Aron Dibata Kap Kita Majekken Kula Ni Kristus ( I Korinti 3:8-11)

Sermon  Bahan PJJ  Tanggal : 21 – 27 Pebruari 2016

Aron Dibata Kap Kita Majekken Kula Ni Kristus  ( I Korinti 3:8-11)

                Kemajuan/ Perkembangan zaman seiring ras mbuena pengaruh budaya, pengetahuan, ras ajaran – ajaran agama si berkembang banci erbahanca manusia nggeluh erkelompok-kelompok (erbana-bana), si menganggap maka kelompokna  si payona entah simehulina asangken sideban. Janah maka sikap enda pe membeda-bedaken si mbaba pengajaren (dianggap lebih baik, lebih benar, lebih unggul) si ku kelompokna asangnken sideban seh maka lit teridah lebih mengangungkan sada ras sidebanna aminna pe alu tujun si seri. Adi enda berkembang tentu banci menimbulken masalah/ persoalen she maka dungna encedai ibas kiniersadaan siarusna sicidahken i tengah-tengah geluhta selaku anak-anak Dibata.

                Situasi sibagenda terjadi i perpulungen Korinti, ija bagi enggo si eteh maka Kota Korinti e merupaken kota perdagangan si mbelin emaka melala budaya ras pengajaren-pengajaren agama, filsafat seh ku kota e.   Perpulungen Korinti si ipanteki Rasul Paulus enggo erpihak-pihak, lit singatakenca aku arah Paulus, lit ka singatakenca aku arah Apolos, deba nina aku arah Petrus, janah lit pe deba aku arah Kristus (1 Kor 1:12), padahal harusna selaku anak-anak Dibata arus nggejapken kini ersadaan bagi nina Rasul Paulus ibas 1 Korinti 1:10 : “ Ersadalah katandu kerina, gelah ola sempat jadi perpecahen i tengah-tengahndu. Ersada ukurndu janah ersadalah sura-surandu”. Sebab ibas persadaanndu ras Kristus, kam enggo ipebayak i bas kai pe, ibas pengeranandu bagepe ibas pemetehndu (1 Kor 1:5).   Alu kata Rasul Paulus enda kita i persingeti maka Aron Dibata Kap Kita Majekken  Kula Ni Kristus,”( bdk. Mat. 28:19-20,  sirusur siinget  alu istilah Amanat Agung).” Ndahiken dahin si rehna ibas Dibata nari guna kemuliaan Dibata she maka kerina kita tek maka Yesus Kristus e Tuhan ras Juru selamat   (bdk Yoh.6:28-29 :” Jenari nungkun kalak ndai, kai dage arus ibahan kami guna ndahiken dahin Dibata ?” Erjabap Yesus :” Si sentudu ras peraten Dibata ibahanndu, eme : teklah kam man baNa si isuruh Dibata.”

                Ibas 1 korinti 3:8-11   menyikapi perkembangen si terjadi i perpulungen Korinti Rasul Paulus ngatakenca maka Ia ras Apolos sada aron kap ibas ndahiken dahin Dibata, I tengah tengah perpulungen (Korinti) alu ngataken kam me jumana. Alu bage maka Rasul Paulus la merasa lit perselisihen antar ia ras Apolos aminna pe ibas paksa sie Apolos ibangga-banggaken sebagian perpulungen Korinti ija Rasul Paulus simantekisa si mengakibatken banci mpeturah perpecahen i Perpulungen .  Ia ngataken maka dahin sidahiken Apolos e pe merupaken sada hubungen si erat janah berhubungen  alu ngataken  maka :” 1 Kor 3:6-8 ; Aku nuanca , Apolos niramsa,… Si nuanca ras siniramsa sada aron kap. Alu ngataken maka aminna pe Rasul Paulus si manteki perpulungen e janah  i terusken Apolos   igejabkenna e kerinana guna kemuliaan Kristus Yesus ras guna Perpulungen Korinti bagi siikatakenna ibas 1 korinti 4:6 :

 “ Kerina si enggo ku kataken e, o senina-senina, e me kap karna aku ras Apolos.  Tujuanku eme kap gelah erlajar kam ibas kami, maka ola ilanggarndu batas-batas si tersurat I bas Pustaka SiBadia, e me kap gelah ola meganjang ukurndu jenari iangkatndu sekalak tapi iperjakndu si deban”.

Emaka mpeseh Berita Simeriah   labo guna kemuliaan si mberitaken karna pengajaren e, janah upahna e pe sialoken ibas Dibata nari rikutken pendahinna sekalak sekalak , si ngatakenca maka kepeken ibas kita ndahiken dahin Dibata e ula mengarapken kemegahen ibas manusia nari sebab Dibata nge simereken upahna, emaka labo perlu kita membanggaken dirinta i lebe-lebe manusia. Alu sikap sibage labo lit sikitiken ukur ibas Paulus nandangi  Apolos si iagungken sebagian perpulungen Korinti tapi malah ipindona gelah ula sempat terjadi perpecahen, sebab si nuanca ras siniramsa labo penting , tapi si penting eme Dibata. Janah Perpulungen pe ula memuji-muji sekalak si mpeseh pengajaren e janah mengakibatken lit si i kecilken entah i rendahken tapi tetaplah erlajar ras ngikutken kata Dibata bagi si tertulis ibas Pustaka Sibadia gelah ula sempat kita pe ndabuh ku meganjang ukur (sombong/sombong rohani).

                Selanjutna rasul Paulus ngataken maka Perpulungen e bangunen Dibata kap. Bangunen maka banci berdiri alu paguh lit beberapa unsur berbeda si menyatu  maka banci berdiri bangunen e antara lain : lit pasir, lit semen, lit batu, kayu, besi, lau, ras sidebanna. Kerina unsur-unsur i persada i peruses guna jadi sada bangunen. Bage ka perpulungen e, labo seri kerina latar belakang, kepentaren/pemeteh, budaya/sifatna, kemampuan/ talentana tapi arus lit kiniersadaan alu ersada ukur, ersada sura-sura, alu ersada kata seh maka terwujud toto Tuhan Yesus bagi tertulis ibas Yohanes 17:21; “ O Bapa ertoto Aku man bandu gelah ersada min ia kerina. Ersadalah min ia ras kita, bagi Kam ersada ras Aku janah Aku ersada ras Kam. Ersadalah min ia gelah tek doni enda maka Kam me sinuruh Aku.”

                Paulus enggo makeken pemere si ibereken Dibata man bana (talenta) guna majekken palas bangunen  (Perpulungen) e, eme Yesus Kristus, emaka ibangun kalak sideban ibabo palas e.  ( 1 Korinti 3:10-11). Enda menggambarken maka lit hubungen antara sada serayan ras sidebanna guna banci bangunen (perpulungen) e mejile.  Tapi guna mbangunca e pe kepeken arus nge metenget gelah ola lari ibas palasna nari tapi sesuai ras palas e seh maka bangunen (perpulunen e banci paguh ras mejile). Bangunen biasanya ibangun mengikuti palas si enggo ibahan. Emaka bangunca ibabo palas epe rikutken kemampuan /kengasupen/talenta, pemere Dibata man banta, janah perlu siinget maka Dibata nge pagi sinilaisa / nguji sa. Emaka marilah tetap kita ersada arih, ersada ukur guna majekken kula Ni Kristus, alu makeken talenta/ pemere Dibata si lit ibas kita janah siinget maka dahinta e Dibata nge si menilaisa janah banci min kita bijaksana ibas mengatasi persoalan si lit bagi Rasul Paulus ngenehen persoalen I Korinti. Paulus lit kiniteruken ukur ibas ngidah situasi piga-piga perpulungen Korinti si membanggaken Apolos padahal Paulus nge simantekisa. Janah metengetlah gelah ula ka torah percakapen ibas perpulungen si menilai nilai serayan si mengakibatken lit si ibanggaken janah lit si merasa i kecilken she maka banci turah perpecahen ibas perpulungen e.  Emaka marilah kita kerina nggejabken “ Aron Dibata Kap Kita Majekken Kula Ni Kristus” alu makeken talenta si lit ibas kita. Dibata simasu-masu kita kerina.

Tabi ras mejuah-juah

Pdt Kartauli Kaban STh ( GBKP Rg PKS)