LITURGI KEBAKTIAN NATAL MAMRE

TAHUN 2016

 

Tema           :  “Aku ras isi jabungku Tuhan saja ngenca isembah kami”

                        (bnd. Josua 24:15)

Sub Tema    :  Natal mpeteguhi komitmen Mamre guna mabai isi jabuna nembah Tuhan, gelah keluarga Kristen tetap ngasup ncidahken dirina selaku sira ras terang doni enda.

I.    PERSIKAPEN

1. Erlajar rende ende-enden si lit ibas tata ibadah Natal ibabai : MC

2. Pengarahen kerna tata ibadah ras si muat bagin ibas Kebaktin Natal.

3. Kata penaruh ku bas kebaktin (Ibabai sekalak serayaan Tuhan, Pt/Dk.)

Senina ras turang kekelengen Tuhan Yesus Kristus mejuah-juah man banta kerina. Alu la si gejap nggo ka kita seh kubas Natal Mamre tahun  enda. Runggun gereja ngataken selamat Natal man banta kerina si enggo pulung ibas ingan enda.  Ibas wari/berngi enda kita iajuk guna ersikap ngaloken ketubuhen Yesus Kristus ibas kegeluhenta. Mari sipesikap ukurta dingen sialo-alolah Ia si reh guna keselamatatenta.

Ertoto :

4. KEE. 294:1-3 : Meriah Kal Ukurta

(Perp. Tedis – Prosesi memasuki ruangen ibadah)                    

1.   Meriah kal ukurta Reh kap penampat

Pesikap lah dalinNa ibas ukurta

Biak-biak keg’lapen tadingken krina

Aloken kesangapen keleng ateNa

Reff:    Si alo-alo ia, ralep-aleplah min kita

            Pesikaplah inganna bas pusuhta

2.   Di lit simeluk-eluk si pesikaplah

Ukur si nggeduk-nggeduk jadi pinterlah

Pesai-pesai dalanNa raja Mulia

Babailah kalak k’rina nembah man baNa. Reff:

3.   Dibata kap Bapanta si nuruh Ia

Nusur ku doni enda ndahi manusia

Robahlah dingen jera kita kerina

Dosanta i angkutNa terkelin kita: Reff:

II.  KEBAKTIN       

1. Votum ras Salam       (L : Liturgis,  P : Perpulungen)

L                   :  Kebaktin perayaan Natal Mamre enda ibenaken ibas gelar Dibata Bapa, si nepa langit ras doni, ibas gelar anakNa Yesus Kristus simpeteruk baNa jadi seri ras manusia ras ibas gelar Kesah si Badia simereken keriahen situhu-tuhu man banta

                        Perkuah ate ras dame ibas Dibata Bapa, ras ibas Tuhan Yesus Kristus nari, ibas kerembaken Kesah Si Badia ras kita (kam) kerina gelah. Amin

P                   :  A..min   A…..min    A….min (iendekan)                     

2. Invocatio

“Rasa lalap ateku muji Tuhan, o kerina tinepaNa, pujilah gelarNa si Badia seh ras lalap” (Masmur 145:21)

3. Rende : KEE No. 428 : 1- 3, “Kupuji Tuhan Dibata”

1.   Kupuji Tuhan Dibata simere kegeluhen

      Kelengi ras alemiNdu aku alu lias ateNdu

      Pujilah Tuhan Haleluya Pujilah Ia Haleluya

      Katakenlah bujur man Tuhan Haleluya

2.   Kristus reh i surga nari nadingken kemulianNa

      Alu ngenanami kiniseran peturah pengarapen

      Pujilah Tuhan Haleluya Pujilah Ia Haleluya

      Katakenlah bujur man Tuhan Haleluya

3.   Tupung kami lanai beluh  erbelas bas pertoton

      Kesah si Badia sinampati erkusik ngajarisa

      Pujilah Tuhan Haleluya Pujilah Ia Haleluya

      Katakenlah bujur man Tuhan Haleluya

4. Koor/VG/Liturgi/Solo/Puisi :                                                           (Perp. Kundul)

5.      Kinata Kerna Kinilangasupen I bas Ndalanken Pedah Dibata

L          :    Turang ras senina, alu perkuah ateNa, Dibata enggo nehi padanNa alu mereken pasu-pasuNa man banta manusia. Enggo nge kita ngergaken perkuah ateNa e i tengah-tengah geluhta?

(Paksa Teneng)

L          :    Dibata nggo mereken tanggungjabab si mbelin man Mamre selaku bapa i tengah-tengah jabu, guna mabai jabuna gelah tetap setia i bas perkuah ate Dibata. Enggo nge ndia idalanken Mamre?

Mamre :    Ngaku kami Tuhan, megati kami lupa nandangi pendiloNdu jadi bapa i tengah jabu. Megati la kami ncidahken tempasNdu, subuk i bas pengerana ras perbahanen. Pengerana si arusna mpegegehi pusuh, megati erban kalak ngelabuh, perbahanen kami si arusna jadi usihen, megati jadi batu antuken. Selaku imam, megati kami la ngasup mabai jabu kami guna rembak ras Kam. Tuhan, alemi dingen pegegehi min kami.

L          :    Marilah siakuken dosanta man Tuhan

Mamre :   Ngendeken KEE 417:1

                 Kam Yesus Tuhanku palas kegeluhenku reh aku ngadap man baNdu

                 Tegulah min aku ibas ndalani geluhku ‘lah ula celus nahengku

                 Dengkehken sorangku erlebuh o Tuhan ngendesken pingko-pingkongku

                 Alemi min salah dosangku o Tuhan la atan bas kiniulin

Perp.   :   Ngendeken KEE 417:2

                 Kam Yesus Tuhanku sampati min geluhku alemi Tuhan dosangku

                 La kap lit terligen ibas adep-adepenNdu kerina salah lepakku

                 Dengkehken sorangku erlebuh o Tuhan ngendesken pingko-pingkongku

                 Alemi min salah dosangku o Tuhan la atan bas kiniulin

6.      Padan Dibata Si Mpegegehi Mamre          

L          :    La ngena ate Dibata kematen kalak si munuh bana i bas dosana, tapi ngena ate Tuhan nandangi kalak si igejapna salah lepakna, si ceda atena kerna dosana dingen jera. Emaka selaku persuruhen Dibata, aku nehken KataNa man banta (ndu) kerina singgejap ras ngakuken dosana, si tek nandangi keleng ate Dibata, niNa :

                 “Desken remang erpagi-pagi, dosandu enggo Kulesapken, janah salah lepakndu pe nggo Kusasap desken embun. E maka mulihlah kam kempak Aku, sabab Aku kap Penebusndu. Kupilih kam jadi sikerajangenKu guna ndalanken sura-surangKu. Aku tetap nginget padanKu man bandu ras man kerina kesusurenndu ersundut-sundut janah perpadanen e tetap rasa lalap. Aku jadi Dibatandu ras jadi Dibata sinursurndu.” (Jesaya 44:22; Kejadin 17:7)

Perp.   :   Rende KEE 360 2x

                 Ibas Tuhan aku megegeh Tuhan me kupujiken

                 Tuhan me jadi gegehku ibas Ia lit kesenangen ibas Ia lit kesenangen

             

7.      Berita Natal   (Perp. Tedis)

L         :    “Sabab bage pengkelengi Dibata doni enda, emaka iberekenNa AnakNa Sitonggal gelah ola bene isepe si tek man baNa, tapi gelah dat kegeluhen siituhu-tuhu si la erkeri-kerin. (Yoh. 3:16)

Perp.   :   Rende KEE 123:1-2

1)      Ketuahen me riah ukur me ketubuhen ni Yesus e

Sangap me jelma reh me Tuhanta mari surak aleplah Haleluya

2)      Ketuahen me riah ukur me Ketubuhen ni Yesus e

Malem me ateta ‘rdame ras Dibata mari surak aleplah Haleluya

8. Koor/VG (Perp. Kundul)

9. Nagani Lilin Natal     : Iaturken Panitia                              (Perpulungen tedis)

      Rende KEE. No. 135 :1-3 Berngi e nggo kepe               

1.   Berngi e, nggo kepe, Yesus reh ku doni e

Nusurlah ngangkut dosanta me kin

Jadi kap musil ‘lah sangap pagin,

Asa si tek Tuhan e, asa si tek Tuhan e

           

                              2.   Anak e, bujur pe, singena me aku e,

kiniulinNdu tadingken Kam kap

Bengket ku doni ‘lah t’rang si gelap ,

Aku daramenNdu e, aku daramenNdu e

3.   Berngi e, nggo kepe, Tuhan reh ku doni e,

Padan Dibata teridah  tetap

KinikelengenNa banta me kap,

Tuhan si puji gelah, Tuhan si puji gelah

10. Khotbah/Renungen Natal   

11. Pengakun Kiniteken                                                                  (Perp. Tedis)

12. Koor/V.Group :                                                                           (Perp. kundul)

13. Persembahen : 100 % guna pensiunen GBKP                                                          

      a.   Kata Dibata  si jadi palas nehken  persembahen pengataken bujurta man Dibata: ”O senina ras turang, nginget perkuah ate Dibata simbelin sinisehkenNa man banta, ku pindo man bandu: Endeskenlah kulandu man Dibata saja selaku persembahen singgeluh rikutken singena ateNa Sabab bageme arusna kam ersembah man Dibata sue ras biakndu selaku makhluk si rukur (Roma. 12:1)

      b.   Rende : PEE No. 90:1,2 ”Nginget Perkuah Dibata Si Mbelin”

            1.   Nginget perkuah Dibata Si Mbelin, si isehkenNa man banta k’rina kin

                  Ibas kerina dampar kegeluhen, i doni si dem alu keguluten

                 

                  Reff:     Endeskenlah kulanta man Dibata, kerinana si lit ibas geluhta

                              Selaku persembahenta si nggeluh, empersembahen si ngena ateNa

            2.   Sabab bage me arusna kita kin, ersembah man Dibatanta si mejin

                  Si nggo m’reken man banta manusia, keg’luhen si mehuli ras badia 

                  Reff......

            3.   Marilah k’rina si puji Dibata, janah si peteruk ka pe ukurta

                  Alu bage si dat sura-suraNa, kai si mehuli ras ngena atena   

                  Reff......

      c.   Pertoton Persembahen + Pertoton Syafaat.

14. Koor/VG     :

15. Perpadanen Man Dibata      (Perp. Tedis)

L             :   Turang ras senina, Dibata ndilo Mamre jadi bapa dingen jadi imam, guna mabai isi jabu erkemalangen man Dibata.

Mamre   :   Erpadan kami Tuhan, ate kami ertanggungjabab jadi bapa, ras jadi imam i tengah jabu.

L             :   Tole pe Dibata mereken tanggungjabab terbelinen, eme maba kiniulin ku tengah-tengah gereja ras masyarakat.

Mamre   :   Erpadan kami Tuhan, makeken diri kami, guna maba kiniulinNdu i doni enda.

P             :   Kami pe erpadan Tuhan, ngergaken ras nampati mamre gelah ngasup nehken singena ate Dibata.

16. Rende    : PEE No. 122:1-2; Tuhan Kap si empuna geluhta

1) Tuhan kap si empuna geluhta Gegehta Ia si merekenca

Kinteken pe ras pemetehta E pe Ia si nujurkenca

Ia kap erbanca kita sangap Tetaplah man Ia kita ngarap

Di reh susah breNa serpah pulah Tendi kula mejuah-juah

                                                   2). Tuhan kap si empuna geluhta Gegehta Ia si merekenca

Kinteken pe ras pemetehta E pe Ia si nujurkenca

Ia kap erbanca kita sangap Tetaplah man Ia kita ngarap

Di reh susah breNa serpah pulah Tendi kula mejuah-juah

17. Pertoton Tuhan

18. Pengutusen ras Pemasu-masun  :

L    :  Laweslah kam ku kegeluhenndu sekalak-sekalak: “Dage ersinalsallah min terangndu I lebe-lebe kalak sienterem gelah adi idahndu perbahanenndu simehuli, ipujina Dibata, Bapandu siisurga.” (mat. 5:16). Mulihlah alu dame ras mejuah-juah, aloken pasu-pasu idur Dibata nari: “Ipasu-pasu janah ikawali Dibata kam (kita), siang ayo Dibata ersinalsal I babondu (babonta), janah melias atena ngenehen kam (kita), itatap Dibata ku kam (kita) janah malem ate ndu (ateta) ibahanNa, Amin.

P    :   A...min       A...min     A………min (iendeken)

III. PERAYAAN NATAL