LITURGI KEBAKTIN NATAL KELUARGA TAHUN 2015

LITURGI KEBAKTIN NATAL KELUARGA

TAHUN 2015

 

Thema         :  Tapi aku ras isi jabuku Tuhan saja ngenca isembah kami

Sub Tema    :  Reh tetapna ukurta ras jabuta guna ersembah man Tuhan Dibata arah natal tahun 2015 enda.

                      Persiapan

1.   Rende KEE 114:1,2 (“Sendah Jumpa Kita Wari Raya E”) 

      1)   Sendah jumpa kita wari raya e, Peringeten tubuh Tuhan Yesus e,

            Nusur ndahi kita manusia e, Keriahen kap e.

            Ermulia me Tuhanta, E sipuji me gelarNa.

            Perdamen ib’re Dibata, Tuhan Yesus kap e.

      2)   Mari kita ku kuta Betlehem e, Muji nembah man Tuhanta Yesus e.

            E tinenges Tuhan si perkuah e, Dibata Bapa e.

            Ermulia me Tuhanta, E sipuji me gelarNa.

            Perdamen ib’re Dibata, Tuhan Yesus kap e.

2.   Pendilo Kubas Kebatin

Senina ras si ikelengi Tuhan Yesus Kristus meriah ukurta, pulung kita sendah erbahan perayaan wari Natal, mperingeti wari ketubuhen Tuhan Yesus, Juruselamatta i bas tahun enda. Enggo itemanina perdalanen geluh keluarganta i bas lias ateNa nge gelah kita lalap nggeluh selaku keluarga si erkemalangen man baNa ras nggit ngelakoken kerina perentahNa. Emaka marilah si bengketi Kebaktin Natal enda alu dem keriahen sabap enggo tubuh Tuhan Penebusta.

3.   Rende PEE 107 :1,3(“Sada soranta muji Dibatanta”) (perpulungen tedis)

      1)   Sada soranta muji Dibatanta Ia jine si njayam kegluhenta

            Lalap Ia ngekelengi tinepaNa maler me kap tetap pasu-pasuNa

      3)   Sada soranta muji Dibatanta lit perbeben brekenNa dalan pulah

            Glah min kitaa enda jadi erbuah maler me kap tetap pasu-pasuNa

                      Kebaktin

1.   Votum & Salam

      L    : Kebaktin Natal keluarga  enda ibenaken i bas gelar Dibata Bapa si erkeleng ate man doni enda, i bas gelar Kristus si jadi ulu kekelengenta,  ras i bas gelar Kesah si Badia si mereken keriahen lako tetap ngkelengi sada ras sidebanna.

               Perkuah ate ras dame i bas Dibata Bapa ras i bas Tuhan Yesus Kristus nari, ibas kerembaken Kesah si Badia ras kam kerina gelah. Amin.

      P    : Amin..., Amin..., Amin...

2.   Introitus

“Tapi kalak si megiken Kata Dibata dingen ngdalankenca, kalak si bage nge ndatken kemalemen ate si tuhu-tuhu” (Lukas 11:28b).

3.   Rende KEE 115:1,2 (“Keriahen Si Mbelinna”)

      1)   Keriahen si mbelinna, Si kuberitaken e.

            Enggo tubuh si Permakan, E me Tuhan Yesus e.

            Pujilah min Dibatanta, Ras dame, dame, dame man banta.

            Dibatanta si erkuah ate, Man kita jelma e.

      2)   Ibas berngi enda terang, Bintang si mehelhel e.

            T’rangna seh ku perukuren, Si lanai erlayas pe.

            Pujilah min Dibatanta; Ras dame,dame, dame man banta.

            Dibatanta si erkuah ate, Man kita jelma e.

4.   Persembahen pujin  : Solo, VG, Puisi                      (perpulungen kundul)

5.   Responsoria

L                        : Sikataken bujur man Tuhan nggo ka kita pulung ibas natal keluarga tahun enda

p                         :  Meriah ukur kami Tuhan nggo pulung kami kerina ibas natal tahun enda

L                           : Igejabken kami nge maka kerina kami kalak perdosa,  kinulin  kami pe melket kerina. Kami melus desken bulung-bulung si nartar, dosa kami ngkabangken kami desken angin meter.

P                        :  Kurang setia kami man baNdu, kurang kami engkelengi Kam ras sapih-sapih kami manusia.

Bapa & Nande   :  Gejapken kami Tuhan, kurang ngasup kami jadi usihen man keluarga kami, lalap denga kami ikeleweti aru ate.

Anak-anak         :  Kami pe kurang ertanggung jawab sebage anak, dekahen kami menuntut asangken erbahan simehuli itengah-tengah geluh kami.

L                        :  Emaka Tuhan, ajarinNdu kami gelah tetap ngasup erdalin arah kebenarenNdu

P                         :  Sabab Kam kap Dibata kami, Kam kap si ngkelini kami. Man baNdu saja kami ernalem.

L                        :  Alemilah dosa-dosa kami o Tuhan, gelah reh ngasupna kami engkelengi Kam ras kalak sideban isekelewet kami.

P+L                    :  Amin

7.   Nagani Lilin Natal Rende KEE 135:1-3 (“Berngi E, Nggo Kepe”)

   L    : Nina Tuhan Jesus : “Aku reh ku doni enda bali ras terang, gelah kalak si tek man bangku la tading ibas gelap....

   P       : Kami nagani lilin enda gelah terang Kristus mpegegehi kiniteken kami dingen mpengasup kami guna sikeleng-kelengen

.....................................lilin isagani janah perpulungen tedis.......................................

      1)   Berngi e, nggo kepe, Yesus reh ku doni e.

            Nusurlah ngangkut dosanta me kin,

            Jadi kap musil lah sangap pagin. Asa si tek Tuhan e. 2x

      2)   Anak e, bujur pe, Si ngena me aku e. KiniulinNdu tadingken Kam kap,

            Bengket ku doni lah t’rang si gelap. Aku daramenNdu e 2x.

      3)   Berngi e, nggo kepe, Tuhan reh ku doni e.

            Padan Dibata teridah tetap, KinikelengenNa banta me kap.

            Tuhan sipuji gelah 2x.

8.   Renungen Natal                                                         (perpulungen kundul)

9.   Pengakun Kiniteken

10. Persembahen Pujin : VG, Koor, Solo

11. Nehken Persembahen

   L    : Kata Dibata ibas kita nehken persembahen : “Itehndu uga liasNa Tuhanta Yesus Kristus, maka aminna bayak gia Ia, tapi guna kiniulinndu, ipemusilNa baNa, gelah arah kemusilenNa e jadi bayak kam”. (2 Korinti 8:9).

      Rende PEE 27:1- (“Si Endekenlah ‘Nde-‘Nden Si Meriah”)

      1)   Si endeken ‘nde-‘nden si meriah, Man Tuhan-nta si ‘nggo tubuh bas pelangkah,

            Sabab patut nge k’rina kita nembah, Ban babaNa terang ngaruh ras pe tuah.

            Refr  : Dage mari kita kerina, ‘Lah si puji gelar Dibata,

                        Ulanai ukur erbera. Tuhan Yesus me kap Rajanta.

      2)   Tuhan Yesus metunggung dat pujin, Perban Ia si ngajari kita kin

            Kek’lengenNa la erkeri-kerin, Adi pakelah pedahNa seh pagin.

            Refr  :

      3)   Gelgel nari suratken  nabi-nabi, Reh me S’kalak si nampati ku pertibi

            Em Pemere idur Dibata nari, Enggo tubuh i Betlehem tengah berngi

            Refr  :

      4)   Tuhan Yesus kuinget min Kam rusur, ‘Lah babaiNdu pergeluhku ku si bujur

            ‘Di dage kiniteken la erkusur, Enggo paguh gia lit rusur si ngugur

            Refr  :

12. Pertoton Persembahen  ras  Pertoton Syafaat

13. Responsoria : Tekad guna tetap ibas keleng ate Tuhan    (perpulungen tedis)

      L :  Perban keleng kel ate Dibata doni enda, emaka iberekenNa anakNa si tonggal, gelah kerina kalak si tek man Anak e la mate tapi dat kegeluhen si tuhu-tuhu si la erkeri-kerin.

      P :  Bujur man baNdu Tuhan, tetap ikelengiNdu kami. Emaka erpadan kami, maka nggit kami ngkelengi Kam alu bulat ukur kami, ikelengi kami keluarga kami, teman-teman kami, anggota perpulungen bage pe kalak si pernah nakiti kami, ajari kami ngasup kami memaapkenca ras ngkelengisa.

     

20. Rende PEE 122 :1-2 (“Tuhan Kap si empuna geluhta”)

      1.   Tuhan kap si empuna geluhta gegehta Ia simerekenca

            Kiniteken pe ras pemetehta epe Ia sinjujurkenca

            Ia kap erbanca kita sangap tetaplah man Ia kita ngarap

            Direh susah brena serpang pulah tendi kula mejuah-juah

      2.   Dage tetplah bulat ukurtageluhta pe lalap min erguna

            Lagu langkah pe la sia-sia gelar Tuhanlah ermulia

            Adi jumpa kita si mesera pengarapen ula kel min pera

            Kune riah ukur kita jumpa nehken bujur ula kel lupa

21. Pertoton Tuhan

22. Pemasu-masun

   L    : Mulihlah kam alu mejuah-juah, janah alokenlah Pasu-pasu i bas Dibata nari: Enggo isehken Dibata padanNa man bandu, maka malem atendu sabab enggo tangkas iidahndu alu matandu jine penampat si rehna i bas Dibata nari. Amin!

      P    : Amin..., Amin..., Amin...

RENUNGEN NATAL 2015

Josua 24 : 15  

            Kekelengen Tuhan. Ibas natal tahun enda mpegegehi kita ibas ngadapi kerina persoalen kegeluhenta. Tentuna melala hal si nggo ialami kita ibas tahun enda, bulan enda eme penghujung kerina pengalamen keguluhenta tahun 2015. Susah senang nggo ibentasi kita, pagit entebu ras macemna geluhta pe nggo inanami kita. Tapi min penggejapenta maka ibas sie kerina la pernah kita itadingken Dibata, tetap kita iteguna tetap kita itemanina. Bagem perenungen si seh man banta wari enda arah pengakun Josua maka tetap kel ukurna ibas erkiniteken man Dibata. kita pe iarapken tetaplah min ukurta lalap erpengendes man Tuhan ibas kerina paksa.

            Josua sekalak kepala keluarga ras sekaligus kepala suku Efraim si nggantiken Musa guna mimpin bangsa Israel erbahan sada pengakun ntah pe ikrar si cukup dramatis si isehkenna nandangi bangsa Israel. Memang hal enda ilakoken Josua guna mereken dampak si mehuli nandangi bangsa Israel gelahna pengakunna e labo saja jadi pengakun si kosong ntah usang tapi tuhu-tuhu mereken ngaruh si mehuli nandangi kiniteken bangsa Israel. Janah arah pengakunna e banci min jadi pedoman, jadi anuten, jadi usihen nandangi bangsa e, lanai erbera-bera ntah sangsi ia guna nembah man Dibata. bageme cara Josua minpin jabu ras rakyatna seh maka mbelin kel idah ngaruh Josua ibas bangsa e.

            Ibas natal tahun enda marilah kita elajar arah kegeluhen Josua si tuhu-tuhu lit komitmen ras ketetapen ukurna ibas ersembah man Dibata. Janah banci ka min si terapken ibas kegeluhen jabu ntah keluarga ta

1.      Nggeluh mbiar ras erkemalangen man Dibata

Ibas pengakun Josua teridah jelas maka nteguh kel komitmen Josua erkiniteken man Dibata. adi sinen ibas kuan-kuanen 1:7 maka ikataken ije guna ndatken pemeteh si la banci lalit ibas kalak eme mehamat dingen erkemalengen man Dibata. Adi si gelemlah perentah enda tentuna kita nggeluh mbiar ras erkemalangen tetap man Dibata saja ngenca.

2.      Ngajari keluarga ras isi jabu

Tentuna ersembah mehamat ras erkemalangen perlu iajari nandangi isi jabu, khusus na anak-anak. Uga ersembah alu tutus, ihklas ras setia, la mekarus ras tetap mehamat man Dibata. pengajaren enda labo banci ipaksaken tapi banci min sicidahken arah sikap nggeluhta sebage peminpin ibas jabu. Nande ras bapa ibas jabu ngasup min mere ngaruh simehuli nandangi anak-anak terlebih ibas kinitekenna. Enda eme tugas ras tanggung jawab si mbelin ibas jabuta masing-masing.

3.      Njagai kesetian kinitekenta man Dibata

Pengakun Josua ibas ayat renungenta enda jelas kel siidag ugakin sikap Josua situhuna. Melala kepeken hal sierbahanca bangsa Israel la setia man Dibata, penyembahen berhala si erbahanca ia ndauh ras Dibata. mungkin jaman gundari enda pe melala hal si erbanca kita kurang setia man Dibata ibas penyembahen berhala ibas bentuk si berbeda misalna duit, karir, jabaten, popularitas ras sidebanna. Marilah tetap si jaga kesetian kinitekenta man Dibata.

4.      Mpergunaken kesempaten ras pilihen alu mehuli

Ibas renungenta enda pe teridah nge situhuna lit kesempaten ras pilihen siicidahken Josua. Tapi pe cidahkenna ka nge keputusen kai siibuatna. Kita pe bas geluhta tentuna lit nge kesempaten ras pilihen guna ndauh bas Dibata nari. Tapi marilah sitetapken keputusenta. Maka siakukenkenlah “tapi aku ras isi jabungku Tuhan saja ngenca siisembah kami”

            Selamat natal man banta kerina. Tuhan si masu-masu kita. Amin