RENUNGAN PEKAN KEBAKTIAN KELUARGA II Korinti 4: 7-10 Renungen : Jesaya 54: 1-10 Tema :“Gelem Padan Tuhan Alu Nteguh” , “Ola aloken uang sogok, sabap uang sogok erbahanca kalak lanai ngidah si benar, janah perkara kalak si la ersalah ibalikken” (Keluaren 23 : 8). Ogen : Nehemia 2 : 1 – 22 Kotbah : I Samuel 16 : 1 – 7 Tema : “ Megermet Milih Pemimpin”

PEKAN KELUARGA WARI I

Invocatio    : Angkatlah pintu gerbang si nuria maka bengket raja mulia, Ise kin raja mulia e?

                      Eme Tuhan si mbisa, Tuhan si permenang i bas perang (Masmur 24:7-8).

Ogen          :  Jesaya 40:3-8

Renungen   :  Matius 1:18-25

Tema          :  “Alokenlah Ketubuhen Jesus”

 ======================================================================

Kata Perlebe

Menaken tahun enda pekan kebaktin Keluarga ilakoken ibas bulan Nopember alu tujun gelah jabu-jabu ngawan ni  perpulungen ersikap ngalo-ngalo advent; eme persikapen ngalo-ngalo  ketubuhen Yesus Kristus

Invocatio,

Teks masmur merupaken salah sada ende-enden pokok ibas Bait Suci Jerusalem. Syairna itulis Daud, janah megati ende-enden enda ilatarbelakangi kubas peristiwa tabut perjanjin ibaba ku Jerusalem. Ibas perkembangenna megati syair  enda iendeken ibas perayaan Hari raya Pondok Daun, perayaan Tahun Baru ras  penahbisan Bait Suci.

Ogen.

 Teks Jesaya 40 igelari Deutro Jesaya, sinuriken Israel sangana ibas masa pembuangen i Babel. Ibas nubuaten si pemena siitulisken pengikut Jesaya enda, isingetken kerna padan Dibata si tetap erdiate nandangi kegeluhen kalak Israel.  Kalak Israel isuruh gelah nikapken dalan ibas ngalo ngalo kerehen Tuhan (Raja Dame) alu merubah lagu langkahna ibas waktu geluh sisingkat e. Arah bahanta lit 2 kali isingetken kerna sora erlebuh alu tema si saling berhubungen ibas ngalo-ngalo kerehen Tuhan, eme:  

Sipemena nekenken kerna pendilo ngalo-ngalo kerehen Tuhan ibas kesuliten ntah pe kesusahen bagepe keterpuruken ibas dosa. Hal enda teridah arah kiasen siitulisken eme : Taneh mesawang (gurun pasir) melambangken jiwa si kerah, deleng ntah taneh bongkak bangkik melambangken kesombongen manusia, baluren melambangken jiwa si patut ikasihani ras la erpengarapen.  Guna ngalo ngalo kerehenNa maka kerina sila mehuli aru sipekena, dungna maka teridah kemulian Tuhan.

Sipeduaken  berisi persinget kerna geluh manusia si singkat pas bagi dukut. Ia dem alu keterbatasen si megati la ia ngasup ngadapisa. Tapi sebalikna kata Dibata tahan rasa lalap. Ijenda lit 2 hal si berbeda eme terbatas ras si la terbatas. Sura-sura Dibata gelah manusia e makeken Kata Dibata e ibas geluhna, sekaligus jadi instropeksi diri gelah makeken geluh sisingkat e alu mehuli.

Kotbah

Nats ibas kitab Matius nuriken kerna berita ketubuhen Yesus. Rikutken  alur teks enda lit piga-piga tahap proses siibentasi ibas peristiwa e; antara lain :

1.      Turah masalah menjelang ketubuhen Yesus.Maria mehuli kulana erkiteken kuasa Dibata. Jusuf    tunangenna ersura-sura nirangken Maria alu sinik-sinik. Iakapna alu bage ia pulah ibas persoalen e nari.

2.      Jusuf ergumul , tapi ipetangkas  Dibata rencanaNa

Asum ia rukur teridah man bana malekat Tuhan  si mereken penerangen man bana. Piah kesungenna  iikutken Jusuf kai siikataken Tuhan.

3.       Ketubuhen Yesus Jawaben Padan Dibata ibas Nubuaten Padan Sindekah

Kai si enggo irencanaken Dibata ndauh ope sie enggo inubuatkenna. Dibata la pernah berubah ibas   rencana si enggo itetapkenNa. Emaka kai si enggo ipadankenna e gundari igenapiNa. Padan siigenapina eme ngataken maka Dibata ras kita (Immanuel), Ia jadi penampat manusia, nebusi dosa manusia.

4.  Jusuf  patuh nandangi perentah Tuhan

Nipi berubah jadi kenyataan. Megi kerina siikataken malekat ndai ibas nipi, Jusuf tuhu tuhu tek ras  ndalanken kerina siisuruh malekat.

Aplikasi.

1.      Ibas kegeluhen enda labo kerina jadi bagi ukur; tapi labo berarti situasi e erbahanca kita sirang ras Dibata. Jusuf  si enggo ngerancang perjabunna rikutken tradisi Jahudi, tapi rencana e kerina  la sue bagi siipikirkenna. Namun erkiteken e rancangen Tuhan, akhirna Jusuf  ngikutken rancangen Dibata. 

2.      Ibas ngalo-ngalo ketubuhen Tuhan Yesus ibas geluhta (perayaan Natal) banci saja melala si la bagi ukurta, namun adi si respons e ibas kacamata kiniteken, kerina banci jadi mehuli rikutken peraten Dibata.

3.      Mari si pesikap ukurta ibas ngalo-ngalo Tuhan Yesus e labo hanya ibas Alvent, tapi ibas gedang-gedang geluhta.

   

Pekan Keluarga Wari II Ken

Invocatio       : “Sabab kam pe tangkas ietehndu maka wari Tuhan e reh bagi penangko si reh asum berngi” (1 Tesalonika 5:2).

Ogen               : Matius 25:1-13

Renungen        : 1 Petrus 1:13-16                           

Tema               : “Ersikap Ras Metengetlah’

Kata Perlebe

Ersikap Ras Metengetlah’ enda merupakaen kalimat perintah aktiv, ertina lit si arus silakoken i bas nimai-nimai kerehen kalak siniarapken kita. Ibas renungen enda  ituriken kerna persikapen ibas ngalo-ngalo kerehen Tuhan.

Penjelasen Teks

I bas ogen ituriken perumpaman kerna sepuluh kalak singuda-nguda maka lima kalak singuda-nguda si pentar eme si ikataken ersikap ras metenget, erkiteken ibabana lampuna ras minak persedianna tapi singuda-nguda si lenge ibabana lampuna tapi la ibabana minak persedianna. Ertina singuda-nguda si pentar enda i bas ertima tuhu-tuhu ndauh iukurina tapi singuda-nguda si lenge meros ntahpe gelah menggo. Enda me iandingken nandangi kalak si enggo iperidiken, radu-radu enggo iperidiken (kalak Kristen) tapi lenga bo tentu seri kualitas kiniteken si teridah arah perbahanenna. Radu-radu ertima, radu-radu munduk-unduk tapi i bas paksana reh si empo e la radu bengket ku bas ingan si enggo isikapken guna kerja e. Guna bengket ku bas ingan e la banci si sampat-sampaten, arah perumpaman enda teridah maka tupung ipindo singuda-nguda si lenge minak man singuda-nguda si pentar, la iberena, si enda ngatakenca maka tep-tep kalak arus ersikap ras metenget.

I bas surat Petrus si ialamatkenna man ‘anak-anak Dibata si enggo ipilih, e me kalak perlajang si merap i belang-belang propinsi Pontus, Galati, Kapadokia, Asia ras Bitinia. Tangkas ituriken Petrus maka kalak si enggo ngaloken Yesus eme kalak si enggo ipilih rikutken sura-sura Dibata bapa, si enggo i bersihken Yesus alu darehNa ras jadi anak-anak Dibata si badia. Badia ertina ikhususken guna Dibata saja, kai-kai saja pe si ilakoken anak-anak Dibata eme guna mpermuliaken Dibata. Perpulungen e lit i bas kiniseran erkiteken kinitekenna man Jesus. Petrus arah suratna mpetetap ukur perpulungen gelah nggeluh i bas pengarapen kerna kerehen Jesus. I bas nimai kerehen Jesus, perpulungen arus ersikap katawari pe. Ersikap ningen e eme alu tetap erpengarapen nandangi pasu-pasu si enggo isikapken Dibata nandangi anak-anakna si tetap njaga kebadianna, njaga kebadian nggeluh eme alu erkemalangen man Dibata, nimbak sura-sura si ndekah (sope lenga ngaloken Jesus). I bas ertima e tentu erbage-bage kiniseran si man alanken, kiniseran e eme sada pengujin nandangi kiniteken si la pekulah-kulah tapi murni (tulen ras sejati). Enda me sinikataken ersikap ras metenget.

Aplikasi

1.      Sikap ersikap ras metenget eme sikap si sangat positif si perlu kel ilakoken kerina jelma ibas geluhna, sabab adi ersikap dingen metenget katawari pe; la melukah ndabuh kubas percuban.

2.      Ersikaplah kita labo hanya guna kegeluhenta i doni enda saja, tapi pe ersikap kita guna kegeluhen kiniteke nta, eme kegeluhen si rasa lalap.

Pekan Keluarga Wari  III

Invocatio             :”Kalak sierkeleng ate ngasup nggengken kai-kai pe, tek maka lit simehuli ibas  kerinana,                                  tetap erpengarapen dingen saber ibas kai-kai pe” (1 kor 13:7)

Ogen                     : Masmur 133:1-3

Renungan           : 1 Tesalonika 4:9-12

Tema                     : “Ngkelengi lebih asa sienggona”

Pendahuluan

                Ibas wari/berngi sipeteluken enda ipeseh ka man banta mulihken eme karna engkelengi. Kekelengen situhuna lanai bo asing man banta selaku kalak si tek man Tuhan Dibata. Kekelengen eme palas kegeluhenta selaku anak-anak Dibata. Sebab bagi sienggo sieteh maka kekelengen rehna ibas Dibata nari, jadi kalak sierkeleng ate anak Dibata kap ia janah itandaina Dibata. Kalak si la erkeleng ate, la bo itandaina Dibata sebab Dibata kekelengen kap (1 Yoh. 4:7-8). Janah bagi sienggo sieteh maka Tuhan yesus pe mereken”Hukum utama ras terutama” man banta siberdasarken eme “Kekelengen” :engkelengi Tuhan Dibata bagepe engkelengi sesama manusia.

                Emaka tek kita maka ibas kita krina enggo nge lit kekelengen e, janah lit nge lalap ingan ibas pusuhta guna kekelengen siterbelinen.Ibas Pekan Keluarga si peteluken enda iajuk kita gelah banci engkelengi lebih asa sienggona, perban arah ndalanken kekelengen e teridah maka kita ajar-ajar (anak-anak Dibata) ( Yoh 13:35).

Isi

Dalanken kekelengen e situhuna labo selukah ngatakennca perbahan melala nge tantangan – tantangen si nihadapi kita ibas kegeluhen enda si banci erbahanca lupa kita maka ibas kerinana arus min tetap teridah kekelengen e ibas kita. Bagi sinihdapi perpulungen Tesalonika, ija ibas Rasul Paulus enggo manteki perpulungen e, melala kel tantangen sinihadapina terutama kel eme arah kalak Jahudi si iri atena (“cian”)  ngenehen Paulus si tuhu-tuhu sangap ibas meritaken pengajaren Kristen i tegah-tengah kalak si la Jahudi, terlebih-lebih, ope si e, kalak enda enggo mulai ipengaruhi agama jahudi,janah bagi si enggo si eteh maka Tesalonika enda  ibu kota propinsi Makedoni eme  kota pelabuhen si makmur ibagian timur laut Yunani janah terletak i tepi jalan raya Egnatia yang terkenal seh maka banci sikataken kota Tesalonika  menjadi salah satu gerbang perdagangen imperium Romawi, si mengakibatken melala ka ajaren-ajaren bangsa sideban si mempengaruhi sikap hidup/kiniteken  kalak Tesalonika.

Ngidah sie maka rasul Paulus erbahan surat man perpulungen Tesalonika  enda gelah kinitekenna la monce janah tetap teridah arah ia ndalanken kekelengen ibas geluhna. Aminna melala gia tantangen ras tekanen si nihadapina Rasul Paulus erpengarapen kel gelah tetap ngasup encidahken kinitekenna arah perbahanen, tetap tutus erdahin erkiteken keleng ate, janah tetap ukur erpengarapen man Tuhan Yesus Kristus.

Rasul Paulus ngidah maka perpulungen Tesalonika enggo ndalanken pengajaren siisehkenna gelah enggeluh sentudu ras peraten Dibata, tapi ipindokenna gelah min dalanken lebih asa sie (1 Tes. 4:1-2)  maksudna maka Rasul Paulus mengingetken jemaat Tesalonika tentang pengangkaanna ibas karna “kasih persaudaraan (Philos- ayat 9)”.  Phileo = Cinta untuk saudara sedarah, janah kekelengen (kasih)e i perluas artinya mencakupkekelengen ( kasih) bagi sesama saudara seiman. Janah e lebih tridah ka ibas sikap hidupna dalanken kekelengen e :

1.    Sehubungen ibas bisnis ras pendahin ibas konteks perkotaan. Ibas bisnis ras pendahin e pe teridah nge kita ndalanken kekelengen, la kita mengharapken untung alu mengorbanken kalak sideban (menghalalken segala cara guna mencari untung, contohna:  “memakai obat-obat/zat kimia ibas bisnis sibanci encedai kesehatan kalak sideban” ras sidebanna..).

2.    Alu sikap hidup sila jadi pengganggu man kalak sideban (batu antuken), entah pe jadi beban man kalak sideban, entah pe ula jadi “kalak si usil”. Tapi tetap berusaha gelah banci enggeluh alu tenang, ola ncampuri perkara kalak sideban, janah erdahin guna keperlundu. Enda ikataken Rasul Paulus perbahan i jemaat Tesalonika lit sekelompok kalak si perkisat bagepe ngganggui kalak sideban pirasatna (Menjadi beban bagi orang lain atau malas bekerja karena senang jadi pengangguran atau orang-orang malas yang senang hidup dengan memanfaatkan kemurahan hati sesama orang Kristen). 

3.    Erdahin alu tutus, she maka ibas erdahin alu tutus maka keperlun geluhta pe banci I penuhi iteruh perkuah ate Dibata sekaligus pe banci ka kita nehken keleng ate ibas ulih latihta erdahin e man temanta si membutuhken. Janah enda pe icontohken Rasul Paulus, maka ia pe erdahin alu tanna, si jadi pengajuk man perpulungen pe gelah jadi kalak mandiri. Sebagai anak-anak Dibata harus pe banci njaga naba baik I lebe lebe kalak si deban alu erdahin ras mandiri (tidak menyusahkan orang lain) termasukpe ibas hal-hal sidebansi banci erbahan kita ihargai oleh masyarakat di sekitar kita.

4.    Tetap nginget maka ndalanken kekelengen enda secara tidak langsung merupakan sarana si efektif bagi kesaksin Kristen (bandingkan dengan Yohanes 13:34-35; Kisah Para Rasul 2:44-47) I tengah tengah kegeluhennta.

5.    Ndalanken kekelengen mpeturah kiniersadaan si teridah arah sikap hidup bagi kalak si ersenina ersada perarih, janah ibas kiniersadaan e pe tergejap kemalemen ate janah ije me Tuhan erpadaereken pasu-pasuna. (Mas 133).

Aplikasi.

Tantangen hidup enda terus mengalami perkembangen, tap guna mengimbangi sie maka kit ape kaak sierkiniteken man Tuhan aru banci ka mengimbangi sa alu  peningkaten keleng ate ibas geluhta. Perbankekelengen e nge si erbahanca banci kita ndatken kemalemen ate ibas geluhta.  Emaka ibas sienda ipindokenman manta mari sidalanken bagi nina temata “ Ngkelengi lebih asa sienggona” si teridah ibas sikap hidupta ibas jabunta,keluarganta/-kadenta, lingkungenta, pendahinta, terlebih ibas perpulungenta kerina.

     Arah kita ndalanken kekelengen e teridah nge uga belinna kinitekenta man Tuhan Dibata janah kita kerina sebage anak anak Dibata, sebab enggo sieteh maka Dibata kekelengen kap, jadi kalak sierkeleng ate anak Dibata kap ia janah itandaina Dibata. Kalak si la erkeleng ate, la bo itandaina Dibata sebab Dibata kekelengen kap

Pekan Keluarga wari IV

Invocatio      :  “Jabu ipanteki erpalasken kepentaren ras pengertin, ija lit pemeteh, ije lit bilik-bilik kuh ras barang-barang si meherga ras mehuli” (Kuan-Kuanen 24:3-4).

Ogen            : Epesus 5:21-23

Renungen     : Kejadin 2 :18-24

Tema           : “Kiniersadan Jabu Eme Sura-Sura Dibata”

Kata Perlebe

Ibas sada pernyataan ikataken maka “….. kehidupan keluarga yaitu memberi perlindungan dan rasa aman serta dimana ‘berdoa dan beribadah’ dilakukan”. Ertina, maka keluarga ntah pe jabu eme ingan si mpersadaken isi jabu e lako banci ndatken perlindungen ibas kerina keadaan dingen ibas jabu e pe lit rasa aman si erbahanca maka kerina isi jabu e mengayak rusur lako mulih ku jabu na. Rikutken sikataken invocation nta, Kuan-kuanen 24:3-4, maka Dibata kap si arus erdahin ibas kegeluhen keluarga e, arah kepentaren ras pengertin si iberekenNa ibas jabu e, si turah ibas nggeluh erkemalangen man Dibata (Kuan-kuanen 1:7). Ulihna enggo kap icidahken Masmur 128:1-6, eme lit kemalemen ate ibas kegeluhen jabu e subuk secara kula bage pe pertendin.

Emaka, kerina isi jabu arus mpeturah pengangkan bahwa keberadaanna ibas jabu eme lako ‘saling melengkapi’ dingen jadi aron Dibata ibas erjuang guna nehi sura-sura Dibata itengah-tengah doni enda arah jabu nta nari. 

 

Penjelasen Teks

Ibas teks enda Lit piga-piga proses si ilakoken Dibata nangdangi manusia, eme

1. Dibata ngidah maka la mehuli manusia e nggeluh sisada; turah ide ibas Dibata guna erbahan teman sicocok man manusia e.
2. Dibata berkarya guna penyempurnaan manusia alu  erbahan rubia-rubia; tapi e pe lenga cocok
3. Dibata erkarya guna erbahan Hawa  melalui proses keterkaiten ras Adam; eme  alu membentuk diberu ibas taneh ras tulan rangrang Adam nari; dingen e maka enggo cocok.  Teks renungen enda pe memperkuat kita lako memahami bahwa manusia e kerinana mutlak sebagai bekas tinepa Dibata. Janah hubungen dilaki ras diberu e pe merupaken bagin ibas sura-sura Dibata  Emaka la banci si tualen dingen la banci erbahan batasen kerna ganjang teruk keberadaan manusia e.

Dage, menaken ayat 18 – 24 enda siidah maka kerina manusia si lit ibas jabu eme bekas tinepa Dibata dingen ipersadaken Dibata lako ndalanken sura-suraNa. Sura-suraNa e la terjeng ibas seputaren geluh manusia e saja tapi pe ibas kerina keutuhan ciptaan Dibata e. 

Aplikasi

1. Dibata si nepa manusia e ras ngelitken jabu

Sura-sura Dibata manusia nggeluh  la erbana-bana melainken mpersadaken dirina lako nggeluh rikutken si ngena ate Dibata (bnd Ep. 2:10)

2. Dibata kap sijadi “Inisiator” ibas kiniulin geluh manusia e

Peranan Dibata labo terjeng nepa tapi pe nikapken kerina kebutuhen manusia e (Kej 1:1-31)

3. Kerina isi jabu iarapken memiliki kepatuhen si payo.

Kepatuhen e arus ibenaken lebe ibas ndehara ras perbulangen (nande ras bapa) maka kedungenna biak si bagenda pe itularken man anak-anak (bnd Ep. 5:21-23), eme ulih pemasu-masun ibas Dibata nari, eme kerina si mehuli ras meherga,

 Pekan keluarga Wari ke-V

Invocatio : “kubaba ateku baNdu persembahen pengataken bujurku, janahku ertoto man baNdu” (Masmur 116:17).

Ogen        : Perb. 5:1-11

Khotbah   : 1 Sam. 1:1-5

Tema        : Jabu Sinehken Persembahen Alu Payo

Kata Perlebe

Nehken persembahen eme perbahanen si tep-tep wari si lakoken ibas kegeluhenta, baik persembahen secara materi bagepe sebagai persembahen si nggeluh eme perbahanenta. Engkai maka kita harus mbereken persembahen?. Adi Daud ngatakenca (Masmur 116), mereken persembahenna man Tuhan, erkiteken Daud nggo gejapken keleng ate Tuhan si enggo menyelamatken geluhna

Penjelasen Teks

Ibas ogen ituriken maka  Dibata la erngena ate nangdangi kemunafiken. Kai siipraktekken Ananias ras Safira eme kebohongan baik man manusia bagepe man Dibata; tapi ternyata Dibata la terbuali. Ibas praktek kebohongen e pe Ananias ras Safira la nggit bertobat. Akibatna kematen si kerajangenna. Arah renungen ogen enda iperbaharui tole makna kejujuren man banta.  Mari kita nggeluh jujur bagi si ngena ate Dibata. Nggeluh sebagai kalak bujur merupaken persembahen si mehulina man Dibata.

1 Sam.1:1-5 sibanci inen bagepe ipelajari kita eme ija Elkana simbaba jabu ku Silo guna nehken persembahen man Tuhan (setiap tahun ilakonenna), emaka keluarga Elkana ikataken keluarga si mbiar man Tuhan. bage pe ija Elkana tetap ngelakoken kejujuren ibas ia mempersembahken persembahenna man Tuhan bage pe membagiken bagin guna ialokenna man kerina anggota keluargana (lalit pilih kasih, ay.5)). La bagi keluarga Ananias ras Sapira, alu sekongkol nokohi Tuhan, ibas ia nggo ngaloken pasu-pasu (ndayaken tanah).

Aplikasi

1.      Nehken persembahen si mehuli eme  ula alu pusuh jungut-jungut ntah pe terpaksa, tapi asa ukur, asa gegehta lit.

2.      Kita nehken persembahen labo sebagai kepatuhen ndalanken aturen-aturen si lit; tapi si sehken persembahenta ku rumah pertoton sabab si gejapken kerina kiniliten si lit ibas kita e bekas pasu-pasu Tuhan. Bagepe labo gelah teridah tempa melumbar bagi Ananias ras Safira, padahal enggo ibualina Dibata

3.      Siperdiateken jabunta pribadi-lepas pribadi; uga nge kita ibas nehken persembahen man Tuhan. Enggo me sigejapken bahwa siibereken kita baik perbahanenta bagepe secara materi sibereken si mehulina man Tuhan? Enda jadi perenungen pribadi man banta.

an Kebaktin Keluarga Wari-VI

Invocatio   : “Ola aloken uang sogok, sabap uang sogok erbahanca kalak lanai ngidah si benar, janah perkara kalak si la ersalah ibalikken” (Keluaren 23 : 8).

Ogen          :    Nehemia 2 : 1 – 22

Kotbah      :    I Samuel 16 : 1 – 7

Tema          : “ Megermet Milih Pemimpin”

Kata Perlebe

Pekan Kebaktin Keluarga GBKP ibas wari / berngi sipeenemken enda ateta alu radu ras ngorati ras mpebagesi tole pengangkanta kerna kata Dibata gelah alu bage tugas ras tanggungjawabta sebage warga Negara banci idalanken alu payo ras singena ate Dibata, gelah terpilih pemimpin si erkemalangen man Dibata bagepe keleng atena rakyat si ipimpin.

Penjelasen Teks

Invocationta (Keluaren 23 : 8) ngatakenca “ola aloken uang sogok, sabab uang sogok erbahanca kalak lanai ngidah si benar janah perkara kalak si la ersalah ibalikken”. Enda merupaken teguren Dibata man Bangsa Israel, erkiteken tupung si e ilakoken Bangsa Israel keadilen si la ngena ate Dibata bagepe praktek kegeluhen kinilabujuren. Merupaken hal si la gena ate Dibata ibas ngaloken uang sogok tupung si e i tengah- tengah kegeluhen bangsa Israel khususna man kalak si banci ikataken kekuaten ekonomina  megegeh. Banci igalarina keadilen ras kebujuren e sue ras sura- surana ras kedungenna jadi me penindasen man kalak musil. Teguren Dibata enda ipesehNa man bangsa Israel gelah bangsana enda mulihi ngelakoken keadilen ras kebujuren bas kegeluhenna.

Ogenta Nehemia 2:1-22 nuriken kerna turi- turin kerna majekken  tembok kuta Jerusalem, simimpin pembangunen tembok e, eme Nehemia, si isuruh Raja Persia guna merentah Juda. Tambah si e Nehemia pe erbahan Pembaharun Subuk ibas masyarakat bagepe keagaman. Ituriken ka ibas kitab Nehemia enda, Esra singogeken Undang- Undang Dibata alu megermet jenari bangsa e ngakuken dosana. Ituriken pe kerna kegiaten-kegiaten Nehemia seterusna selaku Gubernur Juda. Sipatut iperdiateken ibas kitab enda eme kerna bagesna penalemen Nehemia man Dibata janah ketutusenna ertoto man Dibata. Ibas bahan ogenta enda teridah uga perukuren Nehemia kerna kondisi si jadi tupung si e kerna kehancuren Jerusalem ras tembok Jerusalem sangana Israel i taban ku Babel. Ibas ayat 17 ikataken Nehemia, “Nehenlah uga susahna siakap genduari erkiteken Jerusalem lalap lenga ipekena kenca kin nai tembokna runtuh dingen ipan api. Sipajekkenlah mulihi tembok kuta e maka kalak lanai megombang man banta”. Teridah ijenda uga kearun ate bagepe kinigogon Nehemia kerna keadaan Jerusalem ras tembok Jerusalem si enggo hancur ras sebage pemimpin lit tekad ras sura- sura guna mpekenasa gelah kalak sideban lanai megombang man bangsa Israel. Ieterusken Nehemia ka ibas ayat 18 uga Dibata nemani ras nampati ia ras kai si enggo ikataken raja man bana. Emaka ngaloi kalak ndai  “ota si pajekken mulihi!”

Khotbah I Samuel 16 : 1-7 nuriken kerna uga proses Dibata milih pemimpin itengah- tengah bangsa Israel. Nina Tuhan man  Samuel, Asa kai nari dekahna atendu ceda kerna Saul? Enggo kutulak ia jadi Raja Israel. Tapi genduari buatlah minak saitun jenari laweslah ku Betlehem  ndahi Isai, sabab enggo Kupilih sekalak anakna jadi raja” (ayat 1). Enggo itetapken Dibata  sekalak raja itengah- tengah bangsa Israel guna mimpin bangsaNa e kedungenna. Emaka adi siterusken kubas ayat 2-7 maka alu terang ras jelas banci sipergermetken maka peran/otoritas Tuhan teridah kal. Isuruh Tuhan gelah Samuel maba sada anak lembu guna erbahan persembahen gelehen man baNa sebab lit kebiaren Samuel maka kenca Tuhan erpadan keputusen nulak Saul jadi raja  banci saja ibunuh Saul Samuel. I undang ka Isai kubas lakon persembahen e jenari Tuhan enggo ngatakenca kai siman bahanen. Tangkuhkenlah jadi raja kalak si Kutuduhken man bandu. Tuhan berperan kal bas milih ras memutusken raja itengah- tengah bangsaNa Israel ras sura- suraNa emekap gelah terbentuk “Pemerintah Teokrasi”, Pemerintahen/raja si Tuhan tetap “berotoritas”. Ibas ayat 7 nina Tuhan, “ola nehen kuga gedangna ras kuga jilena rupana. La ia Kupilih, sabab pertimbangenKu la bali ras pertimbangen manusia. Adi manusia inehenna si teridah arah darat tapi Aku Kupernehen pusuhna”. Enda encidahken maka cara Tuhan milih labo seri “berbeda” ras cara siilakoken kebiasan manusia.

Aplikasi         

1.      Sehubungen ras pemilihen kepala daerah (Pilkada) siilakoken secara serentak ibas negaranta, emaka guna mpersiapken kita, Moderamen GBKP mpedarat pengelayasi guna kita ersikap ngalo-ngalosa eme:

-            Gunakan hak pilih berdasarkan hati nurani sebagai kehendak Tuhan demi kesejahteraan rakyat dan kemajuan Daerah.

-            Pilihlah calon kepala daerah yang diyakini bisa menjadi sumber berkat bagi rakyat dan daerah.

-            Pilihlah calon pemimpin yang berjiwa melayani dan sepenuhnya “ Pro Rakyat” yang tidak  mengandalkan politik uang.

-            Jadilah “ Garam” dan “Terang” dalam proses PILKADA dengan membawa “ Suara kenabian” dan tidak bermental pragmatis.

-            Jangan terlibat atau terjebak kedalam golput dan jangan pula ikut politik uang.

2.      Arah bahan oratenta sekali enda ipersingeti kita mulihi maka  milih pemimpin labo hal si menukah. Perlu kal i je kita ertimbang bagepe rukur alu mbages. Erkiteken adi salah kita milih pemimpinta, masyarakat si bakal nggejabken ulih kai si ilakoken pemimpin e. Emaka rikutken bahan oratenta sendah lit piga – piga cataten sibanci jadi perenungenta ras ras emekap:

v  Sibereken kesempaten man Tuhan guna “ berotoritas” ibas milih pemimpin alu cara kita masyarakat sibakal milih pemimpinta ertoto ras mindo kepentaren sirehna ibas Tuhan nari.

v  Sidalanken praktek si benar alu erkemalangen man Dibata ibas kita milih pemimpinta emekap labo kita nggit mpedalan uang sogok ras nggit ngaloken uang sogok ntah pe ibas istilah genduari la kita nggit bengket kubas permainen “money politic”. Prinsip “spiritual” ras “moral” sebage kalak Kristen arus ikedepanken.

v  Bagi Nehemia ibas kegeluhenna, tanggungjabab kalak Kristen bagepe warga GBKP bagepe pemimpin sibakal mimpin masyarakat emekap mpekena ras mpehuliken si enggo ceda.

v  Jadilah pemilih si “ cerdas” ras “berhikmat” alu palas  erkemalangen man Dibata.

v  Jadilah pemilih si “proaktif” alu reh ku tempat pemunguten suara ( TPS ) ras mereken hak soranta ibas tanggal pemilihen si enggo itentuken.

  

PEKAN KEBAKTIAN KELUARGA  WARI KE VII

Invocatio   : Janah Ingetlah Aku tetap Ras Kam Seh Ku Kedungen Zaman (Mat. 28:20b)

Ogen         : II Korinti 4: 7-10

Renungen  : Jesaya 54: 1-10

Tema         :“Gelem Padan Tuhan Alu Nteguh”

Jesaya 54 (bagin Deutero-Yesaya) itulisken sanga kalak Israel (Selatan = Yehuda) enda lit ibas pembuangen i Babel. Catatan sejarah la mereken bukti litna kekerasan fisik atau kerja paksa ibas masa-masa e, jadi labo penderitaan fisik si ialami umat tapi krisis identitas. Kalak Israel tek makana ia me bangsa pilihen Tuhan. Tuhan erkeleng ate dingen ndeher ras ia. Tapi ibas masa pembuangen enda, bagi enggo itadingken Tuhan ia kerina, erkiteken harus itadingkenna Jerusalem, kota suci bagi bangsa Israel. I je lit Bait Allah, yang diyakini sebagai ingan Tuhan Allah tading. Jadi ibas paksa si e kalak Israel merasa enggo itadingken Tuhan me ia. E erbanca aru atena. Tulisen nabi Jesaya enda bertujun guna mpegegehi umat i tengah kearun ate si jadi pergumulen selama puluhan tahun enda.

Ayat 1-3 : Kota Jerusalem akan mengalami pemulihan. Bagi diberu si la mupus, la menghasilkan (la produktif), bage me Jerusalem sedekah enda, melungen, tapi akan dipulihkan. Jerusalem akan menjadi ramai kembali, dengan jumlah yang lebih besar, karenanya butuh perluasan tempat, bagi kemah si arus ipebelin. Kuta-kuta si sedekah enda kosong la lit penghuni akan kembali dihuni bangsa si enggo enterem e.

Ayat 4-6 : Hubungen Jerusalem ras Tuhan Dibata bagi ndehara ras perbulangen. Ia perbulangen sekaligus si nepa umatna e. Bagi ndehara si nguda denga erceda ate itadingken perbulangen, tentu ceda ate, mela, tapi mulihken ia ilebuh. Lanai mela iakapna, lanai ia igombangi kalak, emaka ipegegehi gelah ola mbiar. Enda jadi sada janji pemulihen si mereken pengarapen si mbaru man bangsa Israel.

Ayat 7-8 : Kekelengen Tuhan nandangi umat pilihenNa tuhu-tuhu kekelengen si mbelin. La ipediatNa ndekah umat e ngenanami kiniseran bagi diberu mbalu. Ilegi Tuhan mulihi alu kekelengen si mbelin. Hubungan Tuhan ras umat pilihen akan diperbaharui erkiteken kekelengen Tuhan. La rasa lalap Tuhan ernembeh ate man umat pilihenNa. Selalu lit pengampunen si iprakarsai oleh Tuhan sendiri, erkiteken keleng ateNa e.

Ayat 9-10 : Bagi padan Tuhan man Nuah (Nuh), ndigan pe lanai ibahan Tuhan kelenglengen si ndemi doni, bage ka pe Tuhan erpadan man umatNa maka ndigan pe lanai ia itembehi Tuhan, lanai iukum, lanai irawai. Janji si tuhu-tuhu menghibur dingen menguatkan ibas masa-masa krisis identitas. Bicara deleng-deleng miser, uruk-uruk mundu-undu, keleng ate Tuhan la miser ibas umatNa nari.

Refleksi:

1. Ngataken bujur kita erkiteken Tuhanta eme Tuhan si adil ras erkeleng ate. Selaku Tuhan si adil, di kune kita erbahan si la bujur, si la ngena atena, reh teguran keras man banta. Tapi nembeh gia ate Tuhan ngidah perbahanenta, la rasa lalap pernembeh ateNa e. La itadingkenNa kita, tetap lit pengalemi dosa iberekenNa banta janah lit kesempatan guna jera dingen robah selama kita erkesah denga.
2. Ngikutken Jesus berarti siap kita muat bagin ibas kiniseranNa. 2 Korinti 4: 10 “Kiniseran Jesus si maba kematen lalap ipersan kami jadi baban kula kami, gelah kegeluhenNa pe jadi tangkas ibas kula kami.” Kinigenggengenta labo rehna arah gegehta tapi erkiteken kita nggit ngusih Kristus. Kita ngasup maba baban si mberat bas geluhta erkiteken Kristus. 2 Korinti 4: 17 njamini kiniseran e labo ndekah, ulihna e me kemulian sirasa lalap. E jadi pengarapen kalak si tek ibas nimai peringeten kerehen Tuhan Jesus memasuki masa advent enda bagepe nimai kerehen Yesus pedua kaliken.
3. Ibas kondisi kegeluhen siugapana pe, Tuhan tetap engkelengi kita. Geluhta si dem alu perbeben banci berubah jadi geluh si dem keriahen ukur. Enda banci jadi adi kita nggit ngaloken pendiloNa. Baban geluhta siserahken ku IA gelah ia merekan serpang pulah. Janji Tuhan memulihkan keadaan umat Israel juga sampai kepada kita selaku kalak si erkiniteken. Amin pe gundari ibas jabu lit persoalan antara bapa ras nande, perlagu langkah anak ncedai pusuh orangtua, anak pe merasa la nyaman i rumah erkiteken la siangkan, ntah kondisi ekonomi keluarga sangana goyah, ras pergumulen si debanna, tetap min tek nandangi padan Dibata, semua akan dipulihkan. Emaka tetap erpengendes, ertoto la erngadi-ngadi (Roma 12: 12). Ula kita ragu. Tetap megenggeng dingen gelemlah padan Tuhan alu enteguh. Tuhan tetap engkelengi kita.