PA MORIA, Ogen : Daniel 1:3-7; 17-21 Tema : Nuratken Pemeteh; ; Titus 1:15-16 ; Job 42:9-11 Tema : “Aron Dibata Si Ngkuhi Keriahen”. : Perukuren Sibersih

PA Moria Tgl : 22-28 Mei 2016

Ogen     : Daniel 1:3-7; 17-21

Tema     : Nuratken Pemeteh

Kata Penaruh

                Ibas Kuan-kuanen 1:7  ikataken : “ Guna ndatken pemeteh si la banci la lit ibas kalak eme mehamat dingen erkemalangen man Tuhan.  Kalak lenge la nggit mperdiateken kepentaren dingen la ia nggit erlajar.”  Arah ayat enda banci siidah maka kepentaen  e rehna ibas Dibata nar (bdk. Job 32:8; 35:1)i, bali bage siikataken ibas  Masmur 111 : 10 : “ Bena-bena kepentaren eme erkemalangen man Tuhan. Man kalak si erkemalangen man baNa iberekenNa kap pemeteh si mehuli…”   

                Kepentaren / Pemeteh e sipakeken guna ndalani kegeluhennta tiap wari janah banci ka sipakai guna nehken keleng ate  man kalak sideban ibas menjawab persoalen-persoalen ras nambahi pengertin

Isi

                Daniel ras teman-temenna  erkemalangen man Tuhan  enda banci siidah ibas Daniel 1:8;” Enggo itetapken Daniel ibas ukurna maka la ia enggit ngelenggar aturen agamana. Je teridah mbelin kel pasu-pasu Dibata man Daniel. Ija sanga  bangsa Israel itaban i negeri Babel, isuruh raja Nebukadnezar me si Aspenas ( penghulu juak-juakna) lako  milh piga-piga anak perana ibas kalak Israel si ibuang e guna banci erdahin i istana. Daniel ras tean-temanna terpilih , padahal syaratna  eme : arus mejile rupana,pedas nangkap pelajaren, janah lalit sitik pe siman pandangen ibas kulana gelah banci ia atan erdahin  i  istana raja.  Tambah sie si idah maka  Dibata mereken man Daniel ras teman-temanna pemeteh ras kebeluhen karna erbage-bage surat rikut ras kepentaren si deban . Tambah si e man Daniel ibereken Dibata pe kebeluhen lako ngertiken pengenehen ras nipi ( Dan 1:17).

                Kenca seh telu tahun erlajar  si niaturken Aspenas, ibaba Aspenas kerina anak perana si erlajar ngadap man raja Nebukadnezar. Ibas percakapen ras raja , raja erngena ate man Daniel, Hanaya, Misael ras Asaria. Janah ola kenca kai gia penungkunen raja entah persoalen si kuga gia si ibahan raja, Daniel ras teman-temanna  banci menjawab janah kebeluhenna sepuluh kali lipat asangken gru-guru si beluh ngoge nasib entah pe guru-guru permang-mang, emaka Daniel jadi pegawai Istana raja , janah tading I istana she nngayak Kores raja Persia naluken Babilon.

Pengkenaina.

1.       Pemeteh/Kepentaren I perluken kerina manusia ibas ndalani kegeluhen tiap-tiap wari, janah kalak si lit ibas ia kepentaren tentu malem atena sebab kepentaren  ras pemeteh ndauh ergaan asangken pirak ras emas (Amsal 16:6)

2.       Guna ndatken pemeteh/kepentaren eme mehamat dingen erkemalangenman Tuhan si icidahken arah mempelajari undang-undang than (kata Dibata) dingen ilakoken ibas geluhta.

3.       Dibata mereken kepentaren /pemeteh man banta ibas ndalani kegeluhen enda alu erbage bage cara  antara lain eme banci  arah memperdiateken alam sekitar/ciptaan Tuhan, arah erlajar (pendidiken) baik secara formal maupun informal janah banci saja arah persoalen persoalen ibas ndalani kegeluhen enda.

4.       Pemeteh/Kepentaren si ibereken Dibata e man banta arus siperdiateken guna ipakeken ras ikembangken gelah banci arah epe teridah tetap kemuliaan Dibata, ras banci jadi kemalemen ate man kerina manusia ( bandingken ras perumpamaan Talenta )

PA Moria Tanggal             : 29 Mei – 4 Juni 2016

Ogen                                     :;  Hakim Hakim 4:4-5

Thema                                  : Ranan Sipekenaken

Kata Perlebe

Ranan e mereken arti si mbelin ibas setiap manusia, baik si ngerana bagepe si megi-megi ranan e. Arah ranan banci mereken kemalemen ate, banci ka mpeturah perbeben entah pe la kemalemen ate ibas geluh enda. Emaka arah ranan si ibelasken banci ka teridah isi pusuh ras ukur bagi si ikataken ibas Matius 15:18a : “ Tapi kai si ndarat arah babah, ibas pusuh nari kap rehna”.  Emaka  aruslah kita terbeluh ibas melasken ranan si mehuli, la encedai  seh maka mpeturah kemalemen ate bagi si tertulis ibas Kuan-Kuanen 15:4 : “Ranan mehuli mereken kegeluhen, cakap si ngelukai pusuh erbahanca bene ukur”. Bagi si rusur sigejapken maka arah babahta sisada enda banci ndarat kata- kata (ranan) simehuli jadi kemalemen ate tapi arah babahta si sada enda ka banci ndarat kata-kata si encedai ukur manusia. ( arah sada pancur banci dua rasa eme pahit ras entebu) emaka marilah arah rananta banci tetap mpeturah simehuli ras kemalemen ate man kita kerina.

Isi

Debora  eme sekalak diberu sijadi Nabi ras Hakim itengah-tengah bangsa Israel . Ia hakim si ngerunggui bangsa Israel ibas paksa sie. Kerina Kalak Israel ibas erbage-bage suku si atena perkarana idungi reh man bana mindo pedah-pedah/ nasihat ras pertimbangen –pertimbangen. Janah inganna ngerunggui e biasana kundul-kundul ia I teruh batang kurma, kelang- kelang Ramah ras Betel I deleng-deleng Efraim.

                Perkara-perkara si seh man Debora e tentu saja melala erbagena, she ku perkara perkara si mberat pe, tapi Debora e tetap tegas alu makeken pemere ibas Dibata nari, maka kerina persoalen si isehken man bana banci idungi janah kalak sireh epe ndatken kemalemen ate. Termasuk pe sanga Bangsa Israel i tindas SISERA, Panglima tentara Jabin, Debora mereken perentah man Barak maju erperang sebage Panglima Israel ngelawan Sisera. Debora setuju ikut lawes ras Barak ngelawan Sisera janah hasilna Sisera talu ibas peperangen e.

                Perban terberitana Debora enda ibas kehakimen (ngerunggui) ras makeken pemere-pemere Dibata I tengah-tengah bangsa Israel , Debora ikataken entah pe igelari  sekalak “nande” man bangsa Israel ( Hakim-Hakim 5:7).

Pengkenaina

1.       Marilah kita banci melasken ranan si mereken kemalemen ate man temanta manusia janah sigejablah maka arah ranan sibelasken kita teridah kebijaksanaannta ibas menyikapi permasalahen/pergumulen silit.

2.       Ranan si ibelasken kita eme si pekenaken la si pegabuken gelah  tetap teridah kekelengen , bagi si ilakoken Debora, ija kerina suku-suku bangsa Israel reh man bana mbaba persoalenna guna ndatken penyelesaian arah ranan-ranan si ibelaskenna (nasihat,pertimbangen-pertimbangen ibas ia nari) she maka Debora ijuluki Nande man bansa Israel.  Tentu saja pe nguna ngelakoken sie perlu keberanian ras ketegasen, tapi adi tetap bertindak ibas kebenaren ras keadilen arah pasu-pasu Tuhan labo perlu mbiar bagi sinilakoken Debora.

3.       Moria khususna pe harusna banci ngusih Debora enda, perban Debora enda pe sekalak diberu nge ija ibas pkasa si e tradisi kalak Jahudi (Israel) mengnut tradisi Patriakhal, tapi teridah maka Debora tetap ndalanken tugasna selaku Nabi ras Hakim i tengah-tegah bangsana.

4.       Emaka kit ape kerina harusna banci menyikapi kerina permasalahen si lit arah hikmat/kepentaren si rehna ibas Dibata nari gelah kit ape banci terbeluh ibas menyikapi kerina permasalahen si turah alu  bage kita pe banci mereken pertimbangen-pertimbangen  man temanta sanga ia ndatken persoalen.

PA Moria Tanggal             : 05-11 Juni 2016

Ogen                                     : Titus  1:15-16

Tema                                     : Perukuren Sibersih

Ibas Markus 7:21 ikataken : “ Sebab ibas nari, ibas ukur manusia nari reh sura-sura si jahat, si erbahanca ia ndalanken lagu la mehuli,…. Jadi arah e banci sikataken maka perukuren si lit ibas manusia e sangat menentukan sikap hidup entah pe perbahanen ibas ia ndalani kegeluhen enda. Adi perukurenna bersih tentu perbahanen si icidahkenna pe bersih entah pe encidahken kemalemen ate ras kemuliaan Dibata, tapi adi la bersih tentu perbahanenna pe melala si la mpeurah kemalemen ate ras kemuliaan Dibata. Janah ibas kina menilai segala sesuatu mbue hasilna terletak ibas pusuh ras perkurenta, emaka lit sngatakennca maka hati/perukuren  adalah cermin. Emaka adi melket cermin e tentu it ape lanai banci ngida alu jelas apaika enggo tembesin tentu kai pe sinen pasti lalab kabur entah pe lit kotorna.  Emaka mari sijaga gelah perukurenta tetap bersih la tercemar gelah pengenehenta nandangi kerina perdalan kegeluhen enda banci tetap bersih/ jelas si teridah arah perbahanenta pe si tetap bersih arah perbahanen si la ngena ate Dibata.

        Isi

Enda salah sada Surat Rasul Paulus si itujukenna man Titus gelah ia nerusken dahin meritaken berita simeriah i Kreta eme mpejore dahin si perlu idungi, bagepe gelah ngangkat pertua-pertua i bas tep-tep kuta, mengatasi perlawanen ibas meritaken berita si meriah ras mereken pengajaren si murni  sue ras kata Dibata gelah terjadi perubahen hidup ibas Kreta perbahan ikataken maka kalak Kreta perguak, bali ras rubia-rbia si merawa, kalak rangap si perkisat.

        Enda terjadi perbahan perukurenna lanai bersih tapi enggo iisi alu sura-surana  si ndarami duit saja  guna keuntungen pribadi, emaka teridah perbahanenna pe si lanai patuh, nipu kalak sideban alu cakapna si la erguna, perasatna eme ngguluti jabu kalak alu pengajaren si labage arusna ( Tit 1:10-11).

        Enda ikataken Rasul Paulus man Titus gelah banci mereken pengajaren man kalak Kreta  gelah ia kerina nggeluh alu perukuren si bersih. Sebab nandangi nandangi kalak si bersih pusuh peratenna kai pe bersih kap; tapi nandagi kalak si la bersih pusuh peratenna dingen la erkiniteken , kai pe la bersih , sebab enggo meluat ukur ras pusuh peratenna. ( Tit 1:15).  Emakaman banta pe harus min sijaga gelah perukurenta banci min tetap bersih gelah lagu langkahta la sempat celus. Enda banci silakoken arah kita tetap memperdiateken ras mempergermetken Kata Dibata bagi si ilakoken Daud ibas Masmur  119:15 :

“ Kerina KeputusunNdu ku kusur-kusur ias pusuhku, upergermetken pelajaren si iberekenndu”. Adi bage si lakoken tentu perukurenta pe la tercemar  tapi banci tetap bersih bagi si inanami kalak Kreta. Kalak Kreta enggo tercemar perukurenna lanai bersih emaka :  ngaku ia aka itandaina Dibata, tapi arah perbahanenna teridah labo itandaina Dibata, perukurenna mbau, janah la nggit patuh; kalak enda la ngasup erbahan kai pe si mehuli. ( Tit 1:16)

Pengkenaina :

1.       Kalak si njaga perukurenna tetap bersih maka perbahanenna pe tetap bersih ( mpeturah kemuliaan Dibata)

2.       Kita njaga pergermetken kata Dibata dingen ngelakkenca.

3.       Si anci mencemarip erukurennta banci arah sura-sura si mencari keuntungen diri sendiri  (kebayaken, kesenangen/keriahen doni saja)

4.       Kalaksi bersih peruurenna labo hanya encidahken perbahanen si mehuli tapi ia pe tetap megegeh dingen paguh ibas menghadapi tantangen ras mereken kemalemen ate bagi contoh si enggo siidah arah TITUS,  she maka Rasul Paulus ngataken Titus eme anakku situhu-tuhu rkutken kinitekenta.

5.       Mari sijaga kebersihan perukurennta pe ibas pengaruh pergaulen ras pengerana kalak sideban. Perban lit ikataken maka pergaulan ang buruk merusakkan ang baik yang ada pada kita. Janah arah pengerana kalak pe banci kita salah erbahan tindakan. 

PDS Wari si Pepitukeni

Invocatio             : “erkiteken sie sitatang-tatangenlah janah sisampat-sampatenlah kam bagi sisangana ibahan                                   kami genduari e” (1 Tes 5:11).

Renungen           :   Job  42:9-11

Tema                     :  “Aron Dibata Si Ngkuhi Keriahen”.

                Job eme sekalak sinembah janah erkemalagen man Dibata, ia kalak si mehuli janah lalit  perbahanenna Sijahat (Job 1:1).  Tapi ibas perdalanen kegeluhenna ia ngenanami kiniseraan si mesangat si erbahanca melala pandangen kalak man bana  ibas kiniseraanna e, termasuk pe temanna entah sahabatna si seharusna mereken  penampat alu kata pergegeh entah pe pengapul  ( eme  si Elipas, Bildat ras Sopar), tapi erbahanca turah perdebaten antara Job ras teman-temanna e seh maka ikataken Job :  “pengapulndu pesega-sega aku ngenca “ (Job 16:1). Temanna e ngataken  maka Dibata e masu-masu  kalak  si bujur janah menghukum kalak sijahat. Teman-teman Job erkesimpulen maka kiniseraan si inanami Job e merupaken penghakimen Dibata karna dosa-dosana,tapi ibas ikataken Job maka labo lit salahna, rananna e erbahanca tambah rawa temanna e man bana ( Job 22:1-30). Tapi Job tetap megenggeng ibas kiniseraanna erkiniteken man Tuhan she maka  ibas sie kerina kedungenna Job ngataken :”Genduari kueteh Tuhan, maka kai pe ngasup Kam ngelakokenca kai isuraNdu seh kerina (Job 42:2)

                Pendapat teman-teman Job enda secara umum memang payo, tapi labo payo i terapken pedapat e tanpa ngenehen kualitas kegeluhenna secara menyeluruh. Pendapat sibage la mereken jawaben engkai maka kalak si la erdosa (erbahan kesalahen) maun-maun megalami kiniseraan entah pe kinisuin, sedangken kalak si erdosa (ngelakoken si la payo) maun-maun terhindar ibas malapetaka ( Job 4:7; 5:19-26; 8:5-7,20; 11:13-20). 

                Ibas Job 42:7 -8 : nina Tuhan man Elipas, “Nembeh ateKu kam ras temanndu si dua e, erkiteken la payo kai si ikatakenndu kerna Aku; suruh-suruhenKu Job la bagi kam e. Emaka genduari bahanlah persembahen tutungen man dirindu, janah Job notoken kam. Kubegiken pertotonna maka  la kam kujuruken aminna patut gia kam iukum sue ras kesalahenndu. Kai siikatakenndu karna Aku la tuhu; tapi Job tuhu siikatakenna.

Minter ilakoken Elipas, Bildat ras Sopar kai siikataken TUHAN, janah ibegiken Tuhan pertoton Job. Jenari kenca Job ertoto guna temanna si telu kalak e, senang ka mulihi geluhna ibahan Tuhan, janah iberekenNa man Job kebayaken dua kali lipat Buena asa si mbarenda. Kerina senina ras turangna, bagepe teman-temanna simbarenda reh ndahi  Job . Sekalak sekalak ia mereken Duit ras sada cincin emas man Job sebage tanda ikut erceda ate ibas kiniseraan si enggo irehen Tuhan man bana.

                Enda si perlu siperdiateken ibas kita sada aron, maka kepeken lit nge piga-piga temanta e ibas kita ngenanami kiniseraan, la ngasup mereken entahpe  encidahken kemalemen ate bagi teman-teman Job ndai , tapi amin bage gia Job tetap notoken temanna e, jenda teridah maka salah temannta kepeken labo perlu sipebelin tapi sitotoken man Tuhan Dibata she maka kita pe ndatken pasu-pasu rikut ras temanta emaka tetap terjalin kini ersadaan ibas ndahiken dahin Tuhan. Ibas ndahiken dahin Tuhan e tentuna  melala tantangen sinihadapi kita, ibas situasi sibage sikapta eme tetaplah erpengendes man Tuhan Dibata janah  la perlu mis menyalahken teman tapi ngasup kita sitoto- toton ras mereken kata pergegeh guna menambah semangat ras kemalemen ate, perbahan tek kita maka Dibata e erkuasa ibas kerinana, kai si isuraken Dibata banci jadi ibahanNa. She maka sebage aron Dibata kita tetap ngasup  sitatang-tatangen janah sisampat-sampaten (1 Tes 5:11)bagi nina invocatiota . Alu bage kita banci encidahken ras ndalanken bagi nina temanta “Aron Dibata Si ngkuhi Keriahen”. Ibas kiniersadaannta ndahiken dahin Tuhan e kuh sigejabken keriahen-keriahen si isehken Dibata man banta kerina.