ERLAJAR ARAH PERBERITA SIMERIAH Perbahanen Rasul-Rasul 14:8-20

Sermon Perpulungen Jabu Jabu tanggal 23-29 April 2017 i Klasis Medan Delitua

ERLAJAR ARAH PERBERITA SIMERIAH

Perbahanen Rasul-Rasul 14:8-20

Pendahuluan

                Kata erlajar rusur ipersingeti man banta kerina gelah kita erlajar terus ibas ndalani kegeluhen enda. Erlajar e labo lit tamatna, kita erlajar e ibas kerina dampar kegeluhenta, baik arah alam enda, lingkungen ras hubungen kemasyarakatan, sekolah-sekolah formal ras informal, terlebih arah Kata Dibata segelah kita sebage anak – anak Tuhan erbeluhna entahpe erpentarna ndalani kegeluhen sebage anak-anak Dibata sijadi sira ras terang i doni enda.

                Erlajar eme usaha entah pe upaya si ilakoken kita guna nambahi pemeteh, penertin entah pe makna bagepe kiniteken ibas geluhta sibanci merobah sikap hidupta menjadi lebih mehuli terlebih ibas erkiniteken man Tuhan.

                Perberita Simeriah eme kalak simberitaken berita keselamaten situhu-tuhu siialokenna  arah Tuhan Dibata nari ibas kinitekenna man Tuhan Yesus Kristus man kerina kalak guna nandai Tuhan Yesus ras bertobat. Ia memberitaken berita simeriah e perban enggo tek ia maka ia enggo ngaloken keselamaten situhu-tuhu arah Tuhan Yesus Kristus. Emaka igejapna tanggung rawab ras pendilo man bana guna mpeseh berita simeriah e man kerina kalak alu penemani Kesah Sibadia (Bdk. Mat 28:19-20; Perb. Rasul-Rasul 5:20).

Isi

Arah Perbahanen Rasul-Rasul 14:8-20 kita erlajar arah perberita simeriah eme Paulus ras Barnabas sanga ia i Listra.

Paulus eme kalak Jahudi suku Benyamin tubuh I Tarsus si rusur igelari Saulus sanga ia langa nandai ras ngaloken Kristus. Ia enggeluh sebage kalak Farisi si rusur ngayak – ngayak kalak Kristen, tapi ibas perjumpaanna ras Tuhan Yesus i dalan ku kota Damaskus ia berobah jadi pengikut Kristus she maka kedungenna gelarna jadi Paulus (“Rasul Paulus”). I gejapna maka kegeluhenna sedekah enda (sope nandai  Kristus)  iakapna untung tapi kenca enggo jumpa ras Tuhan Yesus , e kerina igejapna merupaken kerugin erkiteken Kristus. Emaka kemegahenna sedekah enda iambekkenna janah ipedirepna sie kerina sampah-sampah guna ndatken Kristus dingen tuhu-tuhu ersada ras Yesus e ( Fil. 3:7-9). E maka idatna arti enggeluh ; “nggeluh eme Kristus janah mate reh untungna (Fil 1:21).

Barnabas eme kalak Jahudi, keturunen suku Lewi siasalna eme pulau Kiprus nari. Barnabas  salah sada anggota perpulungen sipemena (mula-mula) si tergelar Jusup.  Rasul-rasul nggelari ia Barnabas si artina “anak si nggit nampati”. Ia kalak bujur, idayakenna tanehna jenari iberekenna duitna man Rasul-Rasul (Perb. Rasul-Rasul 4:36-37). Barnabas jumpa ras Rasul Paulus eme sanga Paulus reh ku Jerusalem, si kedungenna Barnabas memperkenalken Paulus man Rasul-Rasul she maka Paulus pe enggo meriah ras Rasul-Rasul (Perb. Rasul-Rasul 9:26-28) (“Perbahan ibas paksa sie mbiar denga kalak ngenehen Paulus si sanga si e igelari Saulus karna perbahanenna si ndekah). Kenca jenari maka Paulus ras Barnabas iutus  meritaken berita simeriah ku perpulungen si labo Jahudi ^1).  (Bdk. Perb. Rasul-Rasul 13).  Paulus ras Barnabas terus meritaken berita Simeriah she ku Listra.

Listra eme kota penyembahen Berhala, ije jelmana labo lit si berhubungen ras Tuhan Simada kuasa ras Badia. Ia nembah melala dibata-dibata  ras roh – roh . Kalak enda  tek maka lit kemungkinen bahwa dewa-dewana berinkarnasi bagepe enggeluh iantara ia. Dewa-dewana e banci ka jadi kalak terkenal sebage tuhanna, perbahan roh neraka ras kalak sibene  e saling berkaiten ras la terpisahken. Emaka Sanga Barnabas ras Paulus mpepalem kalak sisakit  (sekalak dilaki sila megegeh nahena) paksa e, kalak i Listra erpengakap maka dewa si mehuli sangana berkunjung ku kutana, emaka iberena gelar man Barnabas eme Zeus ras Paulus iberena gelar Hermes.  Seh maka reh imam Zeus  ibas sada kuil Zeus i luar kuta nari maba persembahen lembu jenggina ras bunga ku pintu gerbang kuta. Atena erbahan persembahen ras kalak si nterem man rasul-rasul e ( Perb. Rasul 15:8-13).  Paulus ras Barnabas nolak sie alu caingken uisna jenari kiam ia ku tengah-tengah jelma sienterem janahna serko nina maka ia labo dewa , ia bali nge ras kalak e kerina eme manusia biasa, ia reh eme guna mberitaken berita si meriah gelah kalak e kerina tek man Dibata  si enggeluh si njadiken langit , doni, lawit raskerina isina gelah olanai erbahan perbahanen si sea sea enda ( Perb. Rasul-rasul 14:14-15). Perbahan kepeken ibas ngelakoken persembahen e ilakoken alu upacara guna menghamati dewa siitandai alu kemabuken, pesta pora, ras perzinahen. Alu sie ilakoken guna mereken pujin man dewa alu makeken gegehna guna kesenangen ras hawa nafsu.

Paulus mpetandaken ise ia ras Barnabas. Situhuna labo ia dewa, ia manusia biasa, emaka perbahanen ndu e enggo menipu diri sendiri.  Zeus ras Hermes labo reh kutengah-tengahndu perbahan ia me dewa kesia-siaan. Kami ijenda guna mberitaken man bandu eme Dibata simada kuasa si erkeleng ate man kerina manusia, emaka tadingkenlah e kerina sembahlah Tuhan simada kuasa (lih Perb. Rasul 14:16-18). Tapi perbahanen Rasul Paulus e kepeken la ibegiken kalak e kerina she maka lit si ngajik gelah Paulus ras Barnabas I benteri alu batu ras isaren ku darat kuta. Tapi Paulus ras Barnabas selamat janah pagina lawes ia ku Derbe, ije pe ia mberitaken berita simeriah (Perb Rasul-rasul 14:19-20).

KESIMPULEN.

Pelajaren si banci sibuat ibas perberita simeriah (Paulus ras Barnabas ) eme , maka situhuna kita bnci mberitaken berita simeriah e adi kita lebe enggo tek tuhu-tuhu man Dibata simada Kuasa she maka enggo siidah kemuliaanNa ras keselamaten si iberekenNa man  banta ibas Tuhanta Yesus Kristus. Emaka kita pe ibas keriahen si enggo igejapken ibas Tuhan eme arah Kesah Sibadia si iberekenNa man banta  teridah arah sikap hidupta si banci meeken kemalemen ate pe man kalak sideban she maka kita enggejapken tanggungjawab guna mberitaken berita si Meriah e man kerina kalak gelah ia pe ngaloken keselamaten e. Emaka kalak si enggo ngaloken Tuhan Yesus teridah ibas geluhna maka ia e memiliki karakter bagi si ajarken tuhan Yesus ras pe memiliki integritas sebage anak-anak Dibata. Alu bage ngasup menghadapi tantangen ras godaan, bagi sialami Rasul Paulus ras Barnabas. Paulus ras Barnabas la ia nggit ngaloken persembahen kalak Listra perbahan ia ianggap dewana tapi tetap ipertahankenna maka ia reh guna meritaken berita si meriah gelah kalak I listra bertobat ras ngaloken Than Yesus ibas geluhna  sebage Tuhan, lanai menyembah dewa-dewa ras roh-roh. Barnabas kalak bujur seh maka ia pe nggit merekn duit jumana siidayaken man Rasul-Rasul.  Paulus enggo idatna arti enggeluh emaka kit ape haruslah sidat arti geluhta she maka kit ape tetap megegeh aminna melala tantangen tapi tetap kita makeken geluhta guna meritaken berita simeriah.  Alu bage kit ape sienggo ngaloken berita simeriah ibas jaman genduari enda sigejap tanggung jawabta guna meritaken berita simeriah man kerina kalak, she maka keristenanta la pasif tapi banci jadi kalak sierkiniteken si aktif guna encidahken kemuliaan Dibata ibas geluhta enda.

                                                                                                                                                                   PKS, 19 APRIL 2017