LITURGI KEBAKTIN NGOSEI ORANG TUA ( Dk Em R Pandia ras Nora) Ras Pedalan utang adat man kalimbubu DI PAMAH KUALA SIMEI MEI

 LITURGI KEBAKTIN

NGOSEI ORANG TUA ( Dk Em R Pandia ras Nora)

Ras  Pedalan utang adat man kalimbubu

          ==============================================

A.     PERSIKAPEN

1. Rende : KEE No 205

   1.Rehlah min o Tuhan sikap kami krina , ersembah man baNdu jenda

      Nusurlah min Tuhan, bahan sikap krina, ukur kami pe badia

      O, Bapa, bre gelah, daten pasu-pasu, kami krina enda

2. Tuhan Dibatanta lit bas rumah enda nembah kita krina baNa,.

    Alu kehamaten mungkuklah man baNa, kula , tendi pe kerina

    Aloken kataNa ras pasu-pasuNa, usekenNa banta

 2.  Kata Penaruh

Senina ras turang  ibas  kekelengen  Tuhan Yesus , bujur sikataken man Tuhan Dibata  ibas perkuah dingen keleng ateNa man banta , terlebih  kam kekelengen kami keluarga  Dk Em R Pandia,  ibereken Tuhan kesempaten nehken kehamaten ras encidahken kekelengen man Orang tuanta bagepe nandangi kalimbubu guna nehken utang adat.  Bagi enggo si eteh nehken kehamaten ras kekelengen man orang tua eme sada keharusen silakoken ibas geluhta , bagi si tertulis ibas Pedah sepuluh , eme pedah si pelimaken  ikatakenna : “ Pehaga  bapandu ras nandendu, gelah umurndu ipegedangken  ibas negeri sinibereken Yahwe, Dibatandu, man bandu pagi. Bagepe nehken kekelengen ras kehamaten man sangkep geluh” Adi lalaplah ngasup kita encidahken kiniersadan enda ibas geluhta seh asa lalap tentu kesenangen ras kiniulin  tetap lit ibas geluhta .  Masmur 133 : 1,3 Ngataken :” Andiko ulina ras senangna, adi kalak si ersenina ersada perarih. Bagi embun i deleng Hermon, sinusur ku deleng-deleng Sion. I je me  Tuhan  erpadan mereken pasu-pasuNa, kegeluhen si la erkeri-kerin.””

 Marilah si sehken kekelengen ras kehamaten man orang tua sinikelengi kita enda bagepe man Kalimbubu ibas mpedalan utang adat ras sangkepgeluh  ibas kita kalak karo alu nehken ngataken bujur ras Pujin man Tuhan Dibata. Seh maka ibas pasu-pasu Tuhan , orangtuanta enda pe ersehatna ras ermalemna akapna bagepe kita kerina tetap ndatken kesangapen ibas keleng ate Dibata man banta. Mari dage si pesikap pusuh ras ukurta guna memuji ras memuliaken Tuhan ibas ibadahta enda .

3. Ertoto 

4. .Rende .PEE No 374 :1-3 Yesus Ulu Kegeluhenku

1.      Yesus ulu kegeluhenku, Kam me ngenca pengendesenku

Lalap tedeh ate pusuhku, kupehaga Kam bas geluhku

      Reff :  O Tuhan pernehen pusuhku siertedeh ate man bandu

      Ku gelem pedah ras padanNdu, ku sembah Kam ibas geluhku

      2.  Ku sembah Tuhan penebusku, si mereken kekelengenNa

            Alu tutus reh aku Tuhan, ras kerina isi jabungku...  Reff...

      3.  Teriah kelengNdu  O Tuhan, TanNdu sinegu bas percuban

           Terkelin geluhku iban Kam, Ku puji Kam Tuhan si mbelin...Reff

B.        KEBAKTIAN

1. Votun/ Salam/ Invocatio

L   : Kebaktin enda  ibenaken ibas gelar Dibata Bapa si dem keleng ate,  ras ibas gelar   Yesus Kristus  juru slamat manusia, ras ibas gelar  Kesah si Badia singarak-ngarak  perdalanen kegeluhen anak- anak  Dibata .

  Mejuah-juah man bandu kerina , Dibatalah si tetap masu-masu  ras   mereken    keriahen ras kemalemen ate man bandu kerina. Amin.

 Perp :    Amin ....Amin....Amin......

Invocatio :    O Tuhan alu bulat ukurku, kukataken bujur baNdu.  Kuturiken kerina tanda                        kuasa si enggo ibahanNdu. (Maz. 9:2)

2. Rende  PEE 282  :1-3 KU KATAKEN BUJUR BANDU

1.      Kukataken bujur baNdu , O kam Tuhan penebus

Aku  enggo slamatkenNdu, arah lias ateNdu

      Reff  : Keleng kal ateNdu aku, simpar kap ngaruhNdu bangku

                 Lias ateNdu lanai terpilasi, ku puji Kam tep-tep wari

2.      Tergejab pasu-pasuNdu, ibas kegeluhenku

Rezeki arah dalinku, i cur- curkenNdu bangku. Reff......

3.      Arah perkuah ateNdu ,mejuah-juah aku

Senang me kapen geluhku, kupujilah gelarNdu. Reff......

3. Pujin Ras Pengataken Bujur Man Tuhan

L     : Endekenlah ende-enden pujin man Dibata, alu pusuh ras ukur  simeriah .

P     : Tuhan kap permakanku, emaka la kekurangen aku.

L     : Pujilah Tuhan o tendingku, ola lupa nandangi kerina kiniulinNa.

P     : Ibas mbalmbal si meratah, ipesenang-senangNa aku, kempak lau si teneng permalerna, itegu-teguNa aku.

L     :  Pujilah Tuhan, Kataken bujur man baNa. Sabab mehuli kap Ia keleng ateNa tetap rasa lalap.

P     : Ipelimbaruina gegehku, ibabaiNa aku arah dalan sipinter erkiteken gelarNa. Aminna erdalan pe aku ibas kelbung sigelap, la aku mbiar jumpacilaka sebab Kam kap ras aku, o Tuhan.IkawaliNdu aku , desken permakan ngkawali biri-biri alu ciken ras kayan-kayanna.

Si Man Osen  : Genduari, o Dibata aku enggo metua dingen ubanen ola kal aku                 tadingken, Kam kap ngenca sinemani geluhku.

Anak ras Kempu si Man Osen  : Ersurak dingen meriah ukurku,ngidah kekelengenNdu kempak jabu orang tua kami , ola kal tadingkenNdu kami oTuhan ,maka ngasup kami ermomo kerna kuasa ras keleng ateNdu man kerina kesusuren kami,ras sangkep geluh kami  bagepe man kerina kalak sideban.

4. Rende  KEE NO : 244 : 1-2   Guna ngaloken Kata Dibata

1.      Nusur min o Kesah Tuhan , bengket ku pusuhku e

Maka kata sini suan turah ras erbuah pe

Kam ibas Dibata nari kep-keplah ukurku min

Pasu –pasu pendahin maka aku genduari ndaram tuah sitetap

Alu ate sitetap

2.      Kam benana kegeluhen , simahanca ukur trang

Kam sijadi persuruhen lah krajangNdu nggo menang

Maka perpulungen kari , tutus ngikut Yesus kap

Janah Ia mpeserap ibas dosa doni nari

Jadi dungna me bage , bagi Kam badia pe .

5.      Khotbah

6.      Pengakun Kiniteken            

7.      Persembahen

L : Ibas keriahen ukurta ijenda kerina marilah siendesken persembahenta. Kata Dibata sijadi palas nehken persembahen  : Kupuji Tuhan i tengah-tengah perpulungen si mbelin,kerna kerina si enggo ibahanNa. iadep-adepen perpulungen si erkemalangen man Tuhan, kupersembahken persembahen si enggo kupadanken baNa. (Maz.22:26)

8.      Rende   KEE No 343 :1-3 PASU-PASU BAS TUHAN NARI

1.Pasu-pasu bas Tuhan nari, gejapken kami tep-tep wari

   Bas paksa-paksa geluh kami, Kam me kap tetap singkawali

   Pasu-pasu bas Tuhan nari, jadi pergegeh tendi kami

   Guna ndalani wari-wari, si reh na bas Kam Tuhan nari

Reff: Pasu –pasu dage o Tuhan, persembahen kami anakNdu,

          labo kapen enda metunggung, persembahen si nggo pepulung

          AjariNdu pe kami gelah min,tetap ngasup mere man Tuhan.

2.Buaten lit kami o Bapa,gejabken kami Kam empuna

   Tanda ukur kami meriah,endesken kami baNdu Bapa

   Persembahen enda o Bapa,desken bunga ncole merimna

   Persembahen ateNdu ngena, bagelah akapNdu o Bapa...   Reff

3.Aloken min dage o Tuhan,persembahen kami anakNdu

   Labo ban beluh kami Tuhan ,lako mere kuadepenNdu

   Pakeken min dage o Tuhan, persembahen kami anakNdu

   Guna pebelangken kataNdu, nandangi krina tinepaNdu... Reff...

9.       Pertoton Persembahen + Syafaat

10.   Rende KEE NO : 342 : 1-2 YESUS LAPE-LAPE TENDINGKU  

1.   Yesus lape lape tendingku , Ia njagai kita

Mberat pe siman tangkelenta , ia njagai kita

Reff. : Tuhan njagai kita paksa senang tah mesera

             Ia njagai kita , Tuhan najagai kita

2.   Ibas melala perbebenta , Ia njagai kita

Dalan gelap arah lebenta , ia njagai kita ....Reff

3.   Ia me sinjayam geluhta , Tuhan njagai kita

Pertotonta ibegikenNa , Ia njagai kita  ......Reff

11.     PASU-PASU MAN ISI JABU

L       : Sangap kal kalak  simalang man Tuhan, singgeluh ngikutken kerina perentahNa. Ipanna me ulihna latih, sangap nggeluh, mehuli sekerajangenna.

P       : Andiko Buena kiniulinNdu, si isikapkenNdu man si mpermuliaken Kam ! Kerina kalak meteh kai si ilakokenNdu, man kalak si cilinggem kempak Kam.

 Anak+Kempu : Ku inget  ras tetap kudalanen pedahNdu man bangku  O Tuhan eme :                            “Pehagalah nande bapandu ,” eme pedah sipemena ibereken Dibata radu                              ras padanNa. Gelah mejuah-juah kam, janah ndekah kam nggeluh i                            doni enda.

L       :  Kalak bujur ertunas desken batang kurma, mehumur perturahna bagi batang cemara Libanon. Lalap ia meratah dingen paguh aminna pe enggo metua, tetap erbuah, encidahkenca maka bujur kap TUHAN.

P+L  : O Tuhan jadiken kami jadi kalak si tetap malang ras  ernalem man Tuhan, dingen ngikutken kerina perintahNdu, seh maka tetap kami ngasup ngidah bage belinna kekelengenNdu si tetap icidahkenNdu man kami.

12.     Rende  . KEE No. 276 : 1,2     “Kuikutken Kam O, Tuhan

1.       Kuikutken Kam O, Tuhan, Kam kap siperkeleng e

Sabab Kam si mere dalan, dalan terkelin kepe

Reff : Ia kapen Juru Slamat. Ia kapen penampat

           KataNa me kapen tambar, kuasaNa la’rsibar

2.  Tuhan kapen kuarapken, jadi temanku nggeluh

                                Tetap Ia penalemen, kinitekenku nteguh...        Reff...

3 .  Aku jadi sipermenang , Yesus kap menangkenca

       Pusuhku dame ras senang, Tuhan ka psi mrekenca....Reff,

13.     Pertoton Tuhan

14.     Pemasu masun

L  :  MULIHLAH ALU DAME RAS MEJUAH-JUAH, ALOKENLAH PASU-PASU IDUR DIBATA  NARI :

        Dibata sumbul kemalemen ate e lah sincukupi keperlunndu guna ndalanken si sentudu ras peratenNa. Janah Dibatalah erdahin ibas kam arah Yesus Kristus gelah kam ngelakoken si ngena ateNa. Man Kristuslah kemulian seh rasa lalap .Amin.

P   :  Amin...Amin....Amin...

C.                 Acara iumputi  Ngosei ras pedalan utang adat