KUMPULAN LITURGI LITURGI NATAL DAN TUTUP BUKA TAHUN, YANG SANGAT MENARIK DAN MENAWAN DAPAT DILIHAT SEBAGAI REPRENSI UNTUK PEMBUATAN LITURGI LITURGI NATAL YANGBKITA LAKSANAKAN

LITURGI KEBAKTIAN

TUTUP TAHUN 2016 DAN BUKA TAHUN 2017

 

Tema:

“Erlajar Arah Si Enggo Ibentasi Dingen Nikapken Diri Ibas Ndalani Tahun si Mbaru”

(Kuan-kuanen 8 : 1 – 13)

1. Persikapen

©      Dikune lit itenahken serayan Tuhan guna ngelai dahin enda ntah pe lit salah sada anggota jabu e serayan Tuhan : Pandita, Guru Agama, Pertua, Diaken ntah pe Emeritus, emaka kerina uruten liturgi e banci ipake.

©      Adi la lit ije serayan Tuhan maka bagin : Votum, Salam, Invocatio ras Pemasu-masun la banci ilakoken. Ibenaken ibas nomor 5 nari janah idungi seh Pertoton Tuhan saja, la atan pemasu-masun.

©      Sikapken lah kerina peralaten si iperluken ibas kebaktin enda.

©      Aturken alu mehuli kerna si mabai doa syafaat, rende ras renungen.

2. Kebaktin: Ibenaken jam 23 : 00 Wib

      Orangtua : Bapa/Nande

Sikataken bujur man Tuhan sebab ibas berngi enda banci kita pulung lako muji ras mpermuliaken gelarNa arah Kebaktin “Nutup Tahun 2016 ras Mbuka Tahun 2017” itengah-tengah jabu nta. Enggo mbue perbahanen keleng ate Tuhan si aloken dingen kita pe tetap ipasu-pasu alu mereken erbage-bage pemereNa guna sipakeken ibas kegeluhenta. Emaka guna ngataken bujur man Tuhan ibas kerina si enggo ibentasi kita bas tahun 2016 enda bage pe lako ersikap kita ngaloken tahun 2017, mari lah si bengketi kebaktin enda ibas penampat Tuhan ras penemani Kesah si Badia e.   

      Si mabai Kebaktin

Meriah ukur kami mabai Kebaktin enda emaka mari dage kita lebe ertoto sope sibenaken Kebaktin ta enda …. Ertoto kita !

3.      Votum + Salam

L          Kebaktin Nutup Tahun 2016 ras Mbuka Tahun 2017 enda ibenaken i bas gelar Dibata Bapa, AnakNa Jesus Kristus ras Kesah si Badia.

            Perkuah ate ras dame i bas Dibata Bapa ras i bas Tuhan Jesus Kristus nari, i bas kerembaken Kesah si Badia ras kita (kam) kerina gelah, Amin.

P          Amin … Amin …. Amin

4.      Invocatio :“Langa kin kam dewasa? Erlajarlah gelah dewasa. Kalak lenge kin kam? Erlajarlah ndatken pemeteh”. (Kuan-kuanen 8 :5)

5.      Rende KEE No 331 : 1-3

1)   Tegu aku anakNdu , bas perdalan geluhku

      di aku paksa labuh ambatilah musuhku

Reff :   Tegu aku ibas perdalanenku

            Kam me ngenca kulebuh , cikpendu tannku nteguh

2)   Kam bentengku sipaguh , gia musuhku ngupuh

      Amin mara pe nderpa , la aku bera-bera

      Reff :.................

3)   Seh de paksa sipatku , Tuhan tetap temanku

      Lalap malem ateku , kam ngenca penampatku

      Reff :..........................

6.      Puji-pujin Man Tuhan ibas kerina perbahanenNa tahun 2016 (Responsoria )

L             Terpujilah Tuhan i bas kerina perbahanenNa nandangi jabunta dingen enggo sigejapken kekelengenNa seh ku tengah-tengah jabu nta i bas tahun enda.

Bapa       Selaku bapa itengah-tengah jabu, enggo kugejapken penampat Tuhan lako mpengasup aku jadi imam itengah-tengah jabu enda

Nande    Selaku nande itengah-tengah jabu, kugejapken kuga Tuhan natang-natang diringku lako jadi ingan tunande man kerina isi jabu enda

Anak      Meriah kal ukur kami erbapa ken kam ras ernande ken kam, sabab kerina perbahanenndu igejapken kami i bas palas kekelengen si reh na ibas Tuhan ta Jesus Kristus e 

L             Susah – senang, sehat – sakit, riah ukur – malem ate, enggo ialokenndu i bas geluhndu lako jadi dalanndu guna nggejapken lias ate Tuhan e sabab adi la kin erkiteken penampatNa labo kam ngasup ndalani erbage-bage kecibal geluh jabundu.

Kerina    Amin     

7.      Rende KEE GBKP No 280 : 1, 3

Keg’luhen doni, Tuhan si ngaturkensa, labo tersipati IA si mada kuasa

Tah kai pe jadi, leben enggo itehNa

La lit si terbun, i lebe-lebeNa

La lit si terbuni, ilebe-lebeNa

Basa sada paksa i bas kegeluhenta, tah gulut ukurta ras mambur pe iluhta

Ola min lupa nadangi lias ateNa

GegehiNa kita ban keleng ateNa

GegehiNa kita ban keleng ateNa

8.      Keriahen Jabu Ibas Enggo Banci Ndalanken Kata Dibata (Anthiponal)

L             Jabu ilitken Tuhan guna inganta ngoge, ngantusi ras makeken kata Dibata e

Dilaki     Tambah warina tambah mbarna Kata Dibata erkiteken enggo si beritaken dingen si dalanken Kata Dibata e ibas kegeluhenta tep-tep warina.

Diberu    Kata Dibata e erbahanca kita megegeh guna ngalaken erbage-bage kecibal geluhta.Kerehenta ku bas doni enda lako jadi penampat man dilaki, emaka asa gegeh ras kengasupen si lit, si pakekenlah si lit ibas kita e guna kemulianNa.

Dilaki     Keriahen man banta eme dikune kita banci nggeluh mehamat dingen erkemalangen man Tuhan sabab e kap ulu maka si datken i bas jabu e. Kedungenna enda kap si erbahanca maka ngasup kita ngataken bujur man Tuhan.

Diberu    I bas kerjasamanta erbahanca ertambah-tambah kap keriahenta ibahanNa emaka sikataken lah bujur man Tuhan.

L             Terpujilah Tuhan erkiteken kataNa enggo mbar dingen enggo ipakeken ibas kerina kegeluhenta e, Amin.

               Guna ngaloken Kata Dibata, mari si puji Tuhan arah KEE No. 204 : 1

Kata ni Dibata, seh kal e perluna bas geluh enda

Oge lah Pustaka je IA ngerana man banta k’rina

Gegeh ibas geluhku, kataNdu si tuhu-tuhu

Ras pasu-pasuNdu

9.      Renungan : ibenaken ras idungi alu pertoton

Renungen  :   Kuan-kuanen 8 : 1 – 13

Tema         :   “Erlajar Arah Si Enggo Ibentasi Dingen Nikapken Diri Ibas Ndalani Tahun si Mbaru”

1)      Kata Penaruh

3 Days To Live ….. Tiga Hari Untuk Hidup ….. Telu Wari Guna Nggeluh

Wari sipemena ntah pe Hari pertama eme Hari Kemaren (nderbih)

©      Labo lit kai pe banci si obah kerna si enggo jadi, bage pe labo banci nari si rintak mulihi cakap si enggo sibelasken. Bage pe lanai bo banci si masapken salah lepak si eggo silakoken dingen labo banci nari siulihi keriahen si enggo sinanami. Erkiteken sie, ola nari siinget-inget sie kerina sebab ibas kita nginget-ngingetsa pe nambahi pinakit nge ngenca. Tapi ulin min dikune si enggo sibentasi e kerina si pakeken lako erbahanca reh sikapna cara nta nggeluh nandangi wari-wari si langa si dalani, khususna tahun 2017 enda.

©      Sitantangilah manusia nta si male e (Ep. 4:22) dingen si pepayolah sebab si mbaru enggo kap reh man banta erkiteken perkuah ate Tuhan (2 Kor 5:17).

Wari sipeduaen ntah pe Hari kedua eme Hari Esok (pepagi)

©      Labo siangka kai si terjadi ibas wari sipepagi, i bas wari-wari sinandangi sidalani eme tahun 2017. Mungkin saja pepagi kita ngenanami kecedaan ate, kepiceten tapi banci ka keriahen si aloken. Si jelas, wari si pepagi langa bo sialoken emaka si penting genduari eme erlajar kita arah kerina pengalamen geluhta gelah tetap kita metenget ndalani tahun si mbaru 2017, dingen tek nandangi penampat Tuhan.

©      Mehuli nge dikune si inget dingen sipakeken kai nina ibas Pustaka si Badia :“O TUHAN, Kam kap kebayakenku, e maka iberekenNdu kerina keperlunku, wari-waringku si pepagi lit i bas tanNdu”. (Masmur 16:5)

Wari sipeteluken ntah pe Hari ketiga eme yang tersisa kini hanyalah hari ini (si lit denga sendah eme wari enda)

©      Pintu wari si enggo lewat enggo tertutup bage pe tahun 2016 enggo tertutup, lanai tertalangi ise pe. Pintu masa depanta pe kentisik nari maka sibenaken ndalanisa. Erikiteken sie, sipusatken saja dirinta guna wari si sendah enda bage pe nikapken dirinta guna ngalo-ngalo tahun 2017. Mbue hal si banci silakoken ibas pendungi tahun 2016 enda, khususna ibas kita nggit sialem-alemen salah bage pe mpetetap ukur guna ndalani tahun 2017 e.

©      Lakokenlah si mehulina man sada ras sidebanna, hamatilah si man hamaten, dingen kelengi pe kalak sienggo erbahan la mehuli man banta sebab kentisik nari kal ngenca tahun 2016 enda banci si dalani. Ola min tadingken si la mehuli ibas tahun 2016 e.

2)      Renungen

Rikutken kai sienggo isingetken ndai, maka perlu kal kita erlajar guna makeken kegeluhenta e alu payo ibas penampat Tuhan.Yohanes Calvin ngatakenca nina :“Kehidupan itu bagaikan pos penjagaan, tempat kita ditaruh oleh Tuhan, dan yang harus kita jaga sampai kita dipanggilNya”. Selaku sekalak si erjaga ibas pos e tentu lit nge perjuangen si arus sialaken, segelah i bas kerehenNa e tetap kita erjaga-jaga. Banci pe si andingken diri nta e bagi 10 kalak si nguda-nguda e (Matius 25), banci nge lit ibas kita desken lima kalak singud-nguda si lenge tapi banci ka bagi lima kalak singuda-nguda si pentar. Enggo banci ipastiken maka madin nge siakap kita ikataken kalak pentar asangken kalak lenge. Emaka, sipepayolah kinata kegeluhenta ibas tahun 2016 e : entah lit denga nge pengerana, perukuren ras perbahanenta si la payo iakap Tuhan.

Rikutken Kuan-kuanen 8 : 1 – 13, lit kap telu hal si mehuli man renungenta ibas nutup tahun 2016 enda, bage pe ngalo-ngalo tahun 2017, eme :

Sipemena :Nggeluhlah ibas Kepentaren (ay 1 – 4)

Þ    Kalak si nggeluh ibas kepentaren ertina nggeluh ibas mehamat ras erkemalangen man Tuhan (Kuan-kuanen 1:7; Masmur 111:10) janah ulihna eme kesangapen ibas jabu (bnd Masmur 128:1-6).

Þ    Adi tuhu kin kita kalak pentar mahan bana nggit kita terus erlajar ibas palas mehamat ras erkemalangen man Tuhan kerna kerina pengalamen nggeluh si payo, subuk man kerina isi jabu nta bage pe man sangkep geluhta, temannta sada gereja, jiran tetangga nta bage pe kalak si deban.

Þ    Kalak si pentar ertina kalak siertanggungjabab nandangi kerina kelepakenna dingen erlajar guna mperobahisa ras ngelakoken si terulin wari-wari si reh enda, khususna ibas tahun 2017 e.

Sipeduaken :Erlajarlah Dewasa (ay 5 – 9)

Þ    Kalak si dewasa ertina :kalak si tehna erti ras cara erlajar ku siterulin, bage pe nggit ndengkehken pengajaren si payo.

Þ    Mari si petetap ukurta lako nadingken kerina si lepak janah nggeluhlah selaku sekalak si erberita kerna perbahanen Dibata e gelah reh teremna kalak si tek dingen ndatken bagin ibas Kinirajan Dibata e.

Þ    Tole, ibas kita nandangi menaken tahun 2017 enda, siinget kai si pernah ikataken Yohanes Calvin, bahwa kuta kemulihenta si tuhu-tuhu eme Kinirajan Surga e. Erkiteken sie, nggeluhlah kita selaku sekalak si enggo dewasa ibas erkiniteken dingen nggit erlajar ibas perukuren si ersuruh entah pe siikataken erlajar mandiri (self learning) maka ngasup kita ngangkai tujun tahun si mbaru ibereken Tuhan man banta. 

Sipeteluken :Tetaplah Ergaken Tuhan I bas kegeluhen e (ay 10 – 13)

Þ    Pirak, emas ras permata tuhu barang si meherga tapi la kap terbandingken kekelengen Tuhan si enggo naruhken kita seh nandangi kita bengket ku tahun 2017 e. Mungkin pe, tahun 2016 enggo tambah pirak, emas ras permata ta ntah pe kebayakenta. Banci k ape urak ka beliganna erkiteken sada ras sidebanna. Tapi, bicara tambah ntah urak gia kebayaken doni nta, kebayaken Tuhan si lit ibas kita e ola min urak.

Þ    Tetap lah min erburak-burak ukurta (penuh sukacita) guna nadingken kejahaten, megombang ras kiniganjangen ukur rikut pe ras lagu langkah si jahat dingen ranan si la tuhu. Gelah tahun 2017 enda tetap jadi tahun perkuah ate Tuhan si banci nambahi gegehta lako nggeluh sue ras singena ate Tuhan. 

3)      Penutup

Ola erleja-leja erlajar ngelakoken si ngena ate Tuhan segelah kesempaten nggeluh siiberekenNa denga tahun 2017 e jadi kesempaten guna mereken si mehulina man Tuhan. Puji Tuhan, Amin. 

10.  Pengakun Kiniteken

11.  Persembahen

Ø  Rende  KEE GBKP No. : 302 : 1, 3

Nginget perkuah Dibata si mbelin, si isehkenNa man banta k’rina kin

I bas kerina dampar kegeluhen, i doni si dem alu keguluten

Endeskenlah kula nta man Dibata, kerinana si lit ibas geluhta

Selaku persembahenta si nggeluh, em persembahen si ngena ateNa

Marilah k’rina si puji Dibata, janah si peteruk k ape ukurta

Alu bage si dat sura-suraNa, kai si mehuli ras ngena ateNa

Endeskenlah kula nta man Dibata, kerinana si lit ibas geluhta

Selaku persembahenta si nggeluh, em persembahen si ngena ateNa

Ø  Pertoton kerna persembahen + Doa Syafaat : Khusus kerna ngalo-ngalo tahun si mbaru 2017.

Kenca dung doa syafaat , adina lit waktu nimai jam 00.00 wib ipake guna ercakap-cakap kerna perkuah ate Tuhan

TAHUN BARU : 2017 - Pukul 00.01 WIB

12.  Rende KEE GBKP No. : 117 : 1-2

1)   Nggo mentas Tahun male e, kam me kupuji Tuhan e ,

      Jaga kawali kam tetap tendingku ras dagingku e

2)   O, Yesus kam penebusku , keleng atendu man bangku

      Tahun simbaru enda pe taruhken perpulungen e

13.  Sura-sura nta lako makeken tahun 2017 ibas keleng ate Tuhan

L          Katakenlah bujur man Tuhan erkiteken enggo iberekenNa man banta perkuah ateNa arah wari simbaru, tahun si mbaru pe. Kai dage sura-surandu i bas si enda kerina ?

P          Bujur Tuhan erkiteken pemereNdu e, terpujilah Kam i bas kami ndalani wari-wari kami tahun 2017 enda.

L          Si male enggo mentas janah nehenlah si mbaru enggo reh. Emaka ayakilah kerina si ngena ate Tuhan itengah-tengah jabunta, lakokenlah si mehuli dingen bahanlah maka termulia Tuhan arah pengerana, perukuren ras perbahanenta ibas tahun 2017 enda.

P          Ijenda kami Tuhan, suruhNdu lah kami ngelakoken kerina si arus ilakoken kami anak-anakNdu e.

L          Adi bage, alokenlah tahun 2017 enda dingen tadingkenlah kerina perbebenta guna taahun enda. Dibata si masu-masu kita (kam) kerina, dingen siangkatken sie kerina arah pertoton syafaat ta, Amin.                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                            

14.  Pertoton Berantai Ibas Enggo Mengketi Tahun 2017

1)      Notoken kerna kerina kecibal kegeluhen kidekah tahun 2016 gelah jadi evaluasi ras introspeksi kempak si terulin

2)      Notoken kerna tahun 2017 segelah kerina isi jabu nggit meningkatken kengasupen nggeluh ibas Kata Dibata (berteologi) dingen nggit erlajar sendiri (self learning) kerna si ngena ateNa

3)      Notoken gelah kerina isi jabu ipasu-pasu Tuhan kidekah tahun 2017

4)      Notoken GBKP maka ipakeken Tuhan ibas tahun 2017 enda guna ndalanken si ngena ate Tuhan, khususna nginget kerna tahun pelayanen GBKP ibas 2017 eme :

“Meningkatkan kemampuan warga GBKP dalam kehidupan berteologi dan menumbuhkan motivasi belajar secara mandiri (self learning)”

15.  Rende KEE GBKP No. 122 : 1, 3

O Tuhanku sampat aku, i bas tahun enda pe

Pebaruilah gegehku, ngikutken Kam seh dungna pe

Pasu-pasu gelah min, kami si tek baNdu kin

Bahan bangku tahun enda, tahun perkuah ate

Dingen kesasapen dosa, em si kuarapken pe

Bas Kam saja Tuhanku, aku daten si bage

16.  Pertoton Tuhan

17.  Pemasu-masun

L          Pakekenlah tahun si mbaru, eme tahun 2017 enda jadi kesempatenndu guna ngerembakken diri man Dibata bage pe tetaplah arapkenndu ibas Dibata nari pengkawali ras alokenlah pasu-pasuNa :

            Ipasu-pasu janah ikawali Dibata kita (kam), siang ayo Dibata ersinalsal i babo nta (ndu), janah melias ateNa ngenehen kita (kam). Itatap Dibata ku kita (kam) janah malem ate ta (ndu) ibahanNa. Amin

P          A.....min    A....min    A..........min

18.  Sisalam salamen kerina anggota keluarga : ibenaken orangtua lebe emaka anak ku orangtua janah seterusna sapih-sapih anak-anak. Mehuli nge dikune ibas si salam-salamen e melasken kata persentabin kerna kerina salah lepak ibas tahun 2016 janah si jadi arapen ibas tahun 2017.