METERUK UKURLAH (JOHANES 13:1-17)

Sermon PJJ tgl 13-19 Maret 2016

METERUK  UKURLAH   (JOHANES 13:1-17)

Kekelengen Yesus man ajar-ajarNa (teman-temanna) la terjeng i doni enda ngenca tapi seh ku kedungenna ateNa keleng, enda teridah ibas Yesus sitetap encidahken pengajaren/pengertin man ajar-ajarNa e ibas seh pe paksana Ia nandangi nadingken doni enda mulih ku rumah Bapa (Joh. 13:1). Yesus mereken contoh/pengajaren man ajar-ajarNa gelah ia kerina ndatken kemalemen ate tuhu-tuhu ibas geluhna (Joh. 13:17).

                Contoh si iberekenNa eme sanga Yesus ras ajar-ajarNa acara man berngi ibas sada wari ope wari raya Paskah.  “Emaka tedis Yesus, itantangina jubahNa, jenari ibentingkenNa uis. ItamakenNa lau ku bas sambung, jenari iburihiNa nahe ajar-ajarNa janah ielapNa alu uis siibentingkenNa (Yoh 13:4-5).”

Murihi nahe eme hal siumum ilakoken ibas paksa sie khususna ibas perjamuan entah pesta-pesta, ija tuan rumah umumna nyikapken budak guna murihi nahe temue sireh. Yesus si ikataken sebage Guru dingen Tuhan mpeteruk diriNa ngelakoken dahin siharusna sinilakoken sekalak budak. Enda ilakoken Yesus man ajar-ajarna sebagai contoh uga harusna (wajib) ilakoken selaku pengikut Kristus ibas geluhna. I cidahkenNa pengajaren man ajar-ajarNa simerupaken prinsip prinsip agung ibas  ngelai alu meteruk ukur ras bersedia menjadi suruh-suruhen (hamba) si saling melayani guna idalanken selaku ajar-ajar , she maka lanai terjadi bagi si tertulis ibas  Lukas 22:24 ija maka ajar-ajarNa ibas paksa sie lit turah perubaten karna ise kin simbelinna ibas ia . Ibas Yohanes 13:14-15  : “Dage adi Aku, Guru dingen Tuhanndu enggo murihi nahendu, patut pe maka kam siburih-burihi nahe. Enggo Ku bahan siman usihenndu gelah banci ibahanndu bagi enggo Kubahan man bandu e.”  

Yesus murihi nahe ajar-ajar e pe merupaken siwajib ialoken ajar-ajar gelah ia bersih, ibas Yohanes 13:8 : “ Ngaloi ka Petrus, “Asa ndigan pe la kubere iburihiNdu nahengku!” Tapi nina Yesus man bana, “Adi la Kuburihi nahendu lanai kam ajar-ajarKu.”  Enda ngataken maka kita pe wajib ngaloken (nggit) menyerahkan diri seutuhnya (geluhta) man Yesus gelah  ibersihkenna guna banci jadi pengikutNa seh maka kita enggo bersih kerina, la bagi  si Yudas anak Simon Iskariot si iberekenna iblis erdahin ibas ukurna eme guna ndayaken Yesus (lih. Yoh. 13:2; 11).

Dage banci sikataken maka murihi nahe ajar-ajar si ilakoken Yesus  menjadi dua hal penting man banta eme : - Arah murihi nahe si ilakoken Yesus e , encidahken karya Yesus Kristus i kayu persilang. Dibata enggo mburihi entah pempebadiaken kerina kalak sireh man baNa. -. Ajar-ajar (murid-murid)  eme pelayan Kristus ( Kristen = pengikut Kristus), si ngatakennca maka Yesus e “Guru ras Tuhan” emaka haruslah kita wajib mengikuti si enggo icontohkenNa janah nggit mpeteruk ukur guna saling melayani. Janah sebage murid-murid pe kita harus nggit mpersilahang bana, ipersanna kayu persilangna jenari ukutkenna Aku (Mat 16:24).

Jadi arah enda piga-piga sibanci jadi bahan perenungennta eme :

1.       Kita harus meteruk ukur bagi Yesus si mpeteruk ukurna , mburihi nahe ajar-ajar ija Ia ikataken guru ras Tuhan ilakokenNa dahin sekalak budak guna jadi contoh man banta.

2.       Kita pe harus nggit I burihi Yesus gelah bersih , mau menyerahkan diri untuk dibersihkan dari dosa-dosa ( la mpertahankan diri, /mekeng ).

3.       Kalak singelakoken bage icontohken Yesus eme si ngaloken kemalemen ate si tuhu-tuhu (Joh 13:17) banci ikataken si ndatklen pasu-pasu ibas Dibata nari she ku kedungenna. Banci iandingken maka kalak si meteruk ukur ndatna kemalemen ate tapi kalak si meganjang ukur umumna lalap jumpa kekecewaan.

4.       Tuhan Yesus Keleng kel ateNa kita she maka tetap icidahkenna man banta guna ngelakoken keleng ate situhu-tuhu gelah kit ape banci tetap ndatken kemalemen ate situhu-tuhu ibas Ia nari.