‘Ia kap Dibata sidem perkuah ate. Labo kam itadingkenNa, labo kam ikernepkenNa. La Ia lupa perpadan si ipadankenNa jine ras nini-ninindu (Ul. 4:31) Ogen : Masmur 32:1-11 (Tunggal) Khotbah : Roma 5:12-19 (Anthiponal) Tema : Nggeluh Ibas Perkuah Ate Dibata

Bahan Sermon Khotbah 5 Maret 2017  ( Minggu Passion II)

Invocatio             : ‘Ia kap Dibata sidem perkuah ate. Labo kam itadingkenNa, labo kam ikernepkenNa. La Ia lupa perpadan                                 si ipadankenNa jine ras nini-ninindu (Ul. 4:31)

Ogen                     : Masmur 32:1-11 (Tunggal)

Khotbah               : Roma 5:12-19 (Anthiponal)

Tema                     : Nggeluh Ibas Perkuah Ate Dibata

Pendahuluan

Minggu enda eme minggu Passion si peduaken, si ngingetken man banta uga lias Ate Dibata ibas Yesus Kristus guna menyelamatkan kita manusia perdosa. Maka kepeken labo lit gegeh/ kengasupen kita manusia guna meyelamatken kita ibas ibas kuasa dosa ras kematen nari. Emaka marilah kita enggeluh ibas perkuah ate Dibata e alu dem kiniteken ibas Tuhanta Yesus Kristus.

Isi

Lit sada peribahasa ngataken “Karena nila setitik rusak susu sebelanga” artina eme perbahan kesalahen si sitik seh maka enggo ceda kerinana. Banci siandingken ibas Roma 5:12 singataken maka “Dosa enggo ngeliami manusia ibas doni enda arah sekalak manusia eme si Adam.”

Perbahan Adam eme manusia si pertama i jadiken Dibata i doni enda, janah arah perjabun Adam ras Hawa manusia bertumbuh ras berkembang ibas doni enda, jadi manusia i doni enda eme kesusuren Adam emaka dosa e enggo lit ibas kerina manusia.

Contohna :

“Kita lit ibas Adam bage dahan-dahan batang kayu lit ibas batangna (sope langa ia jadi tunas /ndarat jadi tunas) enca   bage tunas-tunas e turah (ndarat). Adi batang kayu e eme batang mangga maka otomatis dahan-dahan si ndarat   (tunasna) eme dahan-dahan mangga. Perbahan Adam eme kalak perdosa, maka kit ape dahan-dahanna eme kalak   perdosa”.

Alu pengertian sienda ikataken  kerina manusia enggo erdosa termasuk pe si mbaru tubuh si rusur ikataken alu dosa “asal/turunan”.  Perbahan manusia e tubuh sebage kalak perdosa emaka teridah perbahanen-perbahanen si ngelanggar perentah si rehna ibas Dibata nari, termasuk ibas kita sigenduari pe, contohna : “ Adi kita isakiti kalak maka cenderung kita membalas labo ertoto Ya Bapa alemi salahna perbahan labo iangkana kai siibahanna (bagi si ilakoken Tuhan Yesus) tapi cenderung kita membalas entah pe sakit hati. Emakana kita sebage manusia perdosa labo lit perbahanenta/kengasupenta guna membebasken kita ibas kuasa dosa nari aminna pe Dibata enggo mereken Undang-undang arah Musa. Emaka undang-undang e la ngasup menyelamatken kita perbahan kita sebage manusia perdosa labo ngasup ndalanken undang-undang e alu sempurna. Emaka Undang-undang e si pake jadi pedoman ibas geluhta guna banci ndalani kegeluhen bagi singena ate Dibata. Alu undang – undang e kita banci ercermin she maka kita ngidah uga belinna dosa-dosanta. Bagi kalak ercurmin, idahna kai si leket ibas ayona.

                Perbahan manusia enggo erdosa, manusia e ngaloken hukumen ibas Dibata nari, ibas Kej 3:19 :

“Terpaksa igegehindu erdahin alu curcur panasndu gelah taneh enda banci mereken ulihna man bandu,   she   maka mulihka kam kutaneh…”

Emaka dosa e maba kematen. Enda banci siidah she paksa genduari enda maka kerina manusia e mengalami kematen i doni enda (kecuali Henokh ras Elia) (lih. Rom 5:14 ; Rom 3:10-12).

                Kai dage usaha entah upayanta gelah banci kita selamat ?.....

Upaya nta eme ngaloken perkuah ate Tuhan Dibata.

Kepeken Dibata e dem alu perkuah ate, bage nina ibas Invocatio : “ Ia kap Dibata sidem perkuah ate. Labo kam itadingkenNa,labo kam ikernepkenNa. La Ia lupa perpadanen si ipadankenNa jine ras nini-ninindu (Ul. 4:31).” La meriah ukur Dibata adi manusia e bene ibas dosa, tapi banci ngaloken keselamaten e, emaka ibas Yohanes 3:16  jelas ikataken :

“Sebab bage pengkelengi Dibata doni enda, emaka iberekenNa anakNa sitonggal gelah ola bene ise pe   sitek man    Bana, tapi gelah dat kegeluhen situhu-tuhu si la erkeri-kerin.”

AnakNa si tonggal eme Yesus Kristus. Yesus Kristus enggo reh ku doni enda nebusi dosa-dosa manusia alu darehNa, mate i kayu persilang, janah nusur ku doni kematen, ibas wari sipeteluken keke Ia ibas si mate nari. Yesus Kristus enggo nebusi dosanta, naluken kuasa kematen, emaka kalak si tek man Yesus Kristus alokenna me kegeluhen situhu-tuhu si rasa lalap (keselamaten).  Jadi arah Yesus Kristus kita siperdosa ibenarken ras iperembakken ras Dibata.

Alu bage banci siidah maka perkuah ate Dibata siialoken kita arah Yesus Kristus e ndauh belinen asangken hukumen perbahan dosa si ilakoken Adam e. Perkuah ate Dibata arah Yesus Kristus mereken man banta eme :

1. Kita ibenarken, alu kata sideban , kita selaku manusia perdosa kita ibenarken  ibas Yesus Kristus, she maka tek kita      perkuah ateNa e si menyelamatken kita.

2. Ngaloken kegeluhen situhu-tuhu si rasa lalap.  Ija akibat dosa si ibahan Adam kita ngaloken kematen ibas doni enda,     tapi peruah ate Dibata ibas Yesus Kristus e mereken kegeluhen situhu-tuhu si rasa lalap she maka kematen ibas doni     enda la erbahanca kita bene tapi sialoken kegeluhen si rasa lalap contohna eme Lasarus (Luk. 16:19-31). Jadi ibas kita     ngaloken dingen tek man  Yesus Kristus e sialoken me jaminen keselamaten e bagi nina ibas Yohanes 10:28 :

“Man biri-biringKu e Kubereken kegeluhen situhu-tuhu si la erkeri-kerin. Asa lalap ia la mate,janah ise    pe    langasup nirangken ia ibas kepkepenKu nari”.

3. Kiniersadannta (Kerembakenta) man Dibata lebih indah. Kerembaken Dibata ras Adam eme sebage ciptaan Dibata,      tapi ibas Yesus Kristus kerembakenta man Dibata eme antara anak ras Bapa (bd. Gal 4:6), she maka labo hanya      ndeher ras Dibata tapi Dibata pe enggeluh ibas kita ras kita enggeluh ibas Ia (bd. Yoh 14:16-17 ; Yoh 15)

4. Ibereken Dibata ingan simuliana. Adi Adam enggeluh I taman Eden, tapi kita si enggo ngaloken perkuah ate Dibata      ibas Yesus Kristus lanai bo Taman Eden inganta tapi I Surga rumah Bapa ( Yoh 14:2).

Emaka upayanta genduari eme enggeluhlah ibas perkuah ate Dibata dem alu kiniteken ibas Yesus Kristus she maka teridah keselamaten si enggo ibereken Dibata e ibas kegeluhenta ( lih. Heber 11:6).

Apilkasi

Marilah kita ndalani kegeluhenta alu dem kiniteken ibas Yesus Kristus aminna melala tantangen ras godaan godaan sinihadapi kita, sebab perkuah ate Tuhan Dibata e hanya sialoken ibas Yesus Kristus. Sicidahken alu sikap hidup si enggo ngaloken perkuah ateNa, emaka kita tetap megandalkan Tuhan ibas kerina dampar kegeluhenta. Bagi siidah ibas pengakun Daud ibas Masmur 32:1-11 (Ogen),. Daud ibas ende- endenna nggejapken maka Tuhan Dibata e inganna cebuni she maka ibas Tuhan ia ngidah dosa dosana ras iakuina man Tuhan she maka ialokenna kemalemen ate situhu-tuhu. Emaka iajukna pe gelah kita (perpulungen) man Tuhan sebab Tuhan kap sinuduhken dalin siman dalanenta janah tetap kita iperdiateken Tuhan.

PKS, 1 Maret 2017