangku masap gelah ban, ‘lah aku terkelin

                          Gelah aku tersampat bas dalin mesera

                          ‘Di ras Kam minter kugejap geluhku meherga

7.      Berita Pengalemi Dosa ras Perdamen ibas Dibata nari

L     :    Desken remang erpagi-pagi, dosandu nggo kulesapken, janah salahndu pe nggo kusasapken desken embun. Emaka mulihlah kempak Aku, sabap Aku kap Penebusndu.

P     :    Kubegiken ateku Kata Tuhan, sabap nggo ipadankenNa perdamen, man banta bangsa siikelengiNa, adi nggit kita nadingken dosa-dosanta.

L     :    Sekalak anak nggo tubuh man banta, anak dilaki ibereken banta. Ia me pagi jadi pemimpinta. Ia igelari: “Penampat si Meganjangna”. “Dibata si Mada Kuasa”. “Bapa si Rasa Lalap”. “Raja Dame”.

P     :    Terpujilah Dibata ibas surga si meganjangna. Janah dame i doni man manusia si ngena ateNa.

Rende KEE 115:1,3

              1)  Keriahen si mbelinna sikuberiaken e       

                   Enggo tubuh si Permakan eme Tuhan Yesus e

                   Pujilah min Dibatanta ras dame dame dame man banta

                   Dibatanta si erkuah ate man kita jelma e

            3)    Tuhan Yesus persadanta em isuruh Bapa e

                   Sinasapken k’rina dosa ibas Golgota kepe

                   Pujilah min Dibatanta ras dame dame dame man banta

                   Dibatanta si erkuah ate man kita jelma e

8.      Koor/VG

9.      Nagani Lilin Natal           (Perp. Tedis)

L    :  “Bangsa si nggeluh ibas kegelapen enggo ngidah sinalsal si erkinar. Kalak si ringan ibas awih-awih kematen enggo isalsali terang si harhar. Enggo iberekenNdu keriahen si mbelin O Tuhan, malem ateNa ibahanNdu”

        Marilah dage sisagani lilin Natal sebage tanda maka terang e nggo reh ku tengah-tengah geluhta, ersinalsal terang Tuhan ibas pusuhta dingen nggit kita maba terang Tuhan ibas geluhta.

Rende KEE 135:1-3

1)   Berngi e nggo kepe Yesus reh ku doni e Nusurlah ngangkut dosanta me kin

Jadi kap musil lah sangap pagin Asa si tek Tuhan e, Asa si tek Tuhan e

2)   Anak e, bujur pe singena me aku e. KiniulinNdu tadingken Kam kap

Bengket ku doni ;ah trang si gelap, Aku daramenNdu e, aku daramenNdu e

3)   Berngi e nggo kepe Tuhan reh ku doni e. padan Dibata teridah tetap.

KinikelengenNa banta me kap. Tuhan si puji gelah, Tuhan si puji gelah

10. Khotbah                           (Perp. Kundul)

11. Pengakun Kiniteken       (Perp. Tedis)

12. Koor/VG

13. Persembahen

a.   Kata Dibata kerna persembahen

“Emaka bengket ia kubas, idahna Anak ndai ras Maria nandeNa, jenari erjimpuh ia nembah Anak e. Ibuatna erta-erta siibabana e, jenari ipersembahkenna man Anak si mbaru tubuh e, erta-erta siipersembahkenna eme: emas, kumenen ras mur”. (Matius 2:11)

b.   Rende KEE 136:1-3

     1)   Kam k’rina si tek mari surak janah puji Pedas min kerina ku Betlehem

           Nehenlah anak tubuh man Tuahta Mari kita nembah, mari kita nembah,

           Mari kita nembah man Raja

     2)   O Raja mulia sinjujurken krina La mela Kam kundul ibas ampun

           Kam me Dibata mula-mula nari Mari kita nembah, mari kita nembah,

           Mari kita nembah man Raja

3)   Kam k’rina malekat pujilah man Tuhan Ersurak, ersurak man baNalah.

Puji Dibata I surga, I doni Mari kita nembah, mari kita nembah,

Mari kita nembah man Raja

c.   Pertoton Persembahen

14. Koor/VG

15. Pertoton Syafaat

16. Tekad/Komitmen                        (Perp. Tedis)

L          :  Tadingken kejahatan, lakokenlah kai si mehuli, bulatkenlah ukurndu erbahan perdamen.

Moria   :  Erpadan kami Moria Tuhan guna ngkelengi kebenaren, mpedauh si jahat janah makeken KataNdu ibas gedang-gedang geluh kami, gelah dame ras ketenengen jadi sikerajangen kami.

       Rende SEE 169:1-2

1)      Sura-sura Yesus bangku ersinalsal tetap

Nggeluh bujur ras mehuli si ngena ateNa

Ersinalsal terang em sinisuraken Yesus

Ersinalsal terang ku tetap ersinalsal

2)      Sura-sura Yesus Kristus nandangi geluhku

Mpehaga turang senina sisampat-sampaten

Ersinalsal terang em sinisuraken Yesus

Ersinalsal terang ku tetap ersinalsal

17. Pertoton Tuhan

18. Pemasu-masun

L       :  Berkatlah kam ku kegeluhendu (ta) sekalak-sekalak, gejapken keleng ate Dibata ras sepengodak sepengole kam ngkelengi teman manusia. Guna mpegegehi kam (kita), aloken pemasu-masun Tuhan Dibata: “Dibata si mada perkuah ate, si nggo nenahken kam (kita) ku kemulianNa si rasa lalap ibas Kristus, njadiken kita (kam) serta, tetap megegeh dingen paguh. Ia nge si mada kuasa she ras lalap. Amin.

Perp. :  A…min, A…min, A…min