: Jesus Kristus me si maba kita bengket ku bas lias ate Dibata erdandanken kinitekenta. Janah ibas lias ate Dibata eme kita nggeluh dingen ringan. Dage meriah ukurta sebab lit pengarapenta maka kita ikut dat bagin ibas kemuliaan Dibata. (Roma 5:2) Ogen : Maleakhi 3:1-4 Khotbah : Pilipi 1:3-11 Tema : Ngenanami Lias Ate Dibata

Sermon  Khotbah  Minggu  6 Desember  2015  i Penen

Invocatio      : Jesus Kristus me si maba kita bengket ku bas lias ate Dibata erdandanken kinitekenta. Janah ibas lias ate Dibata eme kita nggeluh dingen ringan. Dage meriah ukurta sebab lit pengarapenta maka kita ikut dat  bagin ibas kemuliaan Dibata. (Roma 5:2)

Ogen                     : Maleakhi 3:1-4

Khotbah               : Pilipi 1:3-11

Tema                     : Ngenanami Lias Ate Dibata.

Pendahuluan

                Kiniteken sipaguh nandangi Tuhan Dibata erbahanca kita megegeh ibas ngalaken kerina perbeben sinihadapi kita.Janah alu kiniteken man Tuhan Dibata e kita ngasup ngataken bujur ibas kerina dampar geluhta man Tuhan Dibata. Arah Kiniteken banci kita ngidah dingen kuasa ras sura-sura Dibata ibas geluhta sinemani dingen ngarak-ngarak ras masu-masu kita ibas kerina danpar kegeluhenta.

                Roma 3:22 :” Dibata ngerembakken manusia kempak diriNa erdandanken kiniteken manusia e man Jesus Kristus. Kerina kalak sitek man Kristus iperembak Dibata ras diriNa sebab bali nge kerina manusia enda.

Isi

Surat Pilipi enda itulus Rasul Paulus sanga ia ipenjara i Roma, labo perban kesalahenna tapi perbahan ia meritaken Berita Si Meriah. Ibas keberadaanna i penjara Rasul Paulus labo mengeluh entah pe putus asa, tapi ngataken bujur ia man Tuhan Dibata. Iingetna kenca perpulungen Pilipi e  (ay.3-4). Enda ngatakenca lit hubungen si harmonis ibas iaras perpulungen Pilipi e terlebih igejapkenna maka aras lias ate Dibata (kuasa Dibata) maka banci pantek perpulungen Pilipi e (Perpilungen Pilipi eme perpulungen sipemena I panteki Rasul Paulus  i Eropa, propinsi Roma I Makedoni). Paulus pe tetap ertoto man perpulungen e alu meriah ukur.

                Rasul Paulus nggejapken maka dahin meritaken berita simeriah e merupaken dahin Dibata, ia hanya sebage alat (suruh-suruhenNa) ngenca she maka aminna pe Rasul Paulus ipenjara tek ia, maka iterusken Dibata nge e she ibas warina Kristus reh mulihken  (ay.6).  JadRasul Paulus nggejapken maka ia e sebage persuruhen Dibata ibas meritaken berita si meriah e janah tetap ia berserah nandangi Tuhan Dibata. E maka labo lit ia jungut-jungut aminna pe ia ipenjara, janah labo ia lit tuntuten man jemaat Pilipi.

                Ibas situasi sisulit/mberat siinanami Paulus  (I Penjara) labo erbahanca ia putus asa entah pe kecewa tapi ibas keberadaanna e pe idahna ras igejapna lias ate Dibata man bana, bagepe man perpulungen e. Janah lias ate Dibata e sanga ia ipenjara pe labo igejapkenna kurang man bana.

                Rasul Paulus pe ibas situasi I penjara tetap ertoto man Dibata , labo itadingkenna Tuhan Dibata sebab tek ia maka Tuhan Dibata enggo nikapken rencana si mehuli dingen dem alu kemalemen ate man bana, bagepe man Perpulungen tetap itotokenna  gelah perpulungen e ertambah-tambah keleng atena rikut pe pemeteh situhu-tuhu ras pengangkaan siserta gelah kerina ia sikap ngalo-ngalo kerehen Yesus Kristus eme banci tetap bersih dingen la erpandangen (njaga kebadiaan). She maka ertambah-tambah biak-biak situhu-tuhu mehuli si rehna ibas Yesus Kristus guna muji dingen mpermuliaken Dibata .

Penutup/Aplikasi

1.       Selaku kita anak-anak Dibata marilah lit ibas kita kiniteken si paguh, she maka ngasup kita ngidah ras nggejapken bagi belinna lias ras keleng ate Dibata e man banta she maka kita pe ngangkai sura-sura Tuhan arah geluhta.

2.       Man banta enggo i petangkas ise Dibata e ras uga keleng atena man banta arah Yesus Kristus, enda harus tetap situmbuh kembangken janah tetap teridah ibas geluhta kemuliaan Dibata e she ibas wari kerehen Tuhan Yesus Sipedua kaliken guna menghakimi, gelah teridah maka kita metunggung ngaloken keriahen situhu-tuhu ibas kerehenna e, sebab wari kerehenna e ise pe la metehsa katawari (Maleakhi 3:1-4)

3.       Arah kinitekenta banci sigejab kuasa Dibata e erdahin ibas geluhta she maka kit ape ngasup lalap erpengendes man bana ibas  kerina dampar geluhta janah banci tetap erpengarapen man bana aminna pe lit kiniseraan sialami kita.

4.       Tek kita maka Tuhan Yesus me si maba kita bengket ku bas lias ate Dibata erdandanken kinitekenta, janah  lit arapenta maka kita ikut dat  bagin ibas kemuliaan Dibata.

5.       Tetaplah kita ertoto ras erpengendes man Dibata ibas kerina dampar kegeluhenta bagi siilakoken Rasul Paulus she ibas kerehen Tuhan Yesus si pedua kaliken she maka kita tetap ersikap guna ngalo-ngalo kerehenNa si pedua kaliken bagepe kita ersikap guna mperingeti wari Natal si irayaken she maka tuhu-tuhu dame/keriahen  Natal e tergejab ibas kita kerina , (Adven).