LITURGI KEBAKTIAN NATAL MORIA

TAHUN 2016

 

Tema       : Tutus, terteki ras maba kemalemen ate

S.Tema    : Natal mabai kegeluhen si mejingkat ras tutus nuduhken potensi si  mehuli

Nats         : Lukas 16: 10-15

I.         PERSIAPAN KEBAKTIAN

1.             Erlajar rende ende-enden si lit ibas tata ibadah Natal ibabai : MC

2.             Pengarahen kerna tata ibadah ras si muat bagin ibas Kebaktin Natal.

3.             Kata Pengalo-ngalo

Mejuah-juah, Selamat wari Natal. Natal MORIA ibas tahun enda eme Natal si tuhu-tuhu mereken kesangapen man banta Moria. Kesangapen  i berekenna alu ketubuhen Anakna Yesus Kristus ku doni enda arah  Maria. KetubuhenNa arah Maria si dem kel alu perbeben e mereken contoh man banta uga kita ndalani kegeluhenta. Susah senang, sakit sehat, ceda ate meriah ukur, tawa ngandung, cirem la siangkaan, kerina e desken rudang-rudang si nambahi kinijilen itengah kegeluhenta.

Senina ras Turang ibas gelar Tuhanta Yesus Kristus, Natal eme si jadi bukti kekelengen Dibata man banta, Perbahan keleng ateNa nandangi kita maka iberekenna AnakNa si tonggal jadi Juru Slamatta ibas kegeluhenta i doni enda. KekelengenNa si mpengasup kita jadi Moria si TUTUS, TERTEKI RAS MABA KEMALEMEN ATE.  Ibas kita nggejabken kekelengen Dibata ibas wari Natal enda mari dage si dahi Ia arah Pertotonta :Ertoto:

4.             Rende :KEE 294: 1,2,3 “ MERIAHKAL UKURTA”                   

(Perpulungen Tedis, Barisen Prosesi bengket ku ingan kebaktin)

1).   Meriah kal ukurta Reh kap penampat

Pesikap lah dalinNa ibas ukurta

Biak-biak keg’lapen tadingken krina

Aloken kesangapen keleng ateNa

Reff :    Si alo-alo ia, ralep-aleplah min kita

            Pesikaplah inganna bas pusuhta

2).   Di lit simeluk-eluk si pesikaplah

Ukur  si nggeduk-nggeduk jadi pinterlah

Pesai-pesai dalanNa raja Mulia

Babailah kalak k’rina nembah man baNa. Reff:

3).   Dibata kap Bapanta si nuruh Ia

Nusur ku doni enda ndahi manusia

Robahlah dingen jera kita kerina

Dosanta i angkutNa terkelin kita: Reff:

II.      KEBAKTIAN

1.             Votum          :  Kebaktin Natal MORIA enda ibenaken ibas gelar Dibata Bapa, si nepa langit ras doni, ibas gelar Yesus Kristus si enggo mpeteruk baNa jadi seri ras manusia, ras ibas gelar Kesah si Badia si mpengasup kam (kita) ndalani kegeluhen enda.

2.             Salam           :  Perkuah ate ras dame ibas Dibata Bapa ras ibas Tuhan Yesus Kristus nari, ras kerembaken Kesah si Badia ras kam (kita) kerina gelah. Gloria.

Perp.             : Glo...ria      Glo...ria           Glo.................ria   (iendeken...)

3.             Invocatio      : Tuhan kap si mereken kepentaren, ibas IA nari kap manusia ndatken pemeteh ras pengertin (Kuan-Kuanen 2: 6)

4.             Rende : KEE Rende KEE 136: 1-3 Kam Krina Si Tek

1.         Kam krina si tek, mari surak janah puji

Pedas min kerina ku Betlehem

Nehenlah anak tubuh man Tuahta

Mari kita nembah, 3x

Man Raja

2.         O Raja mulia, si njujurken krina

La mela Kam tunduh ibasampun

Kam me Dibata mula-mula nari

Mari kita nembah, 3x

Man Raja

3.         Kam krina malekat, pujilah man Tuhan

Ersurak-ersurak man baNalah

Puji Dibata i Surga i doni

Mari kita nembah, 3x

Man Raja

                                               

5.             Koor/V. Gorup/Solo

6.             Responsoria : Kekelengen Dibata nandangi tinepaNa si enggo Ceda

L       :    Tuhan DIbata eme Raja sidem alu Kuasa. ItepaNa doni ras kerina isina, langit si mbelang ras mejile, deleng-deleng si meganjang, perik-perik si rende erbolo-bolo.Kerina nuduhken kiniganjangen si nepasa.Uga enda kerina banci jadi?

P       :    (Ngendeken KEE 262: 1)

              Doni enda seh ulina, Tuhan si nepasa

              Ras isina pe krina, brekenNa banta

L       :    Ibas kekelengenNa ijadikenNa manusia desken rupaNa guna ngkuasai ras njagai kerina tinepaNa. Dibata mbereken perukuren ras kepentaren guna sie. Tapi tugas si bereken Dibata e lanai idalanken mulai  Adam ras Hawa ndabuh kubas dosa. Manusia rate-ate ras erbana-bana ibas kegeluhenna, mbunuh, nangko, erlua-lua, ndalanken kinilabujuren, ras perbahanen si erbahanca geluhna melket dingen ncedai rupa Dibata si lit ibas ia. Uga dage ninta?

P       :    (Ngenndeken KEE 344)

              Kam O Yesus Juruslamat, sampat kami genduari

              Pulah ibas dosa nari, sinaban kami e

              Tergejap latihna ngeluh ibas Dosa, lanai kami ngasup rdalin ibas gelap

              Ku Kam Juruslamat kupindo penampat gelah kami pulah ibas dalin mberat

L       :    Pertoton dingen penderkuh manusia e enggo seh ku Dibata tapi alu gegeh ras pemeteh manusia e, lakap banci Ia pulah. Alu kekelengenNa iberekenNa man banta AnakNa si Tonggal guna jadi gancihTa, Ia mbereken pengarapen  si nteguh man banta si tek man baNa. Nggit nge kita ngalokenca?

P       :    (Ngendeken KEE 409)

              Reh lah Kam O Immanuel, mulahi kami Israel

              Si tertaban labuh ras ndele, nimai Anak Dibata e.

              Ersuraklah meriahlah. Reh me Tuhan Immanuel

L       :    Genduari Juruselamat e enggo tubuh man banta. Ia tubuh ibas pusuhta si nggit i pelimbaruiNa, pusuh si nggit ipakeNa jadi perkakasNa. Mari dage aloken IA alu keriahen dingen dem Pengataken Bujur.

P       :    Ngendeken KEE No. 115:1

                   Keriahen si mbelinna, si ku beritaken e

Enggo tubuh si Permakan, eme Tuhan Yesus e

Pujilah min Dibatanta,

ras dame-dame, dame man banta

Dibata nta si erkuah ate

Man kita jelma e.

7.             Koor/V. Group/Solo

8.             Nagani Lilin Natal                                                            (Perp. Tedis)

Mari dage sisagani lilin Natalta si jadi tanda man banta maka Terang e enggo reh man banta si mpengasup kita guna jadi Moria si Tutus, terteki ras maba kemalemen ate.  Rende : KEE: 135: 1- BERNGI E NGGO KEPE

1.         Berngi e nggo kepe, Yesus reh ku doni e

Nusurlah ngangkut dosanta me kin,

Jadi kap musil lah sangap pagin

Asa si tek Tuhan e...Asa si tek Tuhan e.

2.         Anak e, bujur pe, singena me aku e

            Kini ulinNdu tadingken Kam kap

Bengket ku doni lah trang si gelap

Aku daremenNdu e....Aku daremenNdu e.

3.         Berngi e, nggo kepe, Tuhan reh ku doni e

Padan Dibata teridah tetap

KinikelengenNa banta mekap

Tuhan si puji gela...hTuhan si puji gelah.                   

9.             Khotbah                                                                            (Perp. Kundul)

10.         Pengakun Kiniteken                                                         (Perp. Tedis)

11.         Koor/V. Group/Solo                                                         (Perp. Kundul)

12.         Persembahen Pengataken bujur: 100 % Guna dana Pensiun GBKP      

Genduari ibereken kesempaten man banta ersikap guna nehken persembahen pengataken bujurta man Dibata si i pakeken guna dana pensinun i tengah-tengah gerejannta GBKP. Kerna pengataken bujur si begiken kata Dibata ibas pustaka si badia nari: I etehnndu kuga liasNa Tuhanta Yesus Kristus maka aminna bayak gia Ia, tapi guna kiniulinndu, i pemusilNa baNa, gelah arah kemusilenNa e jadi bayak kam ( 2 Kor 8:9).

Rende : KEE 385 : 1- BABALAH PERSEMBAHEN SI MERIMNA

1.         Babalah persembahen si merimna, ku adep-adepen Dibatanta

Babalah korban pujin si mehaga, ku lebe altarNa Si Badia

Glah tetap breNa pasu-pasuNa, man krina manusia

Glah tetap breNa pasu-pasuNa, terpuji gelar Tuhan

2.         Babalah persembahen si jilena, ku Rumah Dibata si Perkuah

Babalah korban pujin si merimna, Kuadep-adepen si erkuasa

Glah tetap breNa keleng ateNa, ras lias ateNa banta

Glah tetap breNa pasu-pasuNa, segedang-gedang gluhta

3.         Ndeskenlah persembahenta man baNa, si nggo nehken kegeluhen banta

Ndeskenlah lagu pujin si jilena, jadi persembahen si Badia

Glah lias ras keleng ateNa, isehkenNa man banta

Emaka ernalem ku Ia, malem tuhu ateta

Pertoton Persembahen

13.         Koor/V. Gorup/Solo

14.         Doa Syafaat

15.         Responsoria: Tekad Natal                                               (Perp. Tedis)

L       :    Tuhan Dibata enggo milih kam jadi anak-anakna, gelah kam ikelengi ras iselamatkenNa. isikapkenNa penampat man bandu guna mbereken kepentaren segelah ngasup jadi Moria si Tutus, terteki ras maba kemalemen ate

P       :    Bujur Tuhan nggit aku ngaloken kepentareNdu guna aku banci jadi Moria si tutus, terteki ras maba kemalemen ate

L       :    Emaka ertambah-tambahlah kepentareNdu segelah reh dekahna kam jadi sekalak Moria si erbuah meramis ibas geluhndu guna jadi kesaksinndu man doni enda. Segelah reh Buena kalak si tek man Tuhan

P       :    Bujur Tuhan Natal enda mabai aku ku kegeluhen sireh mejingkatna guna nuduhken potensi simehuli aminna pe melala kebiaren tapi aku erpengarapen man baNdu

L+P   :    Amin

16.         Rende KEE 425: 1-2 ADI RAS YESUS

1.      Adi ras Yesus malem naring pusuhta, iperdiatekenNa me kita ban kelengNa

Amin gia jumpa erbage percuban, la kap i tadingkenNa kita i sampatiNa

Reff:   Malem me ate je kita pe dat dame ras keriahen ukur bene me kebiaren

                               Tading me keguluten, mberat jadi menahang pusuhpe jadi salang

2.      Adi ras Yesus she damena ukurta, ibereNa kepentarenNa idur kuasaNa

Ndauh me dage ukur ras ate ceda, ukur mehuli turah ban sialoken kataNa

Reff:   

17.         Pertoton Tuhan

18.         Pemasu-masun

L         :   Mulihlah alu dame, Tetapkenlah ukurndu segelah kam jadi moria si tutus, terteki ras maba kemalemen ete guna tetap ngeluh mejingkat dingen nuduhken potensi si mehuli. Guna si e alokenlah pasu-pasu idur Dibata nari: 

                Ipasu-pasu janah ikawali Dibata kam (kita) siang ayo Dibata ersinalsal i babondu, janah melias ateNa ngenehen kam, itatap Dibata ku kam janah malem atendu ibahanNa. Amin

P          : Amin... amin... amin 

III.    PERAYAAN NATAL