LITURGI KEBAKTIAN NATAL LANSIA

TAHUN 2016

 

Tema            : Kukataken bujur ibas pemereNdu Tuhan (Pengkhotbah 11 : 7-8)

Sub Tema    : Semangat Natal mabai Lansia nggejapken kebijaksanaan si enggo ibereken Dibata man bana, dingen la er aruate kerna keadaen geluhna ras jadi teladan man generasi muda.

I.         PERSIKAPEN

1.         Erlajar Rende : Perpulungen mpelajari piga-piga ende-enden si bakal iendekan ibabai MC

2.         Kata Sambuten Ibas :

a.        Panitia Natal Lansia

b.        Pengurus Lansia

3.         Kata Penaruh Kubas Kebaktin

Senina ras turang kekelengen Tuhanta Yesus Kristus…meriah ukurta, sipuji gelar Tuhan erkiteken lias ateNa si mbelin man banta kerina. Ibas keteruken ukurNa maka enggo reh me Tuhan ku doni enda guna nebusi dosa-dosanta. Ibas paksa enda kita iingetken ngulihi kerna uga Ia enggo jadi manusia dingen ngajuk kita gelah mpelimbarui penggejapenta maka Dibata enggo tubuh dingen nggeluh ibas pusuhta si mabai kita tetap nggeluhken kegeluhennta bagi sura-suraNa. Emaka mari dage sipesikap ukurta, sipuji Tuhan arah Kebaktin Natal enda alu ukurta si bulat…..

4.         Rende KEE 294:1-3 “Meriah Kal Ukurta” Barisan Prosesi Memasuki ruangan ibadah ( Perp. Tedis)

1.        Meriah kal ukurta reh kap penampat

(Iendeken Kerina Jemaat)

Pesikaplah dalinNa ibas ukurta

Biak-biak keglapen tadingken krina

Aloken kesangapen keleng ateNa

(Iendeken Kerina Jemaat)

Reff :  Sialo-alo Ia, ralep-aleplah min kita

Pesikaplah inganNa bas pusuhta 

2.       

(Iendeken Si Diberu)

Di lit si meluk-eluk si pesikaplah

(Iendeken Si Dilaki)

Ukur si nggeduk-nggeduk jadi pinterlah

Pesai-pesai dalanNa Raja Mulia

Babailah kalak krina nembah man baNa

Reff…

3.        Dibata kap Bapanta si nuruh Ia

Nusurlah ku doni enda ndahi manusia

Robahlah dingen jera kita kerina

Dosanta iangkutNa terkelin kita

Reff…

II.      KEBAKTIN

1.         Votum + Salam  : Kebaktin Natal Lansia enda ibenaken ibas gelar Dibata si njadiken langit ras doni, ibas gelar Jesus Kristus si tubuh guna kiniulin doni enda ras ibas gelar Kesah Sibadia si negu-negu pusuhndu guna jumpa ras Tuhan. Perkuah ate ras dame ibas Dibata Bapa ras ibas Tuhan Yesus Kristus nari ras ibas kerembaken ras Kesah Sibadia ras kam kerina gelah. Amin

P                          :  A...min    A...min   A........min  

2.         Berita kerna perbahanen ras sura-sura Dibata (Invocatio)

L     :    O Kesusuren Jakup dengkehkenlah Aku, kam kerina si tading denga ibas bangsaKu. Enggo Kutatang-tatang kam mulai ibas bertin nari, tantang tubuhndu nari enggo kam kuembahi. Aku kap DibataNdu emaka Kuembah-embah kam, seh kam  metua janah ubanen. Aku sinjadiken kam emaka Kutatang-tatang, Kuangkip-angkip, janah Kukelini kam (Yesaya 46:3-4).

3.         Rende KEE 457:1 “Bagi keleng ate orang tua”

1.        Bagi keleng ate orang tua,

Nangdangi kita anak-anakna

Bage me keleng ate Tuhannta

Nangdangi kita buah ateNa

Malem tuhu ban keleng ateNa

4.         Koor/Vokal Group                                                                         (Perp. Kundul)

5.         Kinilangasupen nggejapken keleng ate Tuhan (Ibacaken sekalak Lansia)

Tuhaaaan…. Uga nge kegeluhenku e maka bagenda. Adi nai asum aku nguda denga megegeh kel nge aku, ngasup aku er aron ku juma. Lalit dahin-dahinku e la terdungi. Anak-anak sienterem e pe ngasup nge aku ngasuhisa alu mehuli seh ia kerina enggo gedang mbelin. Tapi genduari e njingkangken nahe pe enggo seh kel kuakap serana, ngerana-ngerana pe ras kalak enggo mekisat aku sebab pemegingku pe  nggo kurang. Adi gawah-gawah pe aku enggo mbiar lalar. Anak-anak si kupebelin ndube pe tempa-tempa lanai erdiate nangdangi aku, adi la aku reh ku rumahna labo aku idahina pe. Janah adi ku rumah anak sintua e pe aku kurang pedas kuakap mulih ku rumahku sibuk ia kerina janah kempu-kempu e pe enggo akapna aku kolot. Nina ukurku enggo ndekahsa akapna aku rumahna e, lang pe labo lit nari gunaku man bana. lawes ka aku ku rumah anak sintengah e, ibas rumah anak sintengah e pe labo ka kuakap tenteng permain e, mberjut lalap ayona adi reh kenca aku ku je, uga pe dongkel ka nge akapna aku e. adi rumah anak singuda labo min merambit kel permain e, tapi seh kel pasaina. Anak-anakna pe imenen kerina je, gejek erbahanca labo banci aku tunduh pe. Emaka mulih ka me aku ku rumah…. Nde kel Tuhan em adi enggo metua ari..

Tapi mawen rukur ka aku, maka labo payo perukurenku e, mungkin sibuk ka anak-anakku e, lang pe adi kitik denga ka anakna me labo banci bersih kel rumah e…… salah kel perukurenku e me Tuhan…….

6.         Rende KEE 362 : 1-3 “Alemi Dosangku”

1.        AlemiNdu aku bas dosangku

AlemiNdu aku bas lepakku

O Tuhan sasap min

O Yesus sasap min

Alemi dosangku

2.        Si la payo dem ibas geluhku

Ngaku aku baNdu o Yesusku

O Tuhan sasap min, O Yesus sasap min

Alemi dosangku

3.        Ku janari kubaba geluhku

DengkehkenNdu min pingko-pingkoku

O Tuhan sasap min, O Yesus sasap min

Alemi dosangku

7.         Koor/Vokal Group

8.         Berita kerna Natal  (Banci iogeken sekalak Lansia)

Sebab enggo ipetangkas Dibata lias ateNa guna keselamaten kerina manusia. Lias ateNa e ngajari kita nadingken kegeluhen si la ngena ate Dibata ras sura-sura doni, gelah nggeluh kita ngkuasai dirinta, bujur dingen si sembah Dibata alu kegeluhennta I doni enda. Genduari kita paksa nimai wari kemalemen ate si iarapken kita eme kerehen sinalsal Dibatanta si mbelin ras si Engkelini kita Jesus Kristus. Enggo iendeskenna diriNa guna kita, lako nebusi kita ibas kerina si jahat nari, jenari ibahanNa kita jadi sikerajangenNa, jadi bangsa si bersih si mesikel erbahan si mehuli. (Titus 2:11-14)

9.         Rende KEE 123:1-3 “Ketuahen Me”

1.        Ketuahen meriah ukur me ketubuhen Yesus e

Sangap me jelma reh me Tuhannta

Mari surak alep haleluya

2.        Ketuahen me riah ukur me ketubuhen Yesus e

Malem me ateta rdame ras Dibata

Mari surak aleplah, haleluya

3.        Ketuahen me riah ukur ketubuhen Yesus e

Yesus penawarta tubuh man gunanta

Mari surak aleplah , haleluya

10.     Kata Dibata

11.     Pengakun Kiniteken                                                           (Perp. Tedis)

12.     Koor/Vokal Group                                                             (Perp. Kundul)

13.     Persembahen pengataken bujur

Rende KEE 445:1-4

1.        Sipepulung me persembahenta, siendesken dage man Dibata

Tanda mriah ukur ban pasu-pasuNa sisimpar breNa man banta

Reff:   Asa si nggo isikapken asa si nggo itotoken

Em pengataken bujurta kempak Dibata

2.        Tuhu simpar pemere Dibata man perjuma ras si erbinaga

Krina si erdahin si ngarap man baNa ituahi pasu-pasuNa    Reff..

3.        Pengataken bujur man Dibata, enda mbelin ka tuhu gunana

Jadiken geluhta kula ras tendinta persembahennta si nggeluh   Reff..

4.        Persembahen kami e o Tuhan eme sada bagin pemereNdu

AjariNdu kami ersembah man baNdu, pehaga kinirajanNdu   Reff..

14.     Doa Syafaat

15.     Koor/Vokal Group

16.     Perpadanen ras Dibata                                                      (Perp. Tedis)

L       : O .. turang ras senina Tuhan Jesus setia kap keleng ateNa, la pernah ngadi amin gia kita enggo metua. Ibas paksa enda nggit nge kam ngaloken Tuhan tubuh ibas pusuhndu..?

P       : O Tuhan samapati kami min guna ngaloken Kam ibas pusuh kami alu bulat ukur kami.

L       : O Turang ras senina adi enggo ialoken kam Tuhan ibas pusuhndu me nggit nge kam ngobah cara rukurndu si eraru ate perban usia si lanjut alu ngataken bujur man Dibata alu penggejapen maka umur meganjang e pasu-pasu Tuhan?

P       : O Tuhan sampati kami min nggejapken maka usia kami si metua e pasu-pasu si rehna ibas Kam nari kap, emaka erbijaksanana kami nggeluhken kegeluhen kami.

L       : O Turang ras senina adi enggo kam ngasup ngataken bujur ibas kerina keadaanndu me nggit nge kam mereken dirindu jadi teladan si mehuli man anak-anak si nguda arah kebijaksanaan siibereken Dibata man bandu?

P       : O Tuhan sampati kami jadi contohen simehuli man anak-anak ras kempu-kempu kami pe.

L+P   : Amin

17.     Rende KEE 451:1-3 “Malerlah Pasu-PasuNdu”

1.        Malerlah pasu-pasuNdu, bagi ni padankenNdu

Gegeh ras ukur si paguh tetap iberekenNdu

Reff:   Pasu-pasuNdu em ulu gegeh kami

Enggo kap male me tuhu si ndemi geluh kami

2.        Malerlah pasu-pasuNdu gluh kami jadi mbaru

Sorana bagi lau maler mpeteng ukur kami    Reff..

3.        Malerlah pasu-pasuNdu mpetetap ukur kami

Rende janah muji glarNdu segedang-gedang geluh   Reff…

18.     Pertoton Tuhan

19.     Pemasu-masun

L     :  Bengketlah ku kegeluhenndu sekalak-sekalak,  dage alokenlah ketubuhen Kristus e ibas pusuhndu, erlalanalah kam  ngataken bujur ibas kerina keadaan geluhndu janah alokenlah pasu-pasu idur Dibata nari :

“Ipasu-pasu janah ikawali Dibata kam, siang ayo Dibata ersinalsal ibabondu janah melias ateNa ngenehen kam, itatap Dibata kam janah malem atendu ibahanna” Amin

P     :  A...min   A...min   A.........min

III.   VARIA NATAL