LITURGI NATAL UMUM GBKP
RUNGGUN PAMAH KUALA SIMEI MEI
TAHUN 2017
Thema : “YESUS MPETANGKAS RAHASIA DIBATA”
Sub Thema : Pengangkan nangndangi sura-sura Dibata
mpengasup Gereja menyuksesken tahun Politik ras meningkatken hubungen sosial,
masyarakat bagepe pemerintah.
I. PERSIKAPEN
a. Perpulungen nikapken pusuh ras ukur guna ngadap man Tuhan. Serayan
Kebaktin ersikap ibas ingan si enggo itentuken/pertoton i kamar persikapen.
----- musik -----
II. KEBAKTIN
1. Kata Penaruh Ku Bas Kebaktin:
Senina ras
Turang kekelengen Tuhan Yesus Kristus, meriah ukurta, sipuji Gelar Tuhan
erkiteken lias ateNa si mbelin man banta manusia gelah kita nggeluh, ergaul ras
Dibata. Kita si tek man baNa dingen ngaloken IA ibas geluhta si tep-tep wari
enggo jadi anak-anak Dibata, janah nggeluh me kita ras IA rasa lalap. Enda me
kemalemen ate si tuhu-tuhu si nialoken kita ibas Dibata nari. Ntal enda jadi
tanda man banta maka Dibata enggo ras kita janah kita ras Ia.
2. Ngoge : (Masmur 24:7-10)
3. Erkata Lonceng (Perp. Tedis)
4. Rende KEE No. 136:1,2,3 “KAM K’RINA SI TEK”
1. Kam k’rina si tek mari surak janah puji,
Pedas min kerina ku Betlehen.
Nehenlah Anak tubuh man Tuahta,
Mari kita nembah, mari kita nembah,
Mari kita nembah man Raja.
2. O, Raja mulia si njujurken k’rina,
La mela Kam tunduh ibas ampun.
Kam me Dibata mula-mula nari,
Mari kita nembah, mari kita nembah,
Mari kita nembah man Raja.
----- Serayan Kebaktin Nangkih ku Mimbar -----
3. Kam k’rina malekat pujilah man Tuhan,
Ersurak, ersurak man baNalah.
Puji Dibata i Surga, i doni,
Mari kita nembah, mari kita nembah,
Mari kita nembah man Raja.
5. Votum – Salam: (L :
Liturgis, P : Perp.)
a. Votum:
L : Kebaktin Natal Umum enda ibenaken i bas gelar Dibata, si erkeleng
ate man doni enda, i bas gelar AnakNa Jesus Kristus si mpeteruk baNa jadi seri
ras manusia, ras i bas gelar Kesah Si Badia si mereken keriahen si tuhu-tuhu
seh rasa lalap.
b. Salam:
L : Perkuah ate ras dame si rehna idur Dibata Bapa, AnakNa Jesus
Kristus ras kerembaken Kesah Si Badia, ras kita (kam) kerina gelah. GLORIA.
P : Gloria....Gloria....Gloria (iendeken)
6. Invocatio:
L : “Nina Tuhan, “O Betlehem i Efrata aminna i Juda kam kuta si
kitikna tapi ibas kam nari Kupekeke sekalak si ngerajai Israil si asalna ibas
adi-adi nari ibas paksa siburia nari” (Miha 5 : 2)
7. Rende KEE No.115 :1-3
“KERIAHEN SI MBELINNA”
1. Keriahen si mbelinna, si kuberitaken e,
Enggo tubuh si Permakan, e me Tuhan Yesus e.
Pujilah min Dibatanta; Ras dame, dame, dame man banta.
Dibatanta si erkuah ate, man kita jelma e.
2. Ibas berngi enda terang, bintang si mehelhel e,
T’rangna seh ku perukuren, si lanai erlayas pe.
Pujilah min Dibatanta; Ras dame, dame dame man banta.
Dibatanta si erkuah ate, man kita jelma e.
3. Tuhan Yesus persadanta, em isuruh Bapa e,
Si nasapken k’rina dosa, ibas Golgota kepe.
Pujilah min Dibatanta; Ras dame, dame, dame man banta.
Dibatanta si erkuah ate, man kita jelma e.
8. Berita Kerna Natal: (Perp. Kundul)
L : Marilah sibegiken berita kerna ketubuhen Tuhanta Jesus Kristus
bagi si tersurat i bas Pustaka Si Badia: “Sabab bage pengkelengi Dibata doni
enda, e maka iberekenNa anakNa si Tonggal, gelah ola bene ise pe si tek man
baNa, tapi gelah dat kegeluhen si tuhu-tuhu si la erkeri-kerin. Sabab Dibata
nuruh AnakNa ku doni enda labo jadi Hakim, tapi jadi si ngkelini manusia.”
(Johanes 3:16-17).
9. Rende PEE No. 27:1,2,3
“SI ENDEKENLAH ‘NDE-NDEN
SI MERIAH”
1. Si endekenlah ‘nde-‘nden si meriah
Man Tuhannta si ‘nggo tubuh bas pelangkah,
Sabab patut nge k’rina kita nembah,
Ban babaNa terang ngaruh ras pe tuah.
Ref.: Dage mari kita kerina,
‘Lah si puji gelar Dibata,
Ula nai ukur erbera,
Tuhan Yesus me kap
Rajanta.
2. Gelgel nari suratken nabi-nabi,
Reh me S’kalak si nampati ku pertibi,
Em pemere idur Dibata nari,
Enggo tubuh i Betlehem tengah berngi.
Ref.: Dage mari kita kerina,… rst.
3. Tuhan Yesus kuinget min Kam rusur,
‘Lah babaiNdu pergeluhku ku si bujur,
‘Di bage kiniteken la erkusur,
Enggo paguh gia lit rusur si ngugur
Ref.: Dage mari kita kerina,… rst.
10. Padan Dibata Man Kalak
Si Ngaloken Jesus:
L : Mari sibegiken padan Dibata man kalak si ngaloken Tuhan Jesus i
bas geluhna: “Kalak si tek man baNa dingen ngaloken IA, ibereNa hak jadi
anak-anak Dibata. Kalak si megiken kataNa dingen tek man Dibata si nuruh IA,
ialokenna kap kegeluhen si tuhu-tuhu si la erkeri-kerin. Ia lanai iukum tapi
enggo pulah ibas kematen nari janah ndatken kegeluhen.” (Johanes 1:12; 5:24)
1. Nagani Lilin
Rende KEE No. 135:1,2,3
“BERNGI E, NGGO KEPE” (Perp. Tedis)
1. Berngi e, nggo kepe, Yesus reh ku doni e.
Nusur lah ngangkut dosanta me kin,
Jadi kap musil lah sangap pagin.
Asa si tek Tuhan e, asa si tek Tuhan e.
2. Anak e, bujur pe, Si ngena me aku e.
KiniulinNdu tadingken Kam kap,
Bengket ku doni lah t’rang si gelap.
Aku daramenNdu e, aku daramenNdu e.
3. Berngi e, nggo kepe, Tuhan reh ku doni e.
Padan Dibata teridah tetap.
KinikelengenNa banta me kap,
Tuhan sipuji gelah, Tuhan sipuji gelah.
12. Ngoge Kata
Dibata: Mas 98 : 2-9 (Perp. Kundul)
L : “Ketuahen kalak si megiken kata Dibata ras simakekenca ibas
kegeluhen, Maranatha!”
P : Maranatha, Maranatha, Marana…..tha. (iendeken)
13. Renungen Natal: Roma
16 : 25 – 27
14. Pengakun Kiniteken: (Perp. Tedis)
L : Marilah ras-ras kita ngakuken kinitekenta, raduken kerina kalak
Kristen i bas kerina paksa ras ingan i doni enda, ninta dage: “Aku tek man
Dibata Bapa, …rst.”
15. Persembahen Pengataken
Bujur: (Perp. Kundul)
a. L : Genduari ibereken kesempaten man banta ersikap
guna nehken persembahen pengataken bujurta man Dibata. Kerna persembahen pengataken
bujur sibegiken Kata ibas Pustaka Si Badia nari: “E maka bengket ia ku bas,
idahna Anak ndai ras Maria, nandeNa. Jenari erjimpuh ia nembah man Anak e.
Ibuatna erta-erta si ibabana e, jenari ipersembahkenna man Anak si mbaru tubuh
e. Erta-erta si ipersembahkenna e, e me: emas, kumenen ras mur.” (Matius 2:11)
b. Rende KEE No. 193:1,2,3 “ ‘BAS SI NASA TINEPANA”
1. ‘Bas si nasa tinepaNa, tetap k’rina rende t’rus.
‘Nde-enden pujin badia, muji gelar Penebus.
Glo…………ria, muliaken Tuhan!
Glo……………..ria, muliaken Tuhan!
2. ‘Bas ingan si meganjangna, bala Tuhan i Surga.
Rende m’riah ia k’rina, man Tuhan Penebusta.
Glo…………ria, muliaken Tuhan!
Glo……………..ria, muliaken Tuhan!
3. K’rina ginemgem Dibata, pehaga si Tubuh e.
Surga doni rende ia, k’rina alokenNa pe.
Glo…………ria, muliaken Tuhan!
Glo……………..ria, muliaken Tuhan!
16. Pertoton Persembahen
ras Syafaat:
17. Perpadanen Ras Dibata:
(Perp. Tedis)
L : Marilah sisehken padanta sekalak-sekalak guna
ndalanken pedah Dibata. Bagi Kam enggo ersada – Bapa, Anak ras Kesah, bahan
kami pe ersada i tengah-tengah gerejaNdu.
P : Tuhan, pegegehi kami guna ndalankenca.
L : Bagi Kam enggo erdiate nandangi kegeluhen
manusia, bahan maka kami pe erdiate nandangi kegeluhen teman kami manusia.
P : Tuhan, pegegehi kami guna ndalankenca.
L : Bagi Kam enggo engkelini doni enda, bahanlah
maka kami pe ikut muat bagin i bas pekena-kena doni enda.
P : Tuhan, pegegehi kami guna ndalankenca.
L : Bagi Kam enggo ncidahken kebenaren, keadilen,
perdamen, bahan maka kami pe ikut i bas nehken ras ndalanken kebenaren,
keadilen ras perdamen.
P : Tuhan, pegegehi kami guna ndalankenca.
L+P : Amin!
17. Rende PEE No. 97:1,2,3
“PENGASUP KAMI O TUHAN”
1. Pengasup kami o Tuhan,
Gelah pedahNdu banci idalanken.
Em kap tending kami bas kegeluhen,
KataNdu si man gelemen.
Gelah tangkas kata ras perbahanen,
Ban kami tetap bas kebujuren,
SurgaNdu kap perayaken.
2. Temani kami o Tuhan,
Bengket ku doni si dem keguluten.
SampatiNdu kami lako naluken,
Dosa si man sirangenken,
E maka ola kal kami tadingken,
I bas kami ndalani kegeluhen,
G’lah dat kami kemenangen.
3. Kawali kami o Tuhan,
Alu gegeh ras kuasaNdu si mbelin.
Olangilah kami idur si setan,
Si atena encedaken.
DameNdu gelah tetap kuarapken,
Ban kelengNdu ngenca kami atan,
Bengket ku bas kesangapen.
18. Pertoton Tuhan:
L : Ertoto kita bagi niajari Tuhan Jesus, ninta ras-ras: “O Bapa kami
si ni Surga, … rst.”
19. Pemasu-masun:
L : Laweslah kam ku kegeluhenndu sekalak-sekalak. Dage, ersinalsallah
min terangndu i lebe-lebe jelma si nterem gelah adi idahna perbahanenndu si
mehuli, ipujina Dibata, Bapandu si i Surga. E maka alokenlah pasu-pasu idur
Dibata nari: “Ipasu-pasu janah ikawali Dibata kam (kita), siang ayo Dibata
ersinalsal ibabondu (nta), janah melias ateNa ngenehen kam (kita). Itatap
Dibata ku kam (kita), janah malem atendu (ta) ibahanNa. Amin!”
P : A…..min, A…..min, A……..min. (iendeken)
Tidak ada komentar:
Posting Komentar