Saber ia nimai udan sireh nandangi merdang ras udan sireh kenca rumpah page ( Jakub 5:7b) Ogen : Kejadin 3 : 17-19 (Tunggal) Khotbah : Jesaya 30 : 19-24 (Tunggal) Tema : “Tuhan si peturahsa, erdangkenlah !”

Bahan sermon Khotbah Minggu 16 Juli 2017 i  GBKP  Klasis Medan Delitua

Invocatio         : Saber ia nimai udan sireh nandangi merdang ras udan sireh kenca rumpah page  ( Jakub  5:7b)

Ogen               : Kejadin 3 : 17-19 (Tunggal)

Khotbah          : Jesaya 30 : 19-24 (Tunggal)

Tema               : “Tuhan si peturahsa, erdangkenlah !”

I. Pendahuluan

            Kita sebage anak-anak Dibata, harusna banci tetap paguh kinitekenta man Tuhan Dibata. Tek kita maka Dibata e erkuasa ibas kerina dampar kegeluhenta ras kerina isi doni enda. Dibata tetap ersura-sura gelah kita kerina anakNa tetap ndatken kemalemen ate ibas Ia nari, emaka iberekenNa aturen-aturen entah pe perintah-perintah guna tetap sidalanken ibas geluhta.

            Kepeken ibas kegeluhenta enda melala percubaan, tantangen, bahkan pengajuk doni enda  si banci erbahanca kita lanai ndalanken perintahNa  entahpe ngikutken Tuhan alu tutus ras payo bagi singena ateNa. Tawaren kesenangen entah pe keriahen doni enda sibanci erbahanca kita lupa bahkan nilah ibas Dibata nari, entah pe banci sikataken mencari jalan lain guna kesenangen i doni. Tantangen-tantangen, perbeben – perbeben, ras kiniseraan sinihadapi kita terkadang erbahanca turah ukur guna ndarami dalan sideban (lanai ngikutken Tuhan), bahkan nadingken Tuhan , tapi hasilna kepeken labo kemalemen ate situhu-tuhu tapi kesusahen.

II. ISI

Ibas Ogenta “Kejadin 3:17-19”, jelas siidah maka manusia siijaiken Dibata alu sempurna “sentudu ras tempasNa” enggo nilah ibas perintah Dibata nari. Padahal kenca enggo itepa Dibata manusia ndai, itamaken Dibata i peken Eden janah  ije ibahan Dibata erbage-bage batang kayu si mehuli turah ije janah buahna pe mehuli (Kej 2:8-9). Nina Dibata man manusiait ibas peken enda  ndai “Kerina buah batang kayu si lit ibas peken enda banci ipanndi, seakaten buah batang kayu simereken pemeteh karna sibujur ras sijahat. Buah batang kayu e la banci ipanndu, adi ipanndu la banci lang mate kam ibas wari e (Kej 2:16-17).

            Tapi perbahan godan Iblis man manusia ndai , maka turah ibas ukurna nari , adi ikutkenna godaan Iblis e maka lebih malem akapna asangken bagi sienggo itentuken Tuhan. Itatap diberu e   batang kayu ndai, tuhu she kel akapna jilena  janah buahna pe entabeh nari nge man pangan. I ukurina ka, kuga senangna adi arah man buah batang kayu e ndat pemeteh ia (“seri ras Dibata”). Emaka iputikkenna buah kayu e, ipanna, jenari iberekenna man perbulangenna si ras ia je, janah ipan perbulangenna ka (Kej. 3:6-7). Padahal perbulangenna e (Adam) pe meteh karna perintah Tuhan.

            Akibat perbahanenna e maka labo manusia ndai tambah malem akapna nggeluh tapi tambah kiniseranna, ialokenna penghukumen ias Dibata nari eme :

1. Terpaksa latih erdahin ngusahai taneh si ibereken Tuhan kidekah geluh, gelah banci iberekenna cukup nakan      (perbahan taneh e pe enggo kenasumpah ).

2. Dukut ras sinuan si erduri turah ibas taneh enda nari, janah terpaksa ipanndu sinuan-sinuan i juma.

3. Terpaksa i gegehi erdahin alu curcur panas gelah taneh enda banci mereken ulihna seh mulih ka kam       (manusia) ku taneh. (mengalami kematen ) (Kej. 3:17-19).

            Banci sibayangken adi nai manusia e (Adam ras Hawa) la ipanna buah batang kayu si ilarang Tuhan, janah tetap ia enggeluh bagi perintah Tuhan, mungkin manusia entah pe kita genduari enda tetap denga i Peken Eden,la si alami kelatihen bagi si ikataken  ibas Kejadian 3:17-19. , terpaksa igegehi erdahin alu cur-cur panas. Padahal Adam ras Hawa ibas paksa i Peken Eden, ia banci muati buah batang kayu si enggo isikapken Dibata i Peken Eden guna i pan.

            Situasi/keadaan ibas Ogenta enda hampir bali ras si situasi bangsa Israel ibas kitab Yesaya . Ibas Kitab Yesaya 30:19-24 si idah karna janji Dibata guna mereken pasu-pasu man bangsana (Israel) perbahan ibas paksa e bangsa Israel ngenanami perbeben-perbeben/ ancamen ibas bangsa si deban nari.  Perbeben e turah perbahan bangsa Israel e enggo terpengaruh oleh budaya entah pe sikap hidup bangsa-bangsa sideban, seh maka kegeluhen ibas bangsa Israel enggo melala si la sentudu ras peraten Tuhan, janah siluar biasa ibas bangsa Israel enda sanga ndatken ancamen ibas Asyur nari idaramina penampat man bangsa sideban guna nampati ia labo idahina Tuhan, padahal Bangsa Israel harusna tek man Tuhan Dibata si mengendaliken kerinana (segala sesuatu) siterjadi baik ibidang politik bagepe ibas bidang- bidang sideban (ibas kerina dampar kegeluhen). Arusna  tek ia maka kuasa Dibata melebihi kerinana. Tapi perbahan idahna maka kemegahen tentara perang ibas bagsa asyur bagepe ibas bangsa Mesir, lupa ia maka Tuhan lebih berkuasa diatas segalanya, emaka ia mindo penampat man bangsa sideban janah la idahina ras isungkunna Tuhan Dibata.

Gelah ola bangsa Israel enda terus ngenanami kiniseraan/perbeben, emaka ipersingeti Nabi Yesaya gelah bangsa e bertobat ras ndahi Tuhan. Perbahan Tuhan Dibata e perkuah kap, Tuhan megiken (ngaloi) pemindon penampat si isehken alu tangis,  tergejap ibas kita (bangsa e) maka Tuhan Dibata tetap ngajari kita ibas mentasi paksa-paksa kiniseraan si mberat. Tetap siikutken sora Tuhan Dibata si ngajari kita,lanai kita ernalem man sideban tapi tetap man Tuhan Dibata. Alu bage maka Dibata sajalah siman sembahen,lanai lit selain Dibata  (“ibuatndu me gana-ganandu jenari iambekkenndu bagi kubang, janah nindu “olanai ko kuidah”). Ibas situasi kiniteken sibage maka sialoken me pasu-pasu Tuhan bagi siikataken Jesaya man Israel eme :

“Adi merdang kam, ipesusur Tuhan udan peturahsa, janah melala ulihna siman peraninndu, janah mbelang mbalmbal man ingan lembundu nggagat. Jenggi lembundu ras kelede sinenggalai jumanndu ndat gagaten si mbur ras si mejilena…(Jesaya 30:23-24).”

Emaka ngikutken Tuhan e harus tetap enteguh ras paguh ndalanken kataNa alu dem kiniteken , pasti Tuhan tetap mperdiateken dingen engkelengi kita, emaka ola kita ndabuh ibas percuban, bagi nina invocation :”Saber ia nimai udan sir eh nandangi merdang ras udan sir eh kenca rumpah page. ( Jakub 5:7b)”. Alu bage pasti tetapkita ngaloken pasu-pasuibas Tuhan nari aminna pelit perbeben-perbeben sinihadapi kita.

III. Aplikasi/ Kesimpulan

Temanta ngatakenca : “Tuhan si peturahsa, erdangkenlah !”  enda merupaken seruan s idem kiniteken man banta, maka ibas kita ngerdangken kata Dibata entah pe ndahiken dahinta  ula kita kawatir ras mbiar seh maka aru ateta aminna melala perbeben siman hadapen, pasti turah me perbahan Dibata sipeturahsa. Enda sialoken adi kita tetap ernalem man Tuhan, la kita nilah ibas Tuhan Dibata nari aminna pe lit bujuken/rayuan entah pe pencobaan si reh man banta. Tuhan pasti masu-masu she makapasu-pasu bagi si tertulis ibas kitab Yesaya 30:23-24 e ndai tetap maler man banta.

            Erdangkenlah e ngartiken man bantam aka kit ape ibas ndalani kegeluhen e harus merdang ; “erdahin” perbahan e enggo merupaken sada ketetapen (pasu-pasu) si ibereken Dibata man manusia, emaka ibas erdahin (merdang) epe haruslah tetap sidahiken alu tutus alu erkemalagen man Tuhan. Kita erdahin (merdang) ibas jaman genduari enda tentu melala persina banci siandingken eme ibas kerina profesi ibas kita. Mari sidahiken e kerina alu tetap ncidahken kemuliaan Tuhan, ola mbiar entah pe ragu, mungkin lit tawaren cara sideban simenawarken keuntungen entah pe hasil si lebih mbue entah pe manghiurken alu cara si bertentangen arah kata Dibata. Selaku anak Tuhan ola kita tergoda bagi Hawa ras Adan bagepe bangsa Israel si terpengaruh oleh bangsa sideban seh maka ia mindo penampat man bangsa sideban ibas ia menghadapi tantangen bangsa Assyur. Perbahan adi kita nadingken ras la megiken Tuhan labo kemalemen ate man banta tapi kiniseraan sireh man banta.

Paulus ibas 1 Korintus 3:6 ngataken : Aku nuance, Apolos niramsa, tapi Dibata sipeturahsa. Sinuanca ras siniramsa labopenting,tapisipenting eme Dibata sebab Ia nge sipeturahsa.

Dibata sipeturahsa, labo lit gegeh ras kengasupen kita manusia guna mpeturahsa, tapi kita manusia berusaha ras ndahikenca kap ngenca. Emaka tetaplah kita berusaha , “erdahin”/ “Merdang” ibas kemliaan Tuhan seh maka banci ka kita rani. 

            Tantangan entah pe perbeben –perbeben sinihadapi kita selaku anak-anak Dibata ibas zaman genduari enda tentu melala erbagena she maka banci ka erbahan kit ape mbiar entah pe aru, tapi ola aru ateta perbahan Dibatange simpeturahsa. Dibata si mada kuasa janah labo lit si si berkuasa gegehen asangken Dibata . Emaka tetaplah kita erpengarapen man bana.  Erdangkenlah ! ,……

     Bujur ras mejuah-juah

GBKP Rg .Pamah Kuala Simei-mei